1 Huk rikhuriytawanmi Apu Señor Diosqa rikuchiwarqan poqosqa frutayoq canastata. 2 Paymi niwarqan: –Amós, ¿imatataq rikushanki? nispa. Chaymi kutichirqani: –Poqosqa frutayoq canastatan, nispa. Hinan Señor Diosqa niwarqan: –Israel llaqtaypaqmi p'uchukanan chayamun, manan astawanpas payta pampachasaqchu. 3 Chay p'unchaypiqa yupaychana wasipi takinankumantaqa anchinqakun. Askha ayakunan kanqa, ch'inllan hinantinman chaykunata wikch'unqaku, nispa. Ñoqa Apu Señor Diosmi chayta nini. 4 Kayta uyariychis, wakchakunaq kallpanta suwakuqkuna, llapa huch'uyyaykukuqtapas sinchita wakchayachiqkuna. 5 Qankunan ninkichis: ¿Hayk'aqtaq mosoq killa p'unchay tukukunqa trigota qhatunanchispaq? ¿Hayk'aqtaq samana p'unchaypas tukukunqa trigo taqekunata kicharinanchispaq? ¡Tupunata huch'uyyachisun, hayk'achus valesqantapas wichachisun, balanzatapas q'otunapaq waqllichisun! 6 ¡Trigo k'urmutawanpas qhatusun! ¡Mana piniyoqkunata qolqewan rantisun, wakchakunatapas iskay usut'awan chhalasun! nispa. 7 Jacobpa yupaychasqan Señor Diosmi sutinpi jurarqan: Manan hayk'aqpas qonqasaqchu tukuy imaymana ruwasqankuta, nispa. 8 ¿Manachu hallp'aqa chaywan chhaphchikunqa? ¿Manachu chaypi llapa tiyaqqa waqaykunqa? Pachantinmi wicharinqapas uraykunqapas, Egipto Nilo mayuq llimp'arisqanta chinkaykusqanta hina. 9 Apu Señor Diosmi nin: Chay p'unchaymi intita chawpi p'unchaypi haykuchisaq. K'anchay p'unchaypitaq hallp'a pachata tutayaykuchisaq. 10 Fiestaykichistan wañuqmanta waqayman tukuchisaq, llapa takiykichiskunatataq llakiy harawiman tukuchisaq. Llapatan luto p'achawan p'achachisaq, llapa runaq umantapas llakikuy señalpaq rutuchisaq. Chay p'unchaytaqa sapan churi chinkaykapuqmanta waqanaman hinan tukuchisaq, hinan may llakikuywan tukuykapunqa. 11 Ñoqa Señor Diosmi kayta nini: P'unchaykunan chayamushanña chaykunapin kay pachaman yarqayta chayachimusaq, manan mikhunamanta yarqaytachu, manan unumanta ch'akichikuytachu, aswanpas ñoqaq simiy uyariymanta yarqachikuytan. 12 Lamar-qochamanta huk lamar-qochakaman kayman chayman purinqaku, wichaymantan inti lloqsimuykama puriykachanqaku, simiyta maskhaspa, manataqmi tarinqakuchu. 13 Chay p'unchaypin munay sipaskunapas waynakunapas ch'akiymanta pisipanqaku. 14 Hinallataq Samariapi wak'a diospa sutinpi juraqkunapas, Danpi idoloq sutinpi jurani, niqkunapas, Beersebapi wak'a diospa sutinpi juraqkunapas lliwmi urmanqaku, manañataq astawanpas sayarinqakuñachu, nispa.
