Amós 1

1Amosqa Tecoa llaqtapi michiqmi karqan. Judá suyupi rey Uzías kamachishaqtin, Israel suyupitaq Joaspa churin rey Jeroboam kamachishaqtin, iskay wataraq terremoto kananpaq kashaqtinmi, Diosqa Amosta rimaykuspa Israel suyumanta rikuchirqan. Chaymi payqa tukuy kaykunata willarqan. 2Amosmi nirqan: Señor Diosmi Sionmanta kunununumun, Jerusalenmanta manchakuyta qaparimun, michiqkunaq michinan pastokunan naq'epun, Carmelo orqo patan ch'akipun, nispa. 3Señor Diosmi nin: Damasco runakunan sinchitaña huchallikun, chaymi paykunataqa muchuchisaqpuni, Galaadpi tiyaqkunatan fierro kiruyoq saruchinawan sarurqanku. 4Chaymi rey Hazaelpa wasinta ninawan hap'iykachisaq, rey Ben-Hadadpa palaciontataq ruphaykunqa. 5Damasco punkukunatan kicharparisaq, Avén wayq'opi tiyaqkunatan wañurqarichisaq, Bet-Edenpi kamachikuqtan sipirqarisaq. Siria suyu runakunapas Kirmanmi preso apasqa kanqa, ninmi Señor Diosqa. 6Señor Diosmi nin: Gaza runakunan sinchitaña huchallikun, chaymi paykunataqa muchuchisaqpuni, llaqtallantintan presota aparqanku Edom runakunaman kamachipaq vendenankupaq. 7Chaymi Gaza muyuriq perqata ninawan hap'iykachisaq, qhapaq wasinkunatataq ruphaykunqa. 8Asdodpi tiyaqkunatan wañurqarichisaq, Ascalonpi kamachikuqtan sipirqosaq. Ecrón llaqtatan muchuchisaq, puchuq Filistea runapas wañunqan, ninmi Señor Diosqa. 9Señor Diosmi nin: Tiro runakunan sinchitaña huchallikun, chaymi paykunataqa muchuchisaqpuni, Edommanmi llaqtallantinta kamachipaq hap'iykachirqanku, wawqepura rimanakusqankuta pisichaspanku. 10Chaymi Tiro llaqtaq muyuriq perqanta ninawan hap'iykachisaq, qhapaq wasinkunatataq ruphaykunqa, nispa. 11Señor Diosmi nin: Edom runakunan sinchitaña huchallikun, chaymi paykunataqa muchuchisaqpuni. Wawqen Israelwan ayllu kasqanta negaspan espada makintin qatiykacharqan. K'araktataq phiñapayashallarqanpuni, manataq hayk'aqpas phiñakuyninqa thanirqanchu. 12Chaymi Temán llaqtata ninawan hap'iykachisaq. Bosrapi qhapaq wasikunatataq ruphaykunqa, nispa. 13Señor Diosmi nin: Amón runakunan sinchitaña huchallikun, chaymi paykunataqa muchuchisaqpuni, hallp'ankuta hatunyachinapaqmi wiksallisqa Galaad warmikunata wiksanta khallarqanku. 14Chaymi Rabá llaqtaq muyuriq perqanta ninawan hap'iykachisaq, qhapaq wasikunatataq ruphaykunqa, awqa-tinkuy p'unchaypi qaparkachaywan, muyuq wayra p'unchaypi manchay wayrawan. 15Reyninpas llapa umalli runankunapas wak suyumanmi preso rinqa, ninmi Señor Diosqa.

will be added

X\