Amós 2

1Señor Diosmi nin: Moab runakunan sinchitaña huchallikun, chaymi paykunataqa muchuchisaqpuni, Edom reypa tullunkunatan ruphaykachirqan usphayachinankama. 2Chaymi Moab suyuta ninawan hap'iykachisaq, Queriotpi qhapaq wasikunatataq ruphaykunqa. Hinan Moabqa awqa-tinkuy qaparkachaypi trompetapas waqashaqtin wañunqa. 3Moab kamachikuqtan wañuchisaq, hinallataq llapa umalli runakunatapas, ninmi Señor Diosqa. 4Señor Diosmi nin: Judá runakunan sinchitaña huchallikun, chaymi paykunataqa muchuchisaqpuni, yachachikuyniykunatan saqerparirqanku, manataq kamachikuy simiykunata kasukurqankuchu, aswanpas tayta-mamankuq yupaychasqan idolokunata yupaychaspan pantapurqanku. 5Chaymi Judá suyuta ninawan hap'iykachisaq, Jerusalenpi qhapaq wasikunatataq ruphaykunqa, nispa. 6Señor Diosmi nin: Israel runakunan sinchitaña huchallikun, chaymi paykunataqa muchuchisaqpuni, chanin runatan qolqeman vendenku, wakcha runatataq iskay usut'aman chhalanku. 7Mana piniyoqkunatan sinchita sarunchakunku, huch'uyyaykukuqpa uyarichikusqantapas hark'anku. Taytantin churintinmi kaq sipasllawan puñunku, chhaynatan ch'uya sutiyta qhellichanku. 8Prendasqa p'acha patapin mayqen altar qayllapipas qhelli huchata ruwanku. Multa sik'isqa vinotataqmi diosninkuq wasinpi ukyanku. 9Ñoqataq ichaqa ñawpaqenkupi Amor llaqta runakunata wañurqarichirqani, sayayninkun cedro sach'a hina karqan, encina sach'a hinataq ch'ilallaña, ñoqataq k'allmankunatapas p'akirqarirqani, saphinkunatapas t'irarqarirqani. 10Qankunataqa Egipto suyumantan horqomurqaykichis, hinaspan tawa chunka watantin ch'inneqninta purichimurqaykichis, Amor llaqta runakunaq hallp'anta hap'ikapunaykichispaq. 11Wakin churiykichistan profetata sayarichirqani, wakin waynaykichistataq Nazareo runakuna kananpaq t'aqakurqani, Israel runakuna, ¿manachu chayqa chay hina? Ñoqa Señor Diosmi chayta nini. 12Qankunan ichaqa Nazareo runakunaman vinota ukyachirqankichis, profetakunatataq: Ama profetizaychischu, nirqankichis. 13Kunanqa ñoqan pampaman ñit'iykusqaykichis, imaynan winay q'epintin carretaqa pampata ñit'iykun hinata. 14Usqhaylla phawaqpas manan ayqeyta atinqachu, kallpasapatapas manan kallpanqa yanapanqachu, allinnin maqanakuqpas manan qespichikunqachu. 15P'eqtawan wach'iqpas manan chutayta atinqachu, usqhaylla phawaqpas manan qespichikunqachu, caballopi sillakuqpas manan qespichikunqachu. 16Chay p'unchaypiqa aswan allinnin maqanakuqpas mana imantinmi ayqekunqa, ninmi Señor Diosqa.

will be added

X\