2 Samuel 16

1Orqo patamanta haqayneqman David puririqtintaq, Mefibosetpa kamachin Siba Davidwan tuparqan, carona patapi cargayoq iskay asno qatiykusqa. Chaypin aparqan iskay pachak t'antata, pachak k'umpa pasasta, pachak k'umpa higosta, huk qara p'uyñu vinotawan. 2Hinan reyqa Sibata tapurqan: –¿Imapaqmi kaykuna? nispa. Paytaq kutichirqan: –Asnokunaqa reypa familian sillakunanpaqmi, t'antataq k'umpakunapiwan runakunaq mikhunanpaq, vinotaq ch'inneqpi sayk'usqakunaq ukyananpaq, nispa. 3Tapuykullarqantaq reyqa: –¿Maypitaq patronniykiq nietonqa kashan? nispa. Sibataq kutichirqan: –Jerusalenpin qhepakamun, kunanqa Israel runakunan Saúl abueloypa suyunta kutichipuwanqa, nispa. 4Hinan reyqa nirqan: –Mefibosetpa tukuy kaqninkunan qanpaq kanqa, nispa. Sibataq k'umuykukuspa nirqan: –Señor reyníy, hatunmi sonqoy kusichiyllatapunin munashayki, nispa. 5Bahurim llaqtachaman rey David chayashaqtintaq, Saulpa ayllunmanta huk qhari lloqsimurqan. Paymi Geraq churin karqan Simei sutiyoq, risharqantaq reyta ñakaspa, 6rumiwan payta llapa oficialninkunatapas chanqaspa, reypa pañanpi lloq'enpi rishaq llapa runakunatapas soldadokunatapas mana kasuspa. 7Reyta ñakaspan nirqan: –¡Yaw, lloqsiy! ¡Ripuy! ¡Runa wañuchiq! ¡Mana chanin qhari! 8¡Qanqa Saulpa suyuntan qechurqanki ayllunkunatapas wañuchispa, chaymi Señor Diosqa kunan muchuchisunki! ¡Qantaq pasaqta urmanki runa wañuchiq kasqaykimanta! nispa. 9Chaymi Sarviaq churin Abisaiqa reyta nirqan: –¿Imaynan haqay wañunayaq alqo kaykunata nisunkiman? Chimparqospa umanta qhorurqamusaq, nispa. 10Reytaq kutichirqan: –¡Manan imapas qankunaman chayasunkichischu! Señor Diospunipas kamachin khaynata ñakawananpaq chayri, pitaq: ¿Imapaqmi kayta ruwashanki, ninman? nispa. 11Abisaita llapan oficialninkunatapas nillarqantaq: –Churiy kikinpas wañuchiyta munawan chayqa, ¡imaynataraqchá Saulpa ayllun runaqa! Hina rimashachun, Señor Dios kamachin chayqa. 12Ichapas Señor Diosqa llakikuyniyta rikuspa khuyapayawanman, hinaspa samiman kay ñakayta tukuchinman, nispa. 13Davidqa oficialninkunapiwanmi rishallarqanpuni ñanninta, Simeipas wayq'o chimpanta rishallarqantaq ñakamuspa, rumiwan chanqaspa, hallp'awan hach'ipakuspa ima. 14Hinan reypas llapan runakunapas Jordán mayuman sinchi sayk'usqa chayarqanku, chaypitaq samarqanku. 15Absalontaq Ahitofelpiwan llapa Israel qharikunapiwan Jerusalenman haykurqanku. 16Hinataq Davidpa amigon Arqui runa Husaiqa Absalón napaykuq rispa nirqan: –¡Kawsachun rey! ¡Kawsachun rey! nispa. 17Absalontaq payta nirqan: –¿Imaynataq David amigoykitari saqerparinki? ¿Imanaqtintaq mana paywan ripunkichu? nispa. 18Husaitaq kutichirqan: –Manan riymanchu, aswanpas pitachus akllan Señor Diospas, llapa runakunapas, chaywanmi ñoqaqa qhepakusaq, paytataq servisaqpas. 19¿Pitataq astawanqa serviyman, reypa churin qan kashaqtiyki? Imaynan taytaykita servirqani, ahinallataqmi qantapas servisqayki, nispa. 20Chaymantataq Absalonqa Ahitofelta nirqan: –Yuyaychaway, ¿imatan kunan ruwasunman? nispa. 21Ahitofeltaq nirqan: –Taytaykiq wasi qhawaq saqesqan tiyaqmasin warmikunawan puñukuy. Hinan llapa Israel yachanqa taytaykiwan sinchi phiñanasqa kasqaykita, runaykikunapas astawantaq kallpachakunqaku, nispa. 22Chaymi wasi patapi karpata karpapurqanku, hinan Absalonqa chaypi taytanpa tiyaqmasin warmikunawan llapa runaq rikushasqan puñukurqan. 23Ahitofelpa yuyaychasqantan chay p'unchaykunapiqa Diospa siminta hina chaskirqanku, chaymi Davidpas Absalonpas nisqanta hina ruwarqanku.

will be added

X\