2 Samuel 24

1Wakmantan Señor Diosqa Israel runakuna contra phiñakurqan, chaymi paykuna contra Davidta yuyaykachispa nirqan: –Israel runakunata Judá runakunata yupamuy, nispa. 2Hinan rey Davidqa paywan kashaq ejercitonpa umallin Joabta kamachirqan: –Israelpa llapan ayllunkunata Dan llaqtamanta Beerseba llaqtakama purimuy, hinaspa runakunata yupamuy hayk'achus paykuna kasqanta yachanaypaq, nispa. 3Joabmi ichaqa nirqan: –Señor reyníy, pachak kutitaraq Diosniyki Señor Dios llaqtaykita askhayachichun, chayta rikunaykipaqtaq kawsawaqraq, ichaqa, ¿imanaqtintaq runa yupanata munanki? nispa. 4Chaywanpas reyqa mana uyarispan Joabta llapa ejército umallikunatapas kamachishallarqan. Hinan Joabqa ejército umallikunapiwan reypa qayllanmanta lloqsirqan Israel runakunata yupaq. 5Jordán mayuta pasarqospataq Aroer llaqtamantawan wayq'opi kashaq llaqtamantawan yupayta qallarirqanku, hinaspa Gad ayllunta Jezer llaqtaman chayarqanku. 6Chaymantataq Galaad hap'iyman rirqanku, hinallataq Het runakunaq suyunpi Cades llaqtamanpas. Hinaspan Dan Jaan llaqtaman chayarqanku, chaymantataq Sidón llaqtaman muyuykurqanku. 7Tiro llaqta pukaramanpas, llapan Hev runakunaq Canaán runakunaq llaqtankunamanpas chayarqanku, hinaspataq Neguev ch'inneqpi kashaq Beerseba llaqtapi tukupurqanku. 8Isqon killa iskay chunka p'unchaymi suyupi llapan llaqtakunata purispa tukurqanku, chaymantataq Jerusalenman kutimpurqanku. 9Hinan Joabqa runa yupasqanmanta reyman willarqan, chaymi karqan: Israelmanta pusaq pachak waranqa maqanakuy atiq qharikuna, Judamantataq phisqa pachak waranqa qharikuna. 10Chaymantataq Davidqa llaqtata yupasqanmanta ñakapakuspa Señor Diosta nirqan: –Sinchitan huchallikuni chayta ruwaspa. Rogakuykin, Señor Diosníy, pampachaykuway huchayta, mana yuyayniyoq hinan ruwarqani, nispa. 11Qhepantin tutamanta Davidpa hatarimunanpaqqa Señor Diosqa Davidpa yuyaychaqnin profeta Gadta nirqanña: 12Phaway Davidman, hinaspa nimuy, Señor Diosmi nin: Kinsa muchuchiytan wakichini, kinsantinmanta hukta akllakuy, hinan chaywan muchuchisqayki, nispa. 13Chaymi Gadqa Davidman willaq rispa nirqan: –¿Kay kinsantinmanta mayqentan munanki? ¿Qanchis wata llaqtayki yarqaymanta ñak'arinantachu? ¿Awqaykikuna qatisuqtiyki kinsa killa ayqeytachu? Icha, ¿kinsa p'unchay millay onqoy suyuntinpi kanantachu? Allinta yuyaykuy, niwaytaq kachamuwaqniyman willanaypaq, nispa. 14Chaymi Davidqa profeta Gadta nirqan: –Hatun llaki phutiypin kashani. Chaypas manan runakunaq muchuchisqan kayta munanichu, aswanpas Diospa muchuchiwanantan munani, payqa ancha khuyapayakuqmi, nispa. 15Hinan Señor Diosqa chay kikin paqarmantapacha minchhakaq p'unchaykama millay onqoyta Israel suyuntinman kachamurqan, chaymi Dan llaqtamanta Beerseba llaqtakama qanchis chunka waranqa runakuna wañurqanku. 16Jerusalenta ángel ch'usaqyachiyta munaqtinmi, Señor Diosqa muchusqankumanta llakikuspa llaqta muchuchiq angelta nirqan: –¡Chaykamalla! ¡Amaña muchuchiyñachu! nispa. Kaq ratopachan Señor Diospa angelninqa Jebus runa Araunaq eranpi kapusharqan. 17Davidtaq llaqta muchuchiq angelta rikuspa Señor Diosta nirqan: –¡Ñoqan huchallikuni! ¡Ñoqan mana allintaqa ruwani! ¿Ima huchayoqtaq kay runakunari? Rogakuykin, ñoqata familiaytawan muchuchiwayku, nispa. 18Chay p'unchaytaq Gadqa Davidman rispa nirqan: –Jebus runa Araunaq eranta riy, chaypi Señor Diospaq altarta sayarichimuy, nispa. 19Davidtaq Señor Diospa kamachisqanta kasukurqan Gadpa nisqanman hina. 20Araunataq reyta oficialninkunatawan wasinman hamushaqta rikuspa, phawarispa ñawpaqenpi pampakama k'umuykukurqan. 21Hinaspanmi reyta tapuykurqan: –¿Imallamantaq señor reyníy, kamachiykimanri hamushanki? nispa. Davidtaq kutichirqan: –Eraykita rantikuqmi hamushani, Señor Diospaq altarta sayarichinaypaq kay millay onqoy chinkapunanpaq, nispa. 22Araunataq Davidta nirqan: –Señor reyníy, hayk'an munasqaykita hap'iy haywanaykipaq. Kayqa torokunapas ruphachina sacrificiota haywanaykipaq, saruna k'ullukunapas yugokunapas ruphachinaykipaq. 23Reyníy, llapan chaykunatan qoyki. ¡Ichapaschá Diosniyki Señor Dios chay haywasqaykita chaskisunkiman! nispa. 24Reytaq ichaqa kutichirqan: –Manan yanqallanqa munanichu, aswanpas pagapusqaykin hayk'aña valeqtinpas. ¿Mana qolqeypaq chanin sacrificiotachu Diosniy Señor Diosman haywayman? nispa. Chaymi Davidqa phisqa chunka qolqeta Araunaman pagapurqan eramanta torokunamanta ima. 25Chaymantataq altarta Señor Diospaq sayarichirqan, hinaspa ruphachina sacrificiokunata sumaq kawsay sacrificiokunatawan haywarqan. Chaymi Señor Diospa llaqtanpaq mañakusqanta uyarirqan, hinan millay onqoyqa Israelpi chinkapurqan.

will be added

X\