1 Llapa muyuriqnin awqankunamanta Señor Diospa qespichisqanmantañan rey Davidqa wasinpi tiyaykapurqan. 2 Hinaspan profeta Natanta nirqan: –Qhawariy, ñoqaqa cedro kurku llaqllasqa wasipin tiyani Diospa arcantaq ichaqa karpallapi kashan, nispa. 3 Natantaq kutichirqan: –Qanwanmi Señor Diosqa kashan, ima munasqaykita ruway, nispa. 4 Chay tutapachan Señor Diosqa Natanta nirqan: 5 –Phaway David kamachiyman, hinaspa nimuy: ¿Qanchu wasita ruwapuwankiman ñoqa chaypi tiyanaypaq? 6 Egipto suyumanta Israel runakunata horqomusqaymanta kunankama manan hayk'aqpas wasipichu tiyarqani, aswanmi karpallapi kayneqman haqayneqman purirqani. 7 Kay unayña llapa Israel runakunawan purimushaspa, manan mayqen Israel kamachikuqkunatapas nirqanichu: ¿Imanaqtinmi cedro kurku llaqllasqa wasita mana ruwapuwankichischu? nispa. 8 Hinallataq David kamachiyta ninki: Tukuy-atiyniyoq Señor Diosmi nin: Campopi ovejakunata michispa purishaqtiykin, ñoqa pusamurqayki Israel llaqtayta umallinaykipaq. 9 Maypiña puriqtiykipas qanwanmi karqani, lliw awqaykikunatapas ñawpaqeykipi muchuchirqanin. Kay pachapi mentasqa runakunata hinan ruwasqayki. 10 Israel llaqtaypaqtaq huk cheqasta wakichisaq, chaypin takyachisaq, hinan tiyanqaku mana piqpa muchuchisqan. Manataq awqankupas llakichinqañachu, 11 imaynan Israel llaqtayman uma qollanakuna churasqay p'unchaykunapi llakichirqanku hinataqa. Tukuy awqaykimantan qespichisqayki, ñoqa kikiymi kamachikunanpaq mirayniykita qosqayki. 12 Wañupuqtiykipas ñawpa taytaykikunawan p'ampasqan kapunki, qanmanta paqarimuq churiykitan kamachikuqta churasaq hinaspan kamachikuyninta takyachisaq. 13 Paymi wasita ruwapuwanqa, ñoqataq wiñaypaq atiyninta takyachisaq. 14 Ñoqataq taytan kasaq, paytaq churiy kanqa. Mana allinta puriqtintaq, imaynan huk tayta wawankunata anyaspa wanachin, chay hinatan ñoqapas wanachisaq. 15 Ñoqaqa tukuy tiempon munakushallasaqpuni, manataq Saulmanta hinachu t'aqakusaq, paytaqa ñawpaqeykimanta wikch'upuniñan. 16 Aylluykipas suyuykipas ñawpaqeypiqa kashallanqapunin, kamachikusqaykiqa wiñaypaqmi takyanqa, nispa. 17 Natantaq llapa rikusqanta uyarisqanta Davidman willarqan. 18 Hinan rey Davidqa Señor Diospa qayllanman asuykuspa nirqan: –Apu Señor Diosníy, kaykamañan yanapamuwanki, ichaqa ñoqapas aylluypas manan imapaschu kayku. 19 Chaywanpas Apu Señor Diosníy, chaykunamanta astawanñan ruwashanki, hamuq mitakunapaqpas prometellankitaq aylluyta saminchanaykipaq. Apu Señor Diosníy, ¡ñoqapaqqa ancha musphaymi kaykuna rikuchiwasqaykiqa! 20 ¿Imatawantaq ñoqa niykiman? ¡Ay, Apu Señor Diosníy, qanmi kay kamachiykita reqsiwanki! 21 Munayniykiman prometesqaykiman hinan chay tukuy musphanakunata ruwarqanki ñoqaman yachachiwanaykipaq. 22 ¡Apu Señor Diosníy, ancha hatunmi kanki! Ninriykuwan uyarisqaykuman hinaqa manan kanchu huk Dios qan hina, sapallaykin kanki. 23 ¿Mayqen llaqtataq kay pachapi Israel llaqtayki hinaqa kanman? Qanmi Egipto suyumanta kacharichirqanki llaqtayki kananpaq. Manchay musphaytan paykunapaq qan ruwarqanki, chaykunawantaq hatun mentasqa sutiyoq kapurqanki. Ñawpaqeykumantan llaqtakunatapas diosninkutapas wikch'urqanki. 24 Señor Diosníy, wiñay llaqtayki kananpaqmi Israelta takyachirqanki, Diosninkutaq kapurqanki. 25 Chay hinaqa, Apu Señor Diosníy, ñoqamanpas aylluymanpas prometesqaykita wiñaypaq hunt'ay. Nisqaykita ruway, 26 sutiykitaq wiñaypaq yupaychasqa kanqa. Hinan runakunaqa ninqaku: Tukuy-atiyniyoq Señor Diosmi Israelpa Diosninqa, nispa. Ñoqaq aylluypas mana urmaqtaq ñawpaqeykipi sayanqa. 27 Tukuy-atiyniyoq Señor, Israelpa Diosnin, qanmi ñoqata niwarqanki aylluyqa mana urmaq sayananta, chaymi kay confianzawan mañakamuyki. 28 Qanqa Señor Diosmi kanki, rimasqaykita hunt'aq, ñoqamanmi kay ancha allinta prometewarqanki. 29 Kunanqa aylluyta saminchaykuy allillantapuni wiñaypaq paykunata qhawarinaykipaq. Qanmi samincharqanki, Apu Señor Diosníy, chay saminchayniykiwanmi aylluyqa wiñaypaq saminchasqa kanqa, nispa.
