2 Samuel 6

1Davidmi Israelpi allinnin qharikunata kinsa chunka waranqata hina wakmanta huñurqan. 2Hinaspataq puririrqan llapa soldadonkunantin Baalath-Judá llaqtaman Diospa arcanta apamunankupaq. Arcaqa Tukuy-atiyniyoq Señor Diospa sutinwan sutichasqan, paymi arcapi querubinkuna chawpipi tiyashan. 3Abinadabpa moqopi wasinmantataq mosoq carretapi Diospa arcanta churaykamuspa apamurqanku. Hinan Abinadabpa churinkunaqa Uzawan Ahiopiwan Diospa arcan carretata puriysimurqanku, 4arcaq ñawpaqentataq Ahío rirqan. 5Davidtaq llapa Israel runakunapiwan Señor Diospa ñawpaqenpi tukuy kallpankuwan takispa tusurqanku, hinataq tocarqanku arpata, tawtinkuta, tinyata, chhaqllaqeta, platillotawan. 6Naconpa eranman chayaqtinkutaq, torokuna carretata urmachiyta munaqtin, Uzaqa arcata makinwan llamiykuspa sayaykachirqan. 7Hinan Señor Diosqa sinchita Uzapaq phiñakurqan, mana manchakuspa arcata hap'iykusqanmanta, chaymi Uzata muchuchirqan, kaq ratotaq Uzaqa Diospa arcan qayllapi wañusqa wikch'ukurqan. 8Davidtaq phiñakurqan Uzata Señor Diospa wañuchisqanmanta, hinan chay p'unchaymanta chay cheqasta “Perez-Uza” nispa suticharqanku. 9Chay p'unchaymi Davidqa Señor Diosta manchakuspa nirqan: Chhaynaqa, ¿imaynan Señor Diospa arcanta ñoqa apayman? nispa. 10Chayraykun payqa Diospa arcanta Jerusalenman mana apayta munarqanchu, aswanpas Gat llaqtayoq Obed-edompa wasinman apachirqan. 11Señor Diospa arcanqa chaypin kinsa killantin karqan, Señor Diostaq Obed-edomta lliw familiantapas samincharqan. 12Rey Davidmantaq willarqanku: –Señor Diosmi Obed-edomta, familianta, tukuy kaqninkunatawan saminchashan, nispa. Chaymi payqa Obed-edompa wasinta rirqan, hinaspa ancha kusisqa Señor Diospa arcanta Jerusalenman apamurqan. 13Diospa arcanta apaqkuna soqta thaskiyta purishaqtinkutaq, Davidqa huk torota wirayachisqa torillotawan sacrificiota haywarqan. 14Hinan Davidqa linomanta sotanawan churaykusqa Señor Diospa ñawpaqenpi tukuy kallpanwan tusurqan. 15Ahinatan ancha kusisqa qaparispanku putututa tocaspanku Diospa arcanta llapa Israel runakuna Davidpiwan aparqanku. 16Señor Diospa arcan Jerusalenman chayaqtintaq, Saulpa ususin Micalqa ventanamanta Señor Diospa ñawpaqenpi reypa kusikuymanta saltasqanta tususqanta rikuspa, sonqonpi payta pisicharqan. 17Chaymantataq Davidpa wakichisqan karpaman Señor Diospa arcanta churaykurqanku, hinan Davidqa Señor Diosman haywarqan ruphachina sacrificiokunata sumaq kawsay sacrificiokunatawan. 18Señor Diosman sacrificiokunata haywayta tukuspataq, Davidqa Tukuy-atiyniyoq Señor Diospa sutinpi llaqtata samincharqan. 19Hinaspataq llapa Israel runakunaman, warmiman, qhariman, hayk'an kaqman rakichirqan sapankaman huk t'antata, dátil ruru k'umpata, pasas k'umpatawan. Chaymantataq llapanku sapanka wasinkuman ripurqanku. 20Davidpas kutipullarqantaq familianta saminchaq, hinan Micalqa chaskinanpaq lloqsimuspa nirqan: –¡Israelpa reyninqa kusa respetasqapunin! ¡Mana p'enqakuq runa hina q'alakuspa oficialninkunaq warmi kamachinkunawan qhawachikushan! nispa. 21Hinan Davidqa kutichirqan: –Señor Diosta hatunchaspaymi tusuni, paymi taytaykiq lliw aylluykiq rantinpi Israel llaqtanta kamachinaypaq akllawarqan. Chaymi kunanpas astawanraq tususaq Señor Diosta hatunchanaypaq, 22astawanraqmi huch'uyyakusaq. Qanmanqa rikch'akusunki mana p'enqakuq kasqaypaschá, ichaqa rimasqayki warmi kamachikunaq ñawpaqenpiqa respetasqan kasaq, nispa. 23Micalqa manan wachakapurqanchu wañukapunankama.

will be added

X\