Amós 3

1Israel runakuna, qankuna contra Señor Diospa rimasqanta uyariychis, Egipto suyumanta horqomusqan llaqta contra paypa rimasqanta uyariychis. Paymi nin: 2Kay pachantin llapa llaqtakunamantaqa qankunallatan akllakurqaykichis, chaymi tukuy mana allin ruwasqaykichiskunamanta muchuchisqaykichis, nispa. 3Purinankupaq sonqota mana tupachishaspa, ¿iskay runaqa kuska purinmanchu? 4¿Mana mikhunata hap'ishaspa, leonqa hatun yunkapi qaparinmanchu? ¿Mana imatapas hap'ispalla uña leonqa t'oqonmanta qaparimunmanchu? 5¿Toqllapi mana mikhuna kaqtin, phalaq animalqa sipitapi urmanmanchu? ¿Mana imatapas hap'ispalla toqllaqa pampamanta t'iwkanmanchu? 6¿Llaqtapi trompeta mana waqaqtinqa runakuna mancharikunmanchu? ¿Ima mana allinpas llaqtapi kanmanchu Señor Dios mana chayachimushaqtin? 7Manan, manapunin Señor Diosqa imatapas ruwanchu yuyaykusqanta kamachin profetakunaman manaraq willashaspaqa. 8¡Leonmi qaparin! ¿Pitaq mana mancharikunmanchu? ¡Señor Diosmi rimarin! ¿Pitaq mana profetizanmanchu? 9Asdod llaqtaq qhapaq wasinkunapi willamuychis, Egipto suyuq qhapaq wasinkunapipas willamuychis. Samaria orqokunaman huñunakamuychis, hinaspa chaypi ch'aqwaykunata rikuychis, hinallataq chay ukhupi sarunchasqakunatapas, nispa. 10Señor Diosmi nin: Manan chaninkaqta ruwayta yachankuchu, qhapaq wasinkupin qechusqatapas llat'anasqatapas huñunku. 11Chayraykun suyuntinta huk awqa muyuykunqa, hinaspan pukaraykita thuninqa, qhapaq wasiykikunatapas llat'ananqa, ninmi Señor Diosqa. 12Señor Diosmi nin: Imaynan michiqqa leonpa siminmanta ovejaq iskay chakinta qechun, otaq ninri puchullantapas, chay hinan Samariapi tiyaq Israel runakunaqa pisilla qhepanqaku, Damascomanta apamusqa sumaq puñunapi chutarayaqkunapas, nispa. 13Tukuy-atiyniyoq Señor Diosmi nin: Uyariychis, Jacobpa ayllun contra rimariychis. 14Huchallikusqankumanta Israelta muchuchisqay p'unchaypin Betelpi kaq altarkunata thunisaq, altar waqrakunapas willusqan kanqa, pampamantaq urmanqa. 15Thunisaqmi chiraw mitapaq wasitapas q'oñi mitapaq wasitapas, thunisaqmi marfilwan sumaqchasqa wasikunatapas, purunyachisaqmi chay munay wasikunatapas. Ñoqa Señor Diosmi chayta nini.

will be added

X\