Amós 7

1Kaytan Apu Señor Diosqa rikuchiwarqan: Paytan askhallaña langostata kamashaqta rikurqani qhepa wiñay q'achu wiñarimushaqtin. Chayqa reypaq ichhusqanmantaña wiñamuq q'achun kasqa. 2Suyuntinpi qorata langosta mikhuyta tukushaqtintaq, ñoqa nirqani: –Apu Señor Diosníy, pampachaykuwayku, ¿pitaq Jacob llaqtaykita aysarinqa? Payqa huch'uyllan riki, nispa. 3Hinan rikuchiwasqanmanta huk-hinata yuyaykuspa Señor Diosqa nirqan: –¡Manan chayqa kanqañachu! nispa. 4Kaytan Apu Señor Diosqa rikuchiwarqan: Señor Diostan rikurqanki, llaqtanta juzgananpaq ninata waqyashaqta. Hinan ninaqa manchay lamar-qochata ch'akirparichishasqa, campokunatapas ruphaykushasqa. 5Chaymi nirqani: –¡Apu Señor Diosníy sayapullayña! ¿Pitaq Jacob llaqtaykita aysarinqa? Payqa huch'uyllan riki, nispa. 6Hinan rikuchiwasqanmanta huk-hinata yuyaykuspa Apu Señor Diosqa nirqan: –¡Manan chaypas kanqañachu! nispa. 7Kaytapas Señor Diosqa rikuchillawarqantaqmi: Paymi plomadawan perqasqa perqa qayllapi sayashasqa, makinpitaq perqaqpa plomadanta hap'ishasqa. 8Hinan Señor Diosqa tapuwarqan: –Amós, ¿imatan rikushanki? nispa. Ñoqataq: –Perqaqpa plomadantan, nirqani. Chaymi payqa niwarqan: –Kay plomadawanmi yachasaq Israel llaqtayqa cheqanchus q'ewichus kashasqanta. Manan payta astawanpas pampachasaqchu. 9Isaacpa wak'a dioskunata yupaychanan cheqaskunan thunisqa kanqa, Israelpa yupaychana wasinkunapas purunyachisqan kanqa. ¡Jeroboampa ayllun contran espadantin sayarisaq! nispa. 10Hinan Betelpi kaq sacerdote Amasiasqa Israel rey Jeroboamman willachimurqan: Amosmi Israel runakuna ukhupi awqayki sayarimun, llaqtaqa manañan rimashasqanta uyarinmanchu. 11Kay hinata rimaspan Amosqa purin: Espadan Jeroboamtaqa wañuchinqa, Israeltaq llaqtanmanta karuman presopuni apasqa kanqa, nispa. 12Hinan Amasiasqa Amosta kamachirqan: –¡Yaw, profeta, ripuy! ¡Judá suyuman ayqey! Chaypin profetizayta atinki mikhunaykita tarinaykipaq. 13Amaña Betelpiqa profetizaychu, kayqa reypa ch'uya wasinmi, suyuq hatun yupaychana wasinmi, nispa. 14Amostaq Amasiasman kutichirqan: –Manan profetachu kani, manataqmi profeta t'aqamantapaschu, aswanpas uywa michiqllan kakuni, k'ita higostataqmi pallakunipas. 15Ichaqa Señor Diosmi uywa michinamanta pusamuwaspa niwarqan: Riy, Israel llaqtayman simiyta willamuy, nispa. 16Chayrayku, Señor Diospa siminta uyariy: Qanqa nishankin: Ama Israel contraqa profetizaychu, amallataq Isaacpa ayllun contrapas rimaychu, nispa. 17Chayraykun Señor Diosqa nin: Warmiykin llaqta ukhupi rabonaman tukupunqa, wawaykikunan espadawan wañuchisqa kanqa, hallp'aykipas sorteopin rakikunqa, qantaqmi wak runakunaq suyunpi wañunki, Israeltaqmi llaqtanmanta karuman preso apasqa kanqa, nispa.

will be added

X\