2 Samuel 18

1Davidtaq soldadonkunata huñurqan, hinaspan churarqan umallikunata waranqa t'aqa-t'aqaman, pachak t'aqa-t'aqaman. 2Kinsamantaq ejercitonta t'aqarqan, ñawpaqkaq t'aqatan Joab umallirqan, iskaykaqtataq Joabpa wawqen Abisai, kinsakaqtataq Gat llaqtayoq runa Itai, hinan Davidqa ejercitonta nirqan: –Ñoqapas qankunawanmi rillasaqtaq, nispa. 3Paykunataq ichaqa kutichirqanku: –Ama qanqa riychu, ñoqaykuqa ayqesaqkuña chaypas kuskamantaña wañusaqku chaypas, manan imapas paykunaman qokunqachu. Qanqa ñoqaykumanta chunka waranqa hinan valenki, chayrayku llaqtapi qhepakuy yanapaqta kachamuwanaykikupaq, nispa. 4Chaymi reyqa nirqan: –Qankunaq nisqaykichistachá ruwasaq, nispa. Hinaspan payqa llaqta haykuna punkupi sayasharqan, soldadokuna pachak t'aqa-t'aqa, waranqa t'aqa-t'aqa lloqsishaqtinku. 5Hinallataq payqa Joabta, Abisaita, Itaitawan kamachirqan: –Ñoqaraykun Absalón waynataqa sumaqta rikunkichis, nispa. Chaymi llapan ejerciton uyarirqan umallikunata chay hina kamachisqanta. 6Chaymantataq Davidpa soldadonkuna campoman lloqsirqan Israel runakunawan maqanakuq. Hinan Efraín ayllu hallp'a sach'a-sach'api maqanakurqanku. 7Davidpa soldadonkunataq llapa Israel runakunata sinchita atiparqan, hinan chaypi wañurqanku iskay chunka waranqa qharikuna. 8Chay maqanakuymi llapan muyuriqman mast'arikurqan, aswan askhataqmi karqanku sach'a-sach'api wañuqkuna maqanakuypi wañuqkunamantaqa. 9Absalontaq mulanpi sillaykusqa rishaspa, Davidpa soldadonkunawan qonqay tuparqan. Encina sach'a chakinta pasarqoshaqtintaq uma chukchan sach'a k'allmaman hap'irqokurqan. Chaymi Absalonqa sach'api warkurayashaq qhepakurqan, mulataq q'alalla phawarqan. 10Huk runataq chayta rikuspa Joabman willamurqan: –Absalonmi encina sach'api warkurayashan, nispa. 11Joabtaq willaqninman kutichirqan: –Rikushaspari, ¿imanaqtintaq mana wañuchinkichu? Chunka qolqeta huk chumpitawan kusisqa qoykiman karqan, nispa. 12Hinan willaq runaqa nirqan: –Waranqa qolqetaña qowankiman chaypas, manan wañuchiymanchu reypa churintaqa. Uyarishaykun rey kamachisqasuykichista: Absalontaqa aman imanankichispaschu, nispa, nisqanta. 13Chayta mana kasukuspa ruwayman chayqa, rey yacharqoqtinqa manan qan kikiykipas rimaysiwankimanchu, nispa. 14Joabtaq nirqan: –Yanqañachá qanwanqa rimayman, nispa. Hinaspan payqa chanqana kinsa lanzata aparikuspa rirqan, Absalón encina sach'api kawsashallaqtinraq lanzakunawan sonqonpi chanqarqorqan. 15Chaymantataq Joabpa arman apaysiq chunka wayna soldadokunaqa qayllaykuspa Absalonta wañuchipurqanku. 16Hinan Joabqa putututa tocarqan, soldadokunataq manaña Israel runakunata qatirqanñachu, llapankutaq kutipurqanku. 17Absalonpa cuerpontataq sach'a-sach'api t'oqoman wikch'uykurqanku, patanpitaq rumita tawqarqanku. Hinan llapa Israel runakunaqa sapanka wasinkuman ripurqanku. 18Absalonmi kawsashasparaq Reypa Wayq'onpi paymanta yuyarina saywata perqarqan: Manan churiykuna kanchu sutiyta apananpaq, nispa. Chay saywatataq paypa sutinwan suticharqan, chaymi “Absalonmanta Yuyarina Saywa” nisqa sutiyoq kashallanpuni. 19Hinan Sadocpa churin Ahimaasqa Joabta nirqan: –¿Phawaymanchu reyman kay allin willayta willaq: Señor Diosmi awqaykimanta qespichisunki nispa? nispa. 20Joabtaq nirqan: –Manan kunanqa willamuwaqchu paypa churin wañusqanrayku. Kunanqa manan willaq riwaqchu, huk p'unchayña willamunki, nispa. 21Chaywanpas Joabqa huk Etiopía runata nirqan: –Phaway qan, reyman willamunki imachus rikusqaykita, nispa. Chay Etiopía runataq Joabpa ñawpaqenpi k'umuykukurqan, hinaspa phawarirqan. 22Sadocpa churin Ahimaasmi wakmanta Joabta nirqan: –¿Manapunichu imaña hayk'aña kaqtinpas Etiopía runaq qhepanta phawayman? nispa. Joabtaq kutichirqan: –Churilláy, ¿imanaqtintaq phawayta munanki? Manan imatapas qosunkichu kay willasqaykimantaqa, nispa. 23Paytaq kutichirqan: –Manan imananpaschu, rillasaqpuni, nispa. Chaymi Joabqa: –Riypasyá, nirqan. Hinan Ahimaasqa Jordán pampa ñanta phawaspa Etiopía runata llallirqorqan. 24Davidtaq llaqta punkupi tiyasharqan. Llaqta qhawaqtaq llaqta muyuriq perqa punku cheqas pataman seqarqan, qhawarispataq rikurqorqan huk runa phawamushaqta. 25Hinaspan payqa reyman willarqan rikusqanta. Reytaq nirqan: –Huklla hamushan chayqa, allin willaytan apamushan, nispa. Chay runa qayllamushaqtintaq, 26llaqta qhawaqqa rikurqollarqantaq huk runa phawamushaqta, hinaspan punku qhawaqta waqyarqan: –¡Qhawariy, huk runan phawamushallantaq! nispa. Davidtaq nirqan: –Chaypas allin willaytan apamushan, nispa. 27Chay raton llaqta qhawaqqa nillarqantaq: –Ñawpaqkaq phawamuqqa Sadocpa churin Ahimaas kasqallanmi phawaynin, nispa. Hinan reyqa nirqan: –Payqa allin runan, allin willakuytachá apamushan, nispa. 28Ahimaasqa alto kunkawanmi reyta napaykurqan, hinaspan payman qayllaykuspa k'umuykukurqan, nirqantaq: –Diosniyki Señor Dios saminchasqa kachun, qan reyniy contra sayariq runakunata ch'usaqyachisqanmanta, nispa. 29Reytaq tapuykurqan: –¿Allinchu kashan Absalón wayna? nispa. Ahimaastaq kutichirqan: –Etiopía runata ñoqatapas Joab kachamushawaqtinkun, hatun ch'aqway kasharqan, ichaqa manan yachanichu imamanta kasqanta, nispa. 30Hinan reyqa: –Chayneqpi qhepakuy, nirqan. Paytaq chaypi sayaykuspa qhepakurqan. 31Chayllamanmi hukkaq willaq Etiopía runaqa chayarqamuspa nirqan: –Señor reyníy, allin willaytan apamushayki, kunanmi Señor Diosqa contraykipi sayarimuq llapan awqaykimanta qespichisunki, nispa. 32Hinan reyqa tapuykullarqantaq: –¿Allinchu kashan Absalón wayna? nispa. Etiopía runataq kutichirqan: –Chay wayna hina kachun rey contra llapa sayariqkunaqa, nispa. 33Chaymi reyqa ukhu sonqonmanta llakikurqan, punku patapi kashaq wasiman rispataq anchata waqarqan, anchirqan: ¡Churilláy, churiy Absalón! ¡Absalón churíy! Ñoqa aswan wañuyman qan wañunaykimantaqa. ¡Churilláy, churi Absalón! nispa.

will be added

X\