1 Joabmantaq willarqanku Absalonmanta reypa llakikushasqanta waqashasqanta. 2 Hinan chay p'unchay llapan ejercitopaq maqanakuypi atipasqankuqa llakikuyman tukupurqan, paykunan uyarirqanku reyqa churin wañusqanmanta anchata llakikusqanta. 3 Hinan llapan soldadokunapas ch'inlla sumaqllata llaqtaman haykurqanku, maqanakuymanta ayqekamuq p'enqasqa soldadokuna hina. 4 Chaykamataq reyqa umanta hap'iykukuspa, alto kunkawan qaparirqan: ¡Churilláy, churiy Absalón! ¡Absalón churíy! nispa. 5 Hinan Joabqa reypa kasqan wasita haykuspa nirqan: –Kunanmi llapa soldadoykikunata p'enqachispa k'umuykachinki, paykunan kawsayniykita, churiykikunatapas, ususiykikunatapas, warmiykikunatapas, tiyaqmasi warmiykikunatapas kacharichin. 6 Kayta ruwaspaykiqa sut'inchanki cheqnikuqniykikunata munakusqaykitan, munakuqniykikunatataq cheqnikusqaykita. Hinallataq ejercitoykiq umallinkunatapas soldadoykikunatapas mana valeqpaq hina qhawarinki. Llapaykuña wañuykuman karqan chaypas, Absalontaq kawsanman chayqa, kusikuwaqmi karqan. 7 Chhaynaqa sayariy, hawaman lloqsiy, hinaspa sumaqta rimaykuy soldadoykikunata, mana chayqa, Señor Diospa sutinpin jurani manan ch'ulla soldadopas kunan tuta qanwan qhepanqachu. Chaymi wayna kasqaykimantapacha kunankama muchusqaykimantapas aswan mana allinraq kanqa, nispa. 8 Hinan reyqa sayarimuspa llaqta punkupi tiyaykurqan, chayta yachaspataq llapan ejército paypa ñawpaqenman huñukamurqan. Israel runakunaqa wasinkumanmi sapanka ayqekapurqanku. 9 Hinan llapan Israel ayllukunapi ch'aqwarqanku: Rey Davidqa awqanchiskunamanta Filistea runakunamantapas kacharichiwarqanchismi, kunantaq Absalonmanta karuta ayqekapun. 10 Ñoqanchisqa Absalonta rey kananpaqmi aceitewan hawirqanchis, ichaqa maqanakuypin wañupun. Chhaynaqa, ¿imanaqtintaq mana rimarinchischu reypa kutimpunanpaq? nispa. 11 Chayta yachaspataq rey Davidqa sacerdote Sadocman Abiatarmanwan willaqta kacharqan: Judapi kurak runakunata khaynata niychis: ¿Imanaqtintaq hinalla qhepakunkichis, manataq reytaqa wasinman kutichipunkichischu? Israel runakunaqa llapanmi rimarinña reyta kutichipunanpaq. 12 ¿Qankunari yawarniy kashaspachu, qhepallaña kawaqchis? nispa. 13 Amasatapas nillaychistaq: ¿Qanpas manachu yawarnillaytaq kanki? Señor Dios muchuchiwachun kunanmanta hinaneqman ejercitoypa umallinta Joabpa rantinpi mana qanta churaqtiyqa, nispa. 14 Ahinatan Davidqa llapan Judá runakunata uyachirqan, chaymi ch'ulla qhari hinalla reyman willachimurqanku: Kutimpuy llapan runaykikunapiwan, nispa. 15 Hinan reyqa kutipuspa Jordán mayuman chayarqan. Judá runakunataq Gilgal llaqtaman chayarqanku reyta chaskiq mayu pasayta yanapaq ima. 16 Bahurim llaqtayoq Benjamín ayllumanta Gerarpa churin Simeitaq usqhaylla phawarirqan Judá runakunapiwan reyta chaskinankupaq. 17 Riysillarqankutaq Benjamín ayllumanta waranqa qharikuna. Hinallataq Saulpa ayllunpa kamachin Sibapas chunka phisqayoq churintin iskay chunka uywasqankunapiwan Jordán mayu pataman chayarqanku manaraq rey chayashaqtin. 18 Hinaspan reypa kasqan chimpaman pasarqanku reypa familianta mayu pasayta yanapananpaq, hinallataq ima kamachintapas ruwananpaq. Chaymantataq mayuta rey pasarqoqtin, Simeiqa payman qayllaykuspa k'umuykukurqan, 19 hinan reyta nirqan: –Reyníy, pampachaway Jerusalenmanta lloqsimushaqtiyki mana chanin ruwasqayta, ama huchachawayñachu, amañataq chaytaqa yuyariyñachu. 20 Reqsikunin huchayta, chaymi kunan José ayllumanta ñawpaqta hamuni qanta chaskiq, qanqa señorniymi reyniymi kanki, nispa. 21 Sarviaq churin Abisaitaq chayta uyarispa nirqan: –¿Manachu Simeiqa wañunman Señor Diospa akllakusqan reyta ñakasqanmanta? nispa. 22 Davidtaq ichaqa nirqan: –Manan imapas qokusunkichischu qankunamanqa. ¿Imanaqtinmi mana allinta yuyaychawankichis? Ñoqan kunan Israelpi rey kani, chayraykun mana ch'ulla Israel runapas kunanqa wañunmanchu, nispa. 23 Simeimantaq jurarqan: –Manan wañunkichu, nispa. 24 Saulpa nieton Mefibosetpas hamullarqantaq reyta chaskiq. Paymi chakinta mana mayllikurqanchu, sunkhantapas mana k'isukurqanchu, p'achantapas mana t'aqsakurqanchu, reypa lloqsisqan p'unchaymanta Jerusalenman allillan kutipunankama. 25 Jerusalenmanta rey chaskiq hamuqtintaq, reyqa payta nirqan: –¿Imanaqtintaq mana ñoqawanchu rirqanki? nispa. 26 Paytaq kutichirqan: –Señor reyníy, qanqa yachankin wist'u kasqayta, ñoqa kamachiykiqa nirqanin: Asnota caronapuway, sillaykukuspa reywan rinaypaq, nispa, ichaqa kamachiy Siban q'otuwarqan. 27 Paymi ñawpaqeykipi yanqa tumpawan. Qanqa, señor reyníy, Diospa angelnin hinan kanki, chayrayku mayqenchá allin rikch'akusunki chayta ruway. 28 Taytaypa llapa ayllunqa reypa wañuchinanpaqpunin karqan, chaywanpas reyníy, qanmi mesaykipi mikhunaypaq waqyachiwarqanki. Chhaynaqa, ¿ima nispataq niyta atiykiman? nispa. 29 Reytaq nirqan: –¿Imapaqtaq askhata rimasunman? Ñoqaqa yuyaykuni Sibapiwan hallp'ata t'aqanakunaykichistan, nispa. 30 Mefiboset-taq kutichirqan: –Señor reyníy, allillantaq wasiykiman kutipushanki chayqa, llapanta Siba hap'ikapuchun, nispa. 31 Galaad runa Barzilaipas Rogelim llaqtamanta uraykamullarqantaq. Jordán mayuta pasashaqtin reyta puriysinanpaq. 32 Payqa pusaq chunka watayoq yuyaqñan karqan. Mahanaim llaqtapi rey kashaqtinmi, reyman mikhunata qorqan, qhapaq runa kasqanrayku. 33 Hinan reyqa nirqan: –Haku ñoqawan Jerusalenta, chaypi uywakampusqayki, nispa. 34 Barzilaitaq kutichirqan: –Manan unaytañachu kawsayman Jerusalenman rinanchispaqqa. 35 Pusaq chunka watayoqñan kani, manan reparaniñachu allintapas mana allintapas. Manan sumaqtañachu mikhunipas ukyanipas. Takiqkunaq kunkantapas manan uyariniñachu. ¿Imapaqñataq sasa uywanaykipaq riyman? 36 Aswanpas Jordán mayu haqayneqkama puriysisqayki, amaña imatapas qowayñachu. Valekuykin, kutipullasaq llaqtayman tayta-mamay p'ampana qayllapi wañukapunaypaq. 37 Aswanpas, señor reyníy, Quimam churiymi kaypi kashan, pay richun servinasuykipaq, ima munasqaykita payman qoy, nispa. 38 Reytaq nirqan: –Arí, richun ñoqawan Quimam churiyki. Imatachus munasqaykitataq paywan ruwasaq, ima mañakusqaykitapas ruwasaqmi, nispa. 39 Hinan llapan runakuna reyta pusaspa Jordán mayuta chimpachirqanku. Chaypitaq reyqa Barzilaita saminchaspa much'aykurqan, hinan payqa wasinta kutipurqan. 40 Reytaq Gilgal llaqtaman rirqan Quimamwan kuska, hinallataq llapan Judá runakunawan Israel kuskan runakunapiwan. 41 Chaymantataq llapan Israel runakunaqa reyman qayllaykuspa nirqanku: –¿Imanaqtintaq Judamanta wawqeyku qharikunari pakallapi suwaq hina Jordanta pasachimusunki, familiaykita, llapan qanwan kashaqkunatapas? nispa. 42 Chayta uyarispan Judá qharikunaqa kutichirqanku: –Aylluyku rey kaqtinmi chaytaqa ruwayku. Chayri, ¿chaymantachu phiñakunkichis? Manan ñoqaykuqa reypa mikhuchisqanchu kayku, manataq ima regalotapas chaskiykuchu, nispa. 43 Chaymi Israel runakunaqa kutichillarqantaq: –Qankunaqa ch'ulla ayllullan kankichis, ñoqaykutaq chunka ayllu kayku reypa kamachisqan, chayraykun yanapanayku tupawanku. ¿Imanaqtintaq pisichawankichis khaynata? ¿Manachu ñoqayku ñawpaqta rimarirqayku rey kutimunanpaq? nispa. Judamanta qharikunataq ichaqa sinchi phiña simikunawan kutichirqanku.
