2 Samuel 17

1Ahitofelmi Absalonta nirqan: –¿Akllarqoymanchu chunka iskayniyoq waranqa qharikunata Davidta kunan tutapacha qatinaypaq? 2Pay sayk'usqa pisi kallpa kashaqtintaq, phawaykuspa qonqay llaksachisaq. Paywan kashaq runakuna ayqeqtintaq, pay sapallanta wañurqachisaq. 3Hinaspan llapan runata qanman kutichimusaq, imaynan Davidta llapa runa qatikurqanku hinata. Qanqa huk runaq kawsaynillantan maskhashanki, runakunapaqqa manan ima llakipas kanqachu, nispa. 4Absalonmanpas Israelpi kurak runakunamanpas kay yuyaychayqa allinmi rikch'akurqan. 5Chaywanpas Absalonqa nirqanmi: –Arqui runa Husaita waqyallasuntaq, ima ninqachá paypas, nispa. 6Hamuqtintaq Absalonqa Ahitofelpa yuyaychasqanta willaspa tapurqan: –¿Ruwasunmanchu nisqanta hina? Qanrí, ¿ima ninkitaq? nispa. 7Hinan Husaiqa kutichirqan: –Kunan kutiqa manan allinchu Ahitofelpa yuyaychasqan. 8Yachankin taytaykipas llapa runankunapas allin qharikuna kasqanta, sinchi phiñasqataqchá kashanpas wawan qechusqa ukumari hinaraq. Payqa maqanakuypipas allin yachaysapan, manan puñunmanchu runankunawan. 9Taytaykiqa kunan ratopas qaqa wasipichus icha may cheqaspichus pakakushan. Maqanakuy qallariypi wakin runakuna wañuqtinku, chayta uyariqkunaqa ninqachá: Absalonta qatikuq runakunan atipasqa, nispa. 10Hinataq runaykikunamanta aswan qhari kaqkunapas, rawrashaq sonqoyoq kashaspapas, llaksakapunqaku, llapa Israel runakunan yachan taytaykipas paywan kashaq qharikunapas allin qhari kasqankuta. 11Chayrayku, ñoqa yuyaychasqayki kay hinata: Llapan Israelta Dan llaqtamanta Beerseba llaqtakama huñukamunanpaq kamachiy. Hinataq qan kikiyki maqanakuyman rispayki lamar-qocha patapi aqo hina ati-musphay runakunata umallinki. 12Hinan Davidman maypiña kaqtinpas aypasunchis, mana reparakushasqan usqhaylla phawaykusunchis, paypas runankunapas manataq hukpas kawsanqachu. 13David may llaqtamanpas pakakunman chayqa, Israel runakuna rakhu waskhata apamunqaku, chaywan perqata wasikunatapas chutaspa wayq'oman thuniykusunchis, manataq huk rumillapas qhepanqachu, nispa. 14Ahitofelpa chay allin yuyaychasqantaqa Señor Diosmi mana munarqanchu, aswanpas Absalonpaq mana allintan munarqan. Chayraykun Absalonpas llapan Israel runakunapas nirqanku: –Arqui runa Husaipa yuyaychasqanmi aswan allin Ahitofelpamantaqa, nispa. 15Husaitaq sacerdote Sadocmanwan Abiatarmanwan willarqan Ahitofelpa Absalonman kurak runakunamanwan yuyaychasqanta, hinallataq paypa yuyaychasqantapas. 16Nirqantaq: –Usqhaylla Davidman willachiy ch'inneqpi mayu pasanapi ama qhepakunanpaq, aswanpas kaq rato Jordán mayuta pasananpaq, mana chayqa reypas llapan paywan kaqkunapas wañuchisqan kankuman, nispa. 17Jonatanwan Ahimaaswantaq Rogel p'uytu qayllapi kasharqanku, hinan huk warmi kamachi willaq rirqan paykuna llaqtaman mana sut'ita haykuyta atisqankurayku. Chaymi paykunaqa rey Davidman willaq rirqanku. 18Ichaqa paykunatan huk wayna rikurqospa Absalonman willarqamurqan. Chaykamataq usqhaylla iskayninku pasarqanku, hinaspa Bahurim llaqtachapi huk runaq wasinman chayarqanku. Pationpi p'uytu karqan, hinan chayman winakurqanku. 19Wasiyoq warmitaq p'uytu pataman llikllata mast'aykurqan, chaymantaq trigo ruruta masarqan, mana reparakunanpaq. 20Absalonpa oficialninkunataq chay warmiq wasinta chayaspa tapurqanku: –¿Maymi Jonatán Ahimaaspiwan? nispa. Warmitaq kutichirqan: –Mayutan pasarqonkuña, nispa. Hinan paykunaqa maskhamurqanku, mana tarispataq Jerusalenman kutipurqanku. 21Qhepankutataq waynakuna p'uytumanta lloqsispa Davidman willaq rirqanku. Chayaspataq Ahitofelpa pay contra yuyaychasqanta willaspa nirqan: –Usqhaylla Jordán mayuta pasarqoy, nispa. 22Hinan Davidqa paywan kashaqkunapiwan puririrqanku manaraq pacha illarimushaqtin, llapankun Jordán mayuta pasarqanku, manan hukllapas qheparqanchu. 23Absalón mana yuyaychasqanta kasuqtintaq, Ahitofelqa asnonta caronaspa sillaykukuspa llaqtanta wasinman ripurqan. Imankunatapas wasinpi allinta allichaykuspataq seq'orqokurqan, ahinapin wañupurqan. Ayantataq taytan p'ampasqankuman p'ampapurqanku. 24Davidqa Mahanaim llaqtamanmi chayarqan, Absalón llapa Israel runakunantin Jordán mayuta pasamushanankama. 25Absalonqa Amasatan churarqanña ejerciton umallita Joabpa rantinpi. Amasaq taytanqa Ismael runa Itranmi karqan, mamantaq Joabpa maman Sarviaq ñañan Nahaspa ususin Abigail karqan. 26Absalontaq Israel runakunapiwan Galaad hap'iyman pasarqospa chaypi karpakurqanku. 27Mahanaim llaqtaman David chayaqtinmi, Rabá llaqtayoq Amón runa Nahaspa churin Sobi, Lodebar llaqtayoq Amielpa churin Maquir, Rogelim llaqtayoq Galaad runa Barzilaipiwan payman hamurqanku. 28Apamurqankutaq puñuna p'achata, p'ukukunata, mankakunata, trigota, cebadata, hak'uta, hank'ata, chaqalluta, lentejata, 29miel misk'ita, lluklluta, ovejakunata, quesokunata ima, Davidman llapa runanmanwan mikhuchinankupaq: Ch'inneqpin paykunaqa yarqayta, ch'akiyta, sayk'uyta ima muchumunku, nispanku.

will be added

X\