2 Samuel 23

1Kaykunan Davidpa tukupay rimasqankuna: Isaipa churin Davidmi nirqan, hatunchasqa qharin nirqan, Jacobpa Diosninpa hawisqan, Israelpi misk'i takiq: 2–Señor Diospa Espiritunmi ñoqanta riman, siminkunan simiypi kashan. 3Israelpa Diosninmi nirqan, Israelpa hatun Qaqanmi niwarqan: Pipas runakunata chanin-kaywan kamachiqmi, pipas Diosta manchakuywan kamachiqmi, 4pacha illariy k'anchay hina kashan, tutamanta q'ala cielopi inti k'anchay hina kashan, para thaniyta q'achu llanllariy hina kashan, nispa. 5Aylluyqa chay hinapunin Diospa ñawpaqenpi, paymi ñoqawan wiñaypaq rimanakurqan, allin wakichisqata cheqaqta rimanakurqan. Payqa yanapallawanqapunin, tukuy yuyaykuyniytapas t'ikarichinqan. 6Mana chaninkunan ichaqa wikch'usqa khiska hina, manan pipas makillawan hap'iyta atinmanchu, 7hoqariy munaqqa fierrowan lanza hap'inawanmi hap'in, ninapitaq hukpaqkama ruphaykapun, nispa. 8Kaykunan Davidpa mentasqa soldadonkunaq sutinkuna: Hacmoni llaqtayoq Joseb-basebetmi kinsantin umallikunaq qollanan karqan, paymi huk maqanakuypi pusaq pachak qharikunata lanzanwan wañurqachirqan. 9Kinsantinkumanta iskaykaq Ahoh ayllumanta Dodoq churin Eleazarmi karqan, paymi Davidwan Filistea runakunata pisicharqan, maqanakuypaq huñusqa kashaqtinku. Israel runakuna maqanakuymanta qhepaman kutiriqtinpas, 10payqa kaqpin qheparqan, chaymi Filistea runakunaman phawaykurqan sayk'unankama, espadapas makinman k'askarqan. Haqay p'unchaymi Señor Diosqa allinta atipachirqan. Hinan Israel runakuna kutimurqanku Eleazarman, ichaqa wañusqakuna llat'anaqllaña. 11Kinsakaqtaq Harar llaqtayoq Ageq churin Sama karqan. Filistea runakuna Lehipi huñukuqtinmi, Israel runakunaqa paykunamanta ayqerqanku. Chaypin chakra hunt'a lenteja wiñasharqan, 12Samataq chay chakrapi sayaykuspa Filistea runakunata atiparqan. Ahinapin Señor Diosqa anchata atipachirqan. 13Cosecha tiempopin kinsa chunka umallikunamanta kinsa umallikuna Adulam qaqa wasi qayllapi kashaq Davidman uraykurqanku. Filistea soldadokunataq karpakuspa Refaim wayq'opi kasharqanku. 14Davidqa pukarapin kasharqan, Filistea soldadokuna Belén llaqtapi kashaqtin. 15Hinan Davidqa anchata ch'akichikuspa nirqan: ¡Ayyha, pillapas ukyaykachiwanman Belén llaqta punku p'uytu unuta! nispa. 16Chaymi kinsantin qhari soldadokunaqa Filistea soldadokunata tanqarparispa karpa-karpankuman haykurqorqanku, hinaspa Belén llaqta punku p'uytumanta unuta horqomuspanku Davidman aparqanku. Davidtaq ichaqa mana ukyayta munarqanchu, aswanpas Señor Diospaq ofrendata hina hich'arparirqan, nirqantaq: 17¡Amapuni Señor Diospas munachunchu chayta ukyanayta! Kay qharikunaq yawarnintapas ukyayman hinachá kanman, paykunan wañuyta mana manchakuspa unuta apamuwarqanku, nispa. Chaymi mana ukyayta munarqanchu. Chaytan ruwarqan kinsantin umalli qharikuna. 18Sarviaq churin Joabpa wawqen Abisaitaq kinsa chunka qharikunaq umallin karqan. Paymi huk kutin kinsa pachak soldadokunata lanzanwan wañuchirqan, chaymi paypas kinsa umalli qharikuna hinallataq mentasqa karqan, 19ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqa kaspan, paykunaq umallin kapurqan. 20Cabseel llaqtayoq Joiadaq churin Benaian allin qhari kallarqantaq, paymi musphanakunata ruwarqan. Moabmanta maqanakuypi mentasqa iskay qharikunatan wañuchirqan. Hinallataq huk p'unchay rit'ishaqtin, t'oqoman haykuspa huk leonta wañuchirqan. 21Hatun sayayniyoq Egipto runatapas wañuchillarqantaq. Chay runaqa lanza hap'intinmi kasharqan, Benaiataq k'aspi hap'intin. Hinaspataq Egipto runaq lanzanta qechurqospa chay kikin lanzanwan wañurqachirqan. 22Chaytan ruwarqan Joiadaq churin Benaía, chaymi paypas kinsa umalli qharikunawan kuska mentasqallataq karqan, 23ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqan karqan. Hinan Davidqa waqaychaqnin guardiakunaq umallinta churarqan. 24Joabpa wawqen Asaelpas kinsa chunka qharikunamanta hukninmi karqan. Hinallataq Belén llaqtayoq Dodoq churin Elhanán, 25Harod llaqtayoq Sama, Elicapiwan, 26Pelet llaqtayoq Heles, Tecoa llaqtayoq Iquespa churin Ira, 27Anatot llaqtayoq Abiezer, Husa ayllumanta Melbunai, 28Ahoh llaqtayoq Salmón, Netofa llaqtayoq Maharai, 29Netofa llaqtayoq Baanaq churin Helet, Benjamín ayllumanta Gabaa llaqtayoq Ribaipa churin Itai, 30Piratón llaqtayoq Benaía, Gaas k'aha-k'ahamanta Hidai, 31Arabá qheswamanta Abi-albón, Bahurim llaqtayoq Azmavet, 32Saalbón llaqtayoq Eliaba, Gizón llaqtayoq Jasén, Arar llaqtayoq Samaq churin Jonatán, 33Arar llaqtayoq Sararpa churin Ahiam, 34Maaca llaqtayoq Ahasbaipa churin Elifelet, Giba llaqtayoq Ahitofelpa churin Eliam, 35Carmel llaqtayoq Hezrai, Arab llaqtayoq Paarai, 36Soba llaqtayoq Natanpa churin Igal, Gad ayllu runa Bani, 37Amón suyu runa Selec, Sarviaq churin Joabpa arma apaysiqnin Beerot llaqtayoq Naharai, 38Jatir llaqtayoq Irawan Garebpiwan, 39Het runa Uriaspiwan. Llapankupitaq kinsa chunka qanchisniyoq karqanku.

will be added

X\