Amós 5

1Israel runakuna, simiykunata uyariychis, qankunamanta kay llakiy-llaki takisqayta uyariychis: 2Ch'uya sipas Israelmi urmaykapun, manañan astawanpas sayarinñachu. Pampapin wikch'urayapushan, manan pipas sayarichiqnin kanchu, nisqayta. 3Apu Señor Diosmi Israel llaqtata nin: Waranqa runawan hatun maqanakuyman lloqsiq llaqtaqa pachakllawanñan kutimpunqa, pachakwan lloqsiq llaqtapas chunkallawanñan kutimpunqa. 4Señor Diosmi Israel llaqtata nin: Asuykamuwaychis, kawsankichismi. 5Ama Betelman asuykuychischu, amataq Gilgalta riychischu, amallataq Beersebamanpas uraykuychischu. Gilgalpi tiyaqkunaqa preso apasqapunin kanqa, Betel llaqtapas thunisqan kanqa, nispa. 6Chhaynaqa, Señor Diosman asuykuychis, kawsankichistaqmi, paqtan Josepa ayllunta nina hina ruphaykunman, mana pipas Betelpi nina wañuchiq kaqtin. 7¡Ay, imaynaraqmi kankichis chaninchaytapas ajenjota hina hayaman tukuchiqkuna! ¡Ay, imaynaraqmi kankichis kuskachaytapas pisicharpariqkuna! 8Señor Diosmi ch'aska Qototapas Hatun Cruztapas ruwaqqa, paymi laqhayaqta p'unchayman tukuchiqqa, p'unchaytapas laqhayaqman tukuchiqqa, paymi lamar-qocha unuta phuyuchimuqqa, hinaspa hallp'a pataman chayta ch'aqchuqqa. 9Señor Diosmi sutinqa. Paymi kallpasapakunata wañurqarichiqqa, allin perqasqa llaqtatapas thunichiqqa. 10¡Ay, imaynaraqmi kankichis, juzganapi chanin rimaqta cheqnikuqkuna! ¡Ay, imaynaraqmi kankichis, cheqaqkaqta rimaqtapas millakuqkuna! 11Qankunaqa mana piniyoqtan sarunchankichis, trigo llank'asqanku rurutapas sik'inkichis, chayrayku thupasqa rumimanta wasikunata perqarqankichis chaypas, manan chaykunapi tiyankichischu, sumaq uvas yurakunata plantarqankichis chaypas, manan vinota ukyankichischu. 12Ñoqaqa yachanin askha kuti mana kasukusqaykichista, askhallataña huchallikusqaykichistapas. Yachanin chanin runata llakichisqaykichista, lluk'iykusqatapas chaskikusqaykichista, wakchakunaq juzganapi uyarichikusqanta waqllichisqaykichistapas. 13Chaymi allin yuyayniyoqqa upallakun, chay p'unchay mana allin kasqanrayku. 14Allinkaqta maskhaychis, amataq mana allinkaqtachu, hinan kawsankichis. Ahinapin Tukuy-atiyniyoq Señor Diosqa qankunawan kashanqa, imaynan nirqankichis hina. 15¡Mana allinkaqta cheqnikuychis! ¡Allinkaqta munakuychis! Juzganapipas allin chaninchayllapuni kachun, ichapas Tukuy-atiyniyoq Señor Diosqa Josepa ayllunmanta puchuqta khuyapayanman. 16Tukuy-atiyniyoq Señor Diosmi nin: Llapa plazakunapin waqay kanqa, llapa callekunapin sonqo nanay waqay kanqa. Chakrapi llank'apakuqkunatapas waqapakuqkunatapas waqanankupaqmi waqyanqaku. 17Llapa uvas chakrakunapin waqaykunqaku, ñoqaqa muchuchinaypaqmi chayamusqaykichis, ninmi Señor Diosqa. 18¡Ay, imaynaraqmi kankichis Señor Diospa chayamunallantaña munaqkuna! ¿Imaynataq qankunapaq chay p'unchayri kanqa? ¡Laqhayaqmi kanqa, manataq k'anchaychu! 19Leonmanta ayqekushaspa ukumariwan tupaq hinan kanqa, otaq wasinman haykushaspa perqaman tawnaykukuqtin mach'aqwaypa kanisqan hinan kanqa. 20Arí, Señor Diospa p'unchayninqa laqhayaqmi kanqa, manataq k'anchaychu, tutayaqmi kanqa, manataq sut'ichu. 21Tukuy-atiyniyoq Señor Diosmi nin: Cheqnikunin, millakunin fiestaykichiskunataqa, manataqmi kusikusaqchu huñukuyniykichiswanqa. 22Ruphachina sacrificiotaña haywawankichis chaypas, manan chaykunataqa chaskisaqchu. Ofrendaykichistaqa manan qhawarillasaqpaschu, manallataq wirayachisqa animalniykichistapas allipunachiq sacrificioykichistapas. 23Karunchawaychis askhallaña takiyniykichiskunata, arpaykichiskunaq waqasqantapas manan uyariyta munanichu. 24Aswanpas chaninchayqa unu hina hunt'a phawachun, kuskachaypas mana tukukuq mayu hina kachun. 25Yaw, Israel ayllu, ¿chayri ch'inneqpi tawa chunka watantinqa sacrificiokunatapas ofrendakunatapas haywawarqankichischu? Manan. 26Kunanpas reyniykichis Sicut-tan, ch'askaykichis Quiyutan, ruwakusqaykichis idolokunatan wantunkichis. 27Damasco llaqtaq haqayninkaman apachisqaykichis, ninmi Señor Diosqa. Paypa sutinqa Tukuy-atiyniyoq Señor Diosmi.

will be added

X\