Amós 9

1Altar qayllapi sayashaqtan Señor Diosta rikurqani, paymi nirqan: Tusa umakunata p'anaychis teqsikuna chhaphchirikunankama. ¡Yupaychana wasipi kaq llapa runamantaq p'akirqarisqa urmaykuchun! Qhepaqkunatan espadawan wañuchisaq, manan mayqenninkupas ayqenqachu, manan pipas phawarikunqachu. 2Wañuy-pachapi pakakuqtinkupas, chaymantan paykunata aysamusaq, hanaq pachakama wichariqtinkupas, chaymantan paykunata uraykachimusaq. 3Carmelo orqo patapi pakaykukuqtinkupas chaypin paykunata maskhasaq, hinaspan apamusaq. Lamar-qocha ukhumanña rikunaymanta pakaykukuqtinkupas, chaymanmi mach'aqwayta kachaykusaq paykunata kaninanpaq. 4Awqanku kamachipaq aparikuqtinpas, chaymanmi espadata chayachisaq paykunata wañuchinapaq. ¡Paykunatan mana allinpaq qhawasaq, manataqmi allinpaqchu qhawasaq! nispa. 5Tukuy-atiyniyoq Apu Señor Diosmi hallp'a pachata tupaykun, hinan chullurin, chaypi llapallan tiyaqkunataq waqaykunku, hallp'a pachantintaqmi wicharinpas uraykunpas, Egipto Nilo mayuq llimp'arisqanta chinkaykusqanta hina. 6Paymi hanaq pachapi tiyanan wasita wasichakun, kay pachatan azul qatanawan hina qataykun. Paymi lamar-qocha unuta huñuykamun, hinaspan chayta hallp'a pataman ch'aqchumun. Paypa sutinqa Señor Diosmi. 7Señor Diosmi Israel runakunata nin: ¿Manachu qankunaqa Etiopía runakuna hina kapuwankichis? ¿Manachu ñoqaqa Israelta Egipto suyumanta pusamurqani, Filistea runakunatapas Cretamanta pusamurqani, Siria runakunatapas Kirmanta pusamurqani? nispa. 8Apu Señor Diosmi kay huchasapa suyuta qhawarispa nin: Ñoqan chay suyuta hallp'a pachamanta ch'inyachisaq, ichaqa manan llapallantapunichu Jacobpa aylluntaqa ch'usaqyachisaq. Ñoqa Señor Diosmi chayta nini. 9Ñoqan kamachisaq llapa suyukunata, paykuna Israel aylluta suysunankupaq, imaynan huk suysunapi mikhuy ruruqa suysukun hinata, manataq huk rurullapas pampaman urmanqachu. 10Llaqtaypi huchasapakunan ninku: Manan imapas chayamuwasunchu, manan mana allinqa taripamuwasunchu, nispa. Chaywanpas llapallanpunin espadawan wañuchisqa kanqaku. 11Señor Diosmi nin: Chay p'unchaypin Davidpa urmasqa ch'ukllanta ñoqa sayarichisaq, q'asankunatan wisq'asaq, thunikusqankunatapas perqasaq, hinaspan ñawpa p'unchaykunapi kasqanta hina ch'ukllapullasaqtaq, 12Edommanta puchuqtapas hap'ikapunanpaq, hinallataq ñoqa yupaychaq llapa suyukunatapas munaychakunanpaq. Ñoqa Señor Diosmi chayta nini, rimasqaytaqa hunt'asaqpunin. 13Kayqa p'unchaykunan chayamushan, yapuqmi ichhuqman aypanqa, uvasta saruqpas muhu apaqmanmi aypanqa, orqokunamantan, moqokunamantan upi vino phawarinqa. Ñoqa Señor Diosmi chayta nini. 14Israel llaqtaytaqa preso kasqanmantan pusakampusaq, hinan paykunaqa purunyachisqa llaqtakunata perqanqaku, chaykunapitaq tiyanqaku. Uvas yuratan plantanqaku, chay vinotan ukyanqaku, huertakunatan tarpunqaku, chay rurukunatan mikhunqaku. 15Hallp'ankupin paykunata tiyachisaq, manataqmi hayk'aqpas paykunaman qosqay hallp'ankumantaqa wikch'usqachu kanqaku, nispa. Chay hinatan Diosniyki Señor Diosqa nin.

will be added

X\