2 Samuel 8

1Chay qhepatataq Davidqa Filistea runakunata atiparqan, hinaspan suyu kamachinanta qechuspa munaychakurqan. 2Hinallataq Moab runakunatapas atiparqan, hinaspan paykunata pampaman thallaykachispa, cordelwan tupuchirqan: Pikunachus cordelwan iskay tupusqa ukhupi kaqkunan wañuchisqa karqanku, huk tupusqa ukhupi kaqkunataq kawsarqanku. Chaymi Moab runakunaqa Davidpa kamachisqan kapurqanku, contribuciontapas pagarqanku. 3Soba suyu rey Rehobpa churin Hadad-ezertapas Davidqa atipallarqantaqmi Eufrates mayu qaylla hallp'anta kutichikapuq rishaqta. 4Hinaspan Davidqa waranqa qanchis pachak caballoyoq soldadokunata, iskay chunka waranqa chakillapi puriq soldadokunatawan presota apamurqan, carreta aysaq caballokunatapas yaqa llapanta hank'unta kuchurqarirqan, pachak carretakunallapaqña puchuchikurqan. 5Damasco llaqtamanta Aram soldadokunataq Hadad-ezerman maqanakuypi yanapaq hamurqanku, ichaqa Davidmi paykunatapas atipaspa iskay chunka iskayniyoq waranqa soldadokunata wañuchirqan. 6Chaymi Davidqa Aram suyupi Damasco llaqtaman soldado t'aqakunata churarqan, hinan Aram runakunaqa Davidpa kamachisqan kapurqanku, contribuciontapas pagarqanku. Ahinatan Señor Diosqa Davidta maypiña kaqtinpas atipachillarqanpuni. 7Chaymantataq payqa Hadad-ezerpa oficialninkunaq apasqan qori escudokunata qechurqospa Jerusalenman aparikurqan. 8Hinallataq Hadad-ezerpa llaqtankuna Betamanta Berotaimantawan askha bronceta hap'ikurqan. 9Hamat suyu rey Toin Hadad-ezerpa llapan soldadonkunata Davidpa atipasqanta yachaspa, 10churin Joramta rey Davidman napaykuqta kacharqan qorimanta, qolqemanta, broncemanta regalokunatawan apachispa: –Allinpunin Hadad-ezerta maqanakuypi atiparqanki, nispa. Hadad-ezerqa Hamat suyu rey Toiq awqanmi karqan. 11Chay regalokunatan rey Davidqa Señor Diospaq t'aqarqan. 12Hinallataq Edom suyumanta, Moab suyumanta, Amón runakunamanta, Filistea suyumanta, Amalec runakunamanta llapan apamusqan qorita, qolqeta, Hadad-ezermanta wakin qechumusqankunatawan Señor Diospaq t'aqarqan. 13Chaymantataq Davidqa Kachi Qocha Wayq'opi Edom runakunaq chunka pusaqniyoq waranqa soldadonkunata atiparqorqan, chaymi payqa mentasqa kapurqan. 14Edom suyupitaq soldado t'aqakunata churarqan, hinan llapan Edom runakunaqa Davidpa kamachisqan kapurqanku. Chhaynatan Señor Diosqa Davidta maypiña kaqtinpas atipachillarqanpuni. 15Llapa Israel suyutan Davidqa kamachirqan, llapa runakunapaqpas chaninkaqta cheqaqkaqta ruwarqan. 16Sarviaq churin Joabtaq ejercitonpi umalli karqan, Ahiludpa churin Josafat-taq qelqa waqaychaqnin karqan. 17Ahitobpa churin Sadocwan, Abiatarpa churin Ahimelecpiwantaq sacerdotenkuna karqanku, Seraiastaq qelqaqnin karqan. 18Joiadaq churin Benaiastaq reypa guardian Ceret runakunaq Pelet runakunaq umallin karqan, Davidpa churinkunataq sacerdotekuna karqanku.

will be added

X\