2 Samuel 5

1Chaymantataq llapa Israelpa ayllunkuna Davidman Hebrón llaqtata hamurqanku, hinaspa nirqanku: –Ñoqaykuqa yawarniykin cuerpoykin kayku. 2Saúl kamachikushaqtinraqmi qanqa maqanakuypi Israelpa soldadonkunaq umallin karqanki. Señor Diospas nirqasunkin, qanmi Israel llaqtayta michinkipas kamachinkipas, nispa. 3Ahinatan Israelpi llapa kurak runakuna Hebronta rey Davidman hamurqanku. Chaypin reyqa paykunawan Señor Diospa ñawpaqenpi rimanakurqan. Hinan Israelpi rey kananpaq aceitewan hawirqanku. 4Kamachikuyta qallarishaspataq Davidqa kinsa chunka watayoq karqan, tawa chunka watataq kamachikurqan. 5Ñawpaqta Judá aylluta Hebrón llaqtamanta qanchis wata soqta killanta kamachirqan, chaymantataq Israelta Judatawan Jerusalenmanta kinsa chunka kinsayoq watata kamachirqan. 6Chay qhepatataq reyqa soldadonkunapiwan Jerusalenman rirqanku, chaypi tiyaq Jebus runakunawan maqanakuq. Paykunataq Davidta nirqan: –Manan haykumuyta atiwaqchu, wist'ukuna ñawsakunallaraqmi atipasunkiman, nispa. Chaytaqa nirqanku, manapuni Davidqa haykunanta yuyaspan. 7Chaywanpas, Davidqa Sión pukaratan atipaspa hap'ikapurqan, kaymi “Davidpa Llaqtan” nisqa. 8Chay p'unchaymi Davidqa nirqan: –Mayqenpas Jebus runakunata atipay munaqqa, unu purina t'oqonta seqamuchun chay ñawsakunata wist'ukunata atipachun, paykunataqa cheqnikunin, nispa. Chayraykun rimaypas nin: “Dios yupaychana wasimanqa manan ñawsapas wist'upas haykunqachu”, nispa. 9Chay pukarapin Davidqa tiyapurqan, suticharqantaq “Davidpa Llaqtan” nispa. Pukaraq muyuriqninpitaq payqa llaqtata sayarichirqan, p'ukru hunt'achisqa cheqasmanta qallarispa ukhu ladoman llank'aspanku. 10Tukuy-atiyniyoq Señor Dios paywan kasqanraykun, Davidqa astawanpuni kallpachakusharqan. 11Chaymantataq Tiro llaqta rey Hiramqa Davidman willaqkunata kacharqan, hinallataq k'ullu llaqllaqkunata, rumi thupaqkunatapas. Paykunan cedro kurkukunata aparqanku Davidpaq wasita sayarichinankupaq. 12Hinan Davidqa yacharqan Israel suyupi kamachikuyninta Señor Diospa takyachisqanta, llaqtanta munakuspa suyuntapas hatunyachisqantawan. 13Hebrón llaqtamanta hamusqanmantañataq Davidqa Jerusalenpi askha warmikunawan casarakurqan. Kallarqantaq askha tiyaqmasin warmikunapas, hinan askha churinkunapas ususinkunapas nacerqan, 14sutinkun kaykuna karqan: Samúa, Sobab, Natán, Salomón, 15Ibhar, Elishúa, Nefeg, Jafía, 16Elisama, Eliada, Elifeletpiwan. 17Filistea soldadokunataq Israel suyupi Davidta reypaq aceitewan hawisqankuta yachaspa, llapanku Davidta hap'inankupaq wicharirqanku. Chayta yacharqospataq Davidqa pukaraman haykurqan. 18Filistea soldadokunataq rispanku, Refaim wayq'oman ch'eqeykurqanku, 19chaymi Davidqa Señor Diosta tapurqan: –¿Filistea soldadokunawan maqanakuq riymanchu? ¿Atipachiwankimanchu paykunata? nispa. Hinan Señor Diosqa nirqan: –Arí, riy, ñoqan atipachisqayki, nispa. 20Chaymi Davidqa Baal-perazimman rirqan, hinaspa paykunata atipaspa nirqan: –Señor Diosmi awqaykunata ñawpaqeypi mayu llimp'ay hinaraq qhochurparin, nispa. Chaymi chay cheqasta “Baal-perazim” nispa suticharqan. 21Idolonkutapas chaymanmi Filistea soldadokunaqa wikch'upurqanku, Davidtaq soldadonkunapiwan chaykunata aparqanku. 22Wakmanta wichaspankutaq Filistea soldadokunaqa Refaim wayq'oman ch'eqeykullarqankutaq. 23Chaymi Davidqa Señor Diosta tapullarqantaq, hinan kutichirqan: –Ama paykunawan maqanakuq cheqanta riychu, aswanpas qhepankuta muyuykarqamuy, hinaspa bálsamo sach'a-sach'api paykunawan tinkunki. 24Bálsamo sach'akuna patapi chhaqchaqeqta uyarispaykitaq usqhaylla maqanakuq phawarinki, ñoqan chay rato ñawpaqeykita lloqsisaq Filistea soldadokunata atipanaypaq, nispa. 25Davidtaq Señor Diospa nisqanta hina ruwarqan, chaymi Filistea soldadokunata Geba llaqtamanta Gezer llaqtakama qatispa wañuchirqan.

will be added

X\