2 Samuel 13

1Davidpa churin Absalonpa pananmi sumaq rikch'ayniyoq karqan Tamar sutiyoq. Davidpa hukkaq churin Amnonmi payta sinchita munapayarqan, 2chaypi yuyaspan onqorqanraq. Tamarqa doncella sipasllaraqmi karqan, chaymi Amnonpaq sasa karqan, manataq ima ruwaytapas atirqanchu. 3Amnonpa amigonmi Davidpa wawqen Simeaq churin Jonadab karqan. Paymi kusa yachaysapa karqan, 4nirqantaq: –Qanqa reypa churinmi kanki, ¿imanaqtintaq p'unchaymanta-p'unchay uyaykipas p'aki-p'aki kashan? Willaykuway, nispa. Hinan Amnonqa nirqan: –Wawqey Absalonpa panan Tamartan munakushani, nispa. 5Jonadabtaq nirqan: –Puñunaykiman suchuykuy hinaspa onqosqaman tukuy, taytayki watukuq hamusuqtiykitaq, ninki: Tamar panayta kacharimuway, hinaspa rikushasqaypuni mikhunata wayk'upuwachun, pay kikintaq haywariwachun, nispa. 6Hinan Amnonqa puñunapi onqoq tukurqan, watukuq rey hamuqtintaq nirqan: –Valekuykin Tamar panayta kachamuwanaykita, iskay tortata rikushasqay ruwapuwananpaq, hinaspataq pay kikin haywariwananpaq, nispa. 7Davidtaq Tamarta wasinman kacharqan: –Phaway Amnón turaykiq wasinta, mikhunata wayk'umpuy, nispa. 8Chaymi Tamarqa Amnón turanpa wasinta rirqan, paytaq puñunapi siriykusqa kasharqan. Hinan Tamarqa hak'umanta q'apispa, turanpa rikushasqan tortata ruwaspa sartenpi chayachirqan. 9Chaymantataq chayachisqan tortata horqomuspa payman haywarqan, Amnontaq ichaqa mana mikhuyta munarqanchu, aswanpas llapan chaypi kashaqkunata nirqan: –Lloqsiychis hawaman, nispa. Hinan llapanku lloqsirqanku. 10Tamartataq nirqan: –Puñuna wasiman mikhunata apamuy, makiykimanta mikhunaypaq, nispa. Hinan Tamarqa tortata Amnonman puñunan wasiman aparqan. 11Mikhunantin qayllaykuqtintaq Amnonqa payta hap'ispa nirqan: –Hamuy puñukusunchis, panáy, nispa. 12Paytaq kutichirqan: –¡Manan, turáy! ¡Ama violawaychu! Israelpiqa manan khayna ruwanachu. ¡Ama kay qhelli huchata ruwaychu! 13¿Maytan riyman p'enqayman churawaqtiyki? Qanpas Israelpi khuchi runamanta qhawasqachá kawaq. Aswanpas kunanpacha reyta niy casarakunanchispaq, payqa: Manan hark'akuwanqachu. 14Amnontaq ichaqa nisqanta mana kasurqanchu, aswanpas hukpaqkama hap'ispa violarqan. 15Chaymantataq Amnonqa Tamarta sinchita cheqnikurqan, payqa ñawpaqta anchata munakurqan, qhepatataq astawanraq cheqnikurqan, hinaspan nirqan: –Lloqsiy kaymanta, nispa. 16Tamartaq kutichirqan: –Manan atikunchu turáy, kay mana allinta ruwaspa wikch'uwankiman chayqa, aswan mana allinchá kanman, nispa. Amnontaq ichaqa chaytapas mana kasullarqantaqchu, 17aswanpas kamachinta waqyaspa nirqan: –Qarqoy hawaman kay warmita, hinaspa punkuta wisq'ay, manan rikuyta munanichu, nispa. 18Kamachintaq Tamarta hawaman qarqospa punkuta wisq'arqan. Tamarqa sumaq qoysu p'achawan p'achasqan karqan, reypa doncella ususin hinapuni. 19Payqa usphawan umanta hach'ikuspan, p'achanta llik'ikurqan, umanta hap'iykukuspataq qaparikuspa ripurqan. 20Absalón turantaq nirqan: –¿Chay Amnón turaykichu violasunki? Hina kachun, upallakuy panáy, payqa turaykin riki, ama sinchita llakikuychu, nispa. Chaymi payqa Absalón turanpa wasinpi sinchi llakisqa qhepakapurqan. 21Davidqa lliw chaykunata yachaspan sinchita phiñakurqan, ichaqa manan k'amirqanchu munasqa phiwi churin kaqtin. 22Absalontaq mana imatapas Amnonta nirqanchu, sonqollanpin ichaqa cheqnikusharqan Tamar pananta violasqanmanta. 23Iskay watamantataq Absalonqa Efraín ayllu hallp'a qorpa qaylla Baal-hazor orqopi ovejankunata rutuchirqan, reypa llapa churinkunatataq mikhunankupaq waqyachirqan. 24Reyman rispataq nirqan: –Ovejaykunatan rutuchikushani, hakuyá oficialniykikunapiwan, nispa. 25Reytaq ichaqa nirqan: –Manan, churíy, llapaykuqa riykumanchu, askha gaston kasunkiman, nispa. Anchatapuni Absalonqa rimapayaqtinpas manapunin riyta munarqanchu, aswanmi saminchaykurqan. 26Chaymantataq Absalonqa nirqan: –Chhaynaqa, valekuykin Amnón wawqeywan rinaykupaq, nispa. Reytaq kutichirqan: –¿Imanaqtintaq paypas rinman? nispa. 27Sinchita rimapayaqtintaq reyqa nirqan: –Richunpasyá Amnonqa wawqeykikunapiwan, nispa. Absalontaq reypaq hina hatun mikhuyta wayk'uchispanña 28kamachinkunata nirqan: –Amnón machasqaña kashaqtin, nisqaykichis: “¡Hap'iychis Amnonta!” nispa, hinan qankuna wañuchinkichis. Ama manchakuychischu, ñoqan kamachishaykichis. ¡Kallpachakuychis, qhari kaychis! nispa. 29Absalonpa kamachinkunataq nisqanta hina Amnonta ruwarqan, chaymi llapa reypa churinkunaqa sapanka mulankupi sillarqokuspa ayqepurqanku. 30Paykuna ñanpi kashaqtillanraq, Davidqa uyarirqan: Absalonmi reypa llapan churinkunata wañurqachin, manan hukpas kawsanchu, nisqata. 31Chaymi rey Davidqa sayarispa p'achanta llik'ikurqan, hallp'a pampapitaq wikch'ukurqan, paywan kashaq oficialninkunapas p'achankuta llik'ikullarqankutaq, ichaqa sayashallarqankun. 32Davidpa wawqen Simeaq churin Jonadabtaq hamuspa nirqan: –Señor reyníy, ama yuyaychu llapan churiykikuna wañusqantaqa. Manan hinachu, Amnonllan wañun, Tamar pananta violasqan p'unchaymantapachan paytaqa Absalón wañuchiyta yuyaykurqan. 33Chhaynaqa, ama kasuychu, reyníy: Llapa churiykikunan wañurqapun, nisqataqa, nispa. 34Absalón ayqeshanankamataq, llaqta qhawaq waynaqa orqota qhawarispa, Horonaim llaqtamanta hamuq ñanta askha runa uraykamushaqta rikurqorqan, kaq ratotaq reyman willamurqan: Horonaimmanta orqonta hamuq ñantan askha uraykamushanku, nispa. 35Jonadabtaq reyta nirqan: –¡Chayqa churiykikunan hamushan, nisqayman hina! nispa. 36Chayta rimayta tukuqtin hinataq, reypa churinkunaqa haykurqan anchata waqaspa anchispa, hinan reypas llapa oficialninkunapas sinchita waqarqanku. 37Absalontaq ayqekurqan Gesur llaqta rey Amiudpa churin Talmaipa wasinpi pakakuq, chaypin kinsa wata kamurqan. 38Davidtaq unayta churinmanta llakikurqan, 39ichaqa Amnón wañusqanmanta sonqochakuspañan, Absalonwan tupaykuyta munarqan.

will be added

X\