2 Samuel 22

1Saulmanta llapan awqankunamantawan Señor Dios qespichiqtinmi, Davidqa kay hinata Señor Diosman takirqan: 2–Señor Diosqa hatun Qaqaymi, hark'aykuwaqniymi, qespichiwaqniymi. 3Diosniyqa pakakunay Qaqan, waqaychawaqniymi. Payqa escudo hina hark'aykuwaqniymi, atiyniyoq qespichiwaqniymi, ancha hatun pakakunaymi, payqa maqanakuylla munaq runamanta qespichiwaqniymi. 4Señor Diosqa yupaychanapaq hinapunin, waqyakuqtiymi awqaykunamanta qespichiwan. 5Wañuymi qocha phoqchiqey hina millp'urqoyta munawarqan, suchuq lloqlla hinan p'ampaykuwarqan. 6Wañuymi sinchita mayt'uykuwarqan, wañuymi seq'onantin maskhawarqan. 7Llaki phutiyniypin Señor Diosta waqyakurqani, Diosniytan waqyakurqani, ch'uya wasinmantan uyarimuwarqan, waqyakusqaytan uyarirqan. 8Señor Diosmi phiñakurqan chaymi kay pachaqa khatatatarqan chhaphchikurqan, chaymi hanaq pachaq teqsinkuna khatatatarqan kuyurirqan. 9Senqanmantan q'osñi lloqsimurqan, siminmantan ruphakuq nina qallumurqan, rawrashaq k'illimsakunan phawamurqan. 10Hanaq pachata kicharqospanmi uraykamurqan, chakinmanmi yanay-yana phuyu phuyuykamurqan. 11Huk querubinpi sillaykukuspan phalamurqan, wayra chawpipin rikuchikurqan. 12Muyuykuqnin tutayaqwanmi pakachikurqan, para yana phuyunwanmi p'istuchikurqan. 13Ñawpaqenpi lliphllikishaq k'anchaymantan rawrashaq k'illimsakuna lloqsimurqan. 14Señor Diosmi hanaq pachamanta q'aqyaqemurqan, Ancha Hatun Diospa kunkanmi uyarikurqan. 15Wach'inankunatan wach'imurqan, awqankunan ch'eqerirqan, manchay lliphllikiyninwanmi ch'usaqyachirqan. 16Señor Dios phiñariqtinmi, sinchitapuni q'aqchaykuqtinmi, lamar-qochaq ukhunraq rikhurimurqan, kay pachaq teqsinraq rikhurimurqan. 17Señor Diosmi hanaqmanta hap'iykamuwarqan, manchay ukhu unumantan horqomuwarqan. 18Atiyniyoq awqaymantan qespichiwarqan, cheqnikuqniykunamantan kacharichiwarqan, paykunaqa ñoqamanta sinchi kallpayoqmi karqanku. 19Llakiq qatisqan kashaqtiymi phawaykamuwarqanku, Señor Diosmi ichaqa hark'aykuwarqan. 20K'iskichaymantan kacharichimuwarqan, munakuwaspanmi qespichiwarqan. 21Señor Diosmi chanin kasqayman hina qhawariwarqan, ch'uya kasqayman hinan saminchawarqan. 22Señor Diospa ñanninpin purirqani, manan Diosniymanta t'aqarikurqanichu huchallikunaypaq. 23Kamachikuy siminkunatan yuyallanipuni, unanchay siminkunatan kasullanipuni. 24Ñawpaqenpiqa pay sonqollapunin karqani, huchallikuymantaqa t'aqakurqanin. 25Chaymi Señor Diosqa chanin kasqayman hina qhawariwarqan, ch'uya kasqayman hina saminchawarqan. 26Señor Diosníy, hunt'aqpaqqa hunt'aqllataqmi kanki, chanin runapaqqa chaninllataqmi kanki, 27ch'uyapaqqa ch'uyallataqmi kanki, millay kawsaqpaqqa yuyaysapan kanki. 28Qanmi huch'uyyaykukuqta qespichinki, uma hoqariqtataq k'umuykachinki. 29Señor Diosníy, qanqa k'anchayniymi kanki, qanmi laqhayayniyta k'anchapuwanki. 30Yanapayniykiwanmi llat'anaqkunaman phawaykuni, kallpaykiwanmi llaqta perqaman seqani. 31Diospa ñanninqa chaninpunin, Señorpa siminqa cheqaqpunin, payqa escudo hinan pakaykukuqninkunapaq. 32Señorllapunin Diosqa, Diosnillanchispunin hatun Qaqaqa. 33Diosmi kallpachawaqniyqa, paymi ñanniyta allichaqqa. 34Paymi tarukata hina phawachiwan, paymi orqokunapi allinta sayachiwan. 35Paymi awqa-tinkuypaq yachachiwan, chaymi bronce p'eqtata chutani. 36Qanmi atipana escudoykita qowanki, llamp'u sonqo kayniykin hatunchawan. 37Purishaqtiymi allinman saruchiwanki, manan chakiyqa llusk'anchu. 38Awqaykunata qatispaymi wañuchirqani, manan kutimunichu tukunaykama. 39Paykunatan sarurqani, ñawpaqeymanmi kumpakamurqanku, manañan sayarimunkuchu. 40Qanmi awqa-tinkuypaq kallpachawarqanki, churanakuwaqniykunatan k'umuykachimuwarqanki. 41Awqaykunatan qayllaymanta qatirirqanki, cheqnipakuwaqniykunatan ñut'urqanki. 42Yanapaykuqpaqmi waqyakurqanku, manataqmi pipas qespichiqninku karqanchu, Señor Diosmanmi waqyakurqanku, paytaq paykunata mana uyarimurqanchu. 43Hallp'ata hinan ñut'uta kutarqani, callekunapi t'uruta hinan sarurqani. 44Ch'aqwa sayarichiq llaqtamantan qespichiwarqanki, suyukunaq umallin kanaypaqmi waqaychawarqanki, mana reqsisqay llaqtakunan serviwanku. 45Wak llaqtayoqkunan qonqorikuwarqanku, ñoqamanta uyarispanku hinan kasukurqanku, 46paykunan pisi kallpayapurqanku, pakakunankumantan khatatataspa lloqsimurqanku. 47¡Señor Diosqa kawsachun! ¡Saminchasqa hatun Qaqayqa kachun! ¡Hatunchasqa atiyniyoq qespichiqniy Diosqa kachun! 48Diosmi ñoqamanta ayni-kutichiqqa, llaqtakunatapas k'umuykachimuwaqniyqa, 49awqaykunamanta horqowaqniyqa. Señor Diosníy, qanmi hatunchawanki contray hatariqkunamanta, maqanakuylla munaq runamantan qespichiwarqanki. 50Chayrayku, Señor Diosníy, suyukuna ukhupin yupaychasqayki, sutiykita hatunchaspan takisaq. 51Qanmi akllakusqayki reyta yanapaspa atipachinki, hawisqayki reytan munakushallankipuni. Davidta miraynintawanmi wiñaypaq khuyakunki, nispa.

will be added

X\