Amós 6

1¡Ay, imaynaraqmi kankichis Sionpi chutarayaqkuna! ¡Ay, imaynaraqmi kankichis mana imatapas manchakuspa Samariapi tiyaqkuna! Aswan allin hatun suyupi umalli runakunan kankichis, qankunamanmi Israel aylluqa hap'ipakusunkichis. 2Riychis Calne llaqtata, hinaspa qhawamuychis, chaymanta hatun Hamat llaqtata riychis, hinamantataq Filistea runakunaq Gat llaqtanman uraykuychis. ¿Qankunari aswan allinchu chay llaqtakunamanta kankichis? ¿Hallp'ankupas aswan hatunchu hallp'aykichismanta karqan? 3Qankunaqa hatun llaki p'unchay chayamunantan mana kasurparinkichischu, chay hinapin mana chanin ruwayta suyupi askhayachishankichis. 4¡Ay, imaynaraqmi kankichis marfilwan sumaqchasqa puñunakunapi chutarayaqkuna! ¡Ay, imaynaraqmi kankichis munay tiyanakunapi aysarayaqkuna! Oveja t'aqamanta apamusqa borregokunatan mikhunkichis, hinallataq wirayachisqa torillokunatapas. 5Arpaq waqasqanpin takikunata paqarichinkichis, David hinan taki tocanakunata kamarinkichis. 6Hatun vasokunapin vinota ukyankichis, ancha chaniyoq hawinakunawanmi hawikunkichis, manataq Josepa muchusqanmantaqa llakikunkichischu. 7Chaymi kunanqa preso riqkunaq ñawpaqenta wak suyuman rinkichis, aycha kusichiqkunaq q'ochukuynintaq tukukunqa, nispa. 8Apu Señor Diosmi pay kikinpa sutinpi juran, Tukuy-atiyniyoq Señor Diosmi nin: Jacobpa anchaykachasqantan millakuni, qhapaq wasinkunatapas cheqnikunin, awqamantaqmi hap'iykachisaq, llaqtatapas chaypi ima hayk'a kaqtapas, nispa. 9Kay hinataq kanqa, chunka runachus huk wasipi qhepanqa chayqa, chunkantinmi wañunqa. 10Sinchipunin manchakuyqa kanqa, huk wawqechus mayqen ayatapas wasinmanta horqonanpaq hoqarishaspa, wasi ukhuman haykuqta ninqa: ¿Pipas qanwan kashanraqchu? nispa chayqa, hukninmi: Manan, nimunqa. Ñawpaqkaqtaq ninqa: ¡Upallay, paqtan Señor Diospa sutinta rimariwaq! nispa. 11Señor Diosmi kamachikun: Hatuchaq wasita thuninanpaq, huch'uykaq wasita ñut'unanpaq. 12¿Caballokunaqa qaqa-qaqanta phawanchu? ¿Lamar-qochata torokunawan yapunkuchu? ¡Chaypas qankunaqa chaninchaytan venenoman tukuchirqankichis, kuskachaytapas ajenjoman tukuchirqankichis! 13Qankunaqa yanqan kusikunkichis, kallpanchiswanmi atiyniyoq kanchis nispan alabakunkichis. 14Allintapuni qhawariy, Israel ayllu, Tukuy-atiyniyoq Señor Diosmi nin: Qankuna contran huk hatun suyuta sayarichimusaq, chaymi Hamat q'asamanta Arabá wayq'oman haykuq mayukama sarunchasunkichis, nispa.

will be added

X\