2 Samuel 15

1Chaymantataq Absalonqa wakichikurqan huk carretata caballokunatawan, phisqa chunka qharikunatataq ñawpaqenta phawananpaq. 2Tutallamanta hatarispataq Absalonqa llaqta punkuman sapa p'unchay suyaq rirqan. Pleitoyoqkuna chaninchasqa kananpaq reyman hamuqtintaq, payqa waqyarispa tapuykurqan: –¿Mayqen llaqtamantan kanki? nispa. Israelpa huknin ayllunmantan kani, niqtintaq, 3Absalonqa nirqan: –Mañakusqaykiqa allinmi chaninmi, ichaqa manan pipas kanchu reypa churasqan uyarinasuykipaq. 4¡Ñoqalla kay suyupi juez kayman, llapan pleitoyoq runakunapaq chaninchapuyman! nispa. 5Hinallataq payman qayllaykuspa napaykuqninkunata Absalonqa makinta haywarispa oqllaykurqan, hinaspa much'aykurqan. 6Ahinatan chaninchasqa kananpaq reyman hamuq sapanka Israel runata ruwarqan, chhaynapin runakunaq sonqonta suwarqan. 7Tawa watamantañataq Absalonqa reyta nirqan: –Valekuykin Hebrón llaqta rinaypaq Señor Diosman prometekusqayta hunt'aq. 8Aram suyu Gesur llaqtapi kashaspan prometekurqani: Jerusalenman Señor Dios kutichiwanqa chayqa, payta yupaychasaq, nispa. 9Hinan reyqa: –Allinmi, sumaqllaña rirqoy, nirqan. Chaymi Absalonqa Hebrón llaqtaman rirqan. 10Ichaqa llapan Israel ayllukunamanmi willaqkunata kacharqan: Pututu tocaqta uyarispaykichisqa: ¡Absalonmi Hebronpi rey! nispa, qaparinkichis, ninankupaq. 11Absalonmi Jerusalenmanta lloqsirqan iskay pachak invitasqan qharikunapiwan, paykunan riysirqan yuyaykusqanta mana yachaspa. 12Sacrificiota haywashaspataq Absalonqa taytanpa yuyaychaqnin Gilo llaqtayoq Ahitofelta waqyachimurqan. David contra rimanakusqankuqa aswan-aswanmi yapakurqan, astawantaq Absalonta qatikuq runakunapas askhayarqan. 13Hinan Davidman huk willakuq hamurqan: –Llapa Israel runakunan Absalonta qatikun, nispa. 14Chaymi Davidqa Jerusalenpi llapa oficialninkunata nirqan: –¡Haku, ayqekusun, manan Absalontaqa atipasunmanchu! ¡Usqhaylla lloqsisun! Qonqaymi ayparqowasunman, hinaspan atipasqa rikukusunman, llapa runataq wañuchisqa kanman, nispa. 15Paykunataq nirqanku: –Ñoqaykuqa liston kashayku, señor reyniyku, imata kamachikuqtiykipas ruwanaykupaq, nispa. 16Hinan reyqa llapan familianpiwan lloqsirqan, tiyaqmasin chunka warmikunallatan saqerqan rey tiyana wasita qhawashanankupaq. 17Reytaq pay qatikuq llapa runakunapiwan lloqsispaña, llaqta tukukuy wasipi suyarqan. 18Hinan reypa ñawpaqenman pasarqan oficialninkuna, reypa guardian Ceret runa Pelet runa ima, Davidwan Gatmanta hamuq llapan soqta pachak Get llaqtayoq runakunapas. 19Chaymi Davidqa Gat llaqtayoq Itaita nirqan: –¿Qanpas rillawaqtaqchu? Ama riychu, kutipuy, hinaspa qhepakuy mosoq reywan, qanqa karu llaqtayoqmi kanki, llaqtaykimanta wikch'usqa. 20Manan unayraqchu kaypi kasqayki, ¿imaynataq ñoqa pusarikullaykimantaq? Ñoqaqa manan yachanichu mayman rinaytapas. Kutipuy wawqeykikunapiwan, Señor Diosmi khuyapayaspa waqaychasunki, nispa. 21Hinan Itaiqa kutichirqan: –Señor reyníy, Señor Diospa sutinpin jurani, qanwanmi risaq maymanña riqtiykipas, kuskan wañusunpas kawsasunpas, nispa. 22Davidtaq Itaita nirqan: –Chhaynaqa, allinmi, haku risunchis, nispa. Hinan Itaiqa llapan qharikunapiwan familiantinkama rirqanku. 23Llaqtapi qhepaq runakunataq reyta runakunatawan ripuqta rikuspa kunkayoqta waqarqanku. Davidtaq Cedrón mayuta pasaspa, llapan runakunapiwan ch'inneqman rirqan. 24Hinallataq sacerdote Sadocpas Diospa rimanakuynin arca apaq Leví runakunapiwan rirqanku, hinaspan Abiatarpa qayllanman churaykurqanku llaqtamanta llapanku lloqsimunankama. 25Reytaq ichaqa Sadocta nirqan: –Diospa arcanta llaqtaman kutichipuy. Señor Dios khuyakuwaspa munaqtinqa, kutimuspaymi rikusaqraq arcata maypichus kasqan cheqastawan. 26Manataqchus khuyakuwan chayqa, munayninta ñoqawan ruwachun, nispa. 27Nillarqantaq Davidqa sacerdote Sadocta: –¿Manachu reparanki? Kutipullay Jerusalenman ama llakikuspa, churiyki Ahimaaspiwan, Abiatarpa churin Jonatanpiwan. 28Ñoqaqa ch'inneqpi mayu pasana cheqaspin qhepakusaqraq imachus kasqanta willamuwanaykichiskama, nispa. 29Hinan Sadocqa Abiatarpiwan Diospa arcanta Jerusalenman kutichipurqan, chaypitaq qhepakapurqanku. 30Davidtaq Olivos orqota q'ala chakilla waqaspa wicharqan, umanta pakaykukuspa. Kaqllatataq paywan riqkunapas ruwarqanku. 31Ahitofelpa pay contra Absalonwan yuyaykushasqanta yachaspan Davidqa nirqan: –Ahitofelpa tukuy yuyaychasqanta Señor Dios tutayachichun, nispa. 32Orqo patapi Dios yupaychana cheqasman David chayaqtintaq, Arqui runa Husaiqa paywan tupaq rirqan, p'achanpas llik'i-llik'i, umanpas hallp'akama. 33Hinan Davidqa nirqan: –Ñoqawan rispaqa hark'awankimanchá usqhaylla purinayta, 34aswanpas llaqtaman kutipuspayki Absalonta ninki: Reyníy, ñoqa kamachiyki kasaq, imaynan taytaykitapas servirqani, ahinallataq servisqayki, nispa. Ahinapi Ahitofelpa yuyaychasqanta waqllichinki ñoqaq allinniypaq. 35Sacerdote Sadocpas Abiatarpas chaypin qanwan kanqaku, chayrayku rey tiyana wasipi llapa uyarisqaykita paykunaman willanki. 36Chaypin kashanku Sadocpa churin Ahimaaspas, hinallataq Abiatarpa churin Jonatanpas, paykunawan willachimuwanki tukuy uyarisqaykita, nispa. 37Absalón Jerusalén llaqtaman haykuqtinmi, Davidpa amigon Husaiqa chayallarqantaq.

will be added

X\