2 Samuel 12

1Señor Diosmi profeta Natanta Davidman kacharqan. Wasinman haykuspataq Natanqa reyta nirqan: –Huk llaqtapin iskay runakuna karqan, huknin wakcha, huknintaq qhapaq. 2Qhapaq runaqqa askhan ovejanpas wakanpas karqan. 3Wakcha runaqmi ichaqa huk rantikusqan oveja chitallan kapurqan. Chaytan munasqata uywakurqan, wawankunatawan kuska wiñachirqan, mikhunanmanta mikhuchispa, jarronmanta ukyachispa, qhasqonpi puñuchispa. Munakurqanmi ususinta hina. 4Huk p'unchaymi qhapaq runaman qorpachakuq chayarqan, hinan qhapaq runaqa ovejankunamanta wakankunamanta mana nak'ayta munarqanchu, aswanpas wakcha runaq ovejachanta suwarqospa nak'arqan qorpachakuqman haywarinanpaq, nispa. 5Chayta uyarispataq Davidqa qhapaq runapaq sinchita phiñakuspa Natanta nirqan: –¡Señor Diospa sutinpin jurani chay hina ruwaq runaqa wañuchisqan kanan! 6Tawa ovejatataq pagapunan, mana khuyapayaspa chay hina ruwasqanmanta, nispa. 7Hinan Natanqa nirqan: –¡Qanmi kanki chay runaqa! Israelpa Diosnin Señormi nin: Ñoqan Saulmanta qespichispa aceitewan hawirqayki Israelpi rey kanaykipaq. 8Wiraqochayki Saulpa wasinta warminkunatapas munaychakunaykipaq qorqayki, hinallataq Judatapas Israeltapas kamachinaykipaq hap'ichirqayki. Chaykuna pisi kaqtinqa astawanraqmi yapaykiman karqan. 9¿Imanaqtintaq simiyta pisichaspa chay mana chaninta ruwarqanki? Qanmi Het runa Uriastaqa Amón runakunawan sipichirqanki, warmintapas warmichakurqanki. 10Chayraykun aylluykipi qonqaylla sipisqakunaqa kallanqapuni, Uriaspa warminta warmichakuspayki ñoqata pisichawasqaykirayku. 11Kikin aylluykimantan qanpaq mana allinta hatarichisaq, ñawpaqeykipin warmiykikunata huk qhari masiykiman qosaq, paykunawantaq puñunqa lliw runaq rikushasqan. 12Qanqa mana piqpa yachasqanmi chayta ruwarqanki, ñoqataq ichaqa llapa Israelpa rikusqan sut'i p'unchaypi kay nisqayta hunt'asaq, nispa. 13Hinan Davidqa Natanta nirqan: –¡Señor Dios contran huchallikuni! nispa. Natantaq nirqan: –Huchaykikunatan Señor Dios pampachasunki, manan wañunkichu. 14Señor Diosta sinchita pisichasqaykiraykun ichaqa naceq wawayki wañunqa, nispa. 15Chaykunata nispataq Natanqa wasinta kutipurqan. Señor Diostaqmi Uriaspa warmin Davidpaq wachakusqan wawata sinchi mana allinta onqochirqan. 16Hinan Davidqa Diosmanta wawapaq mañakurqan, ayunarqantaq. Wasinman kutimpuspataq pampapi puñurqan. 17Chaymi kurak oficialninkuna sayarichiq rirqanku, Davidtaq mana kasukurqanchu, manallataq paykunawan mikhuytapas munarqanchu. 18Qanchis p'unchay qhepatataq wawaqa wañupurqan, hinan oficialninkunaqa anchata manchakurqanku wawaq wañupusqanta Davidman willayta. Ninakurqankutaq: Wawa kawsashaqtinraq rimapayasqanchista mana uyariwarqanchischu, nitaq kasuwarqanchischu. Wawan wañupun, nisunman chayqa, ¡imataraqchá ruwanman! nispa. 19Davidtaq chay chhiwchinakusqankuta uyaripakuspa, wawaq wañupusqanta repararqan, chaymi tapuykurqan: –¿Wañupunchu wawa? nispa. Paykunataq: –Wañupunmi, nirqanku. 20Chaymi Davidqa pampamanta sayarispa bañakurqan, q'apaq hawinawan hawikurqan, limpio p'achawantaq churakurqan, hinaspan Señor Diospa wasinta yupaychaq rirqan. Chaymanta wasinta kutipuspataq mikhunata mañakuspa mikhurqan. 21Chaymi oficialninkunaqa nirqanku: –¿Imataq kay ruwasqaykiri? Wawayki kawsashaqtinmi waqarqanki ayunarqanki, kunantaq wañupuqtin hatarispayki mikhupushanki, nispa. 22Paytaq kutichirqan: –Kawsashaqtinqa waqarqani ayunarqani, icha Dios ñoqata khuyapayawaspa wawata kawsachinman, nispaymi. 23Kunanqa wañupun chayqa, ¿imapaqñataq ayunayman? ¿Kawsarichiyta atiymanchu? Manan payqa ñoqaman kutimunmanñachu, aswanpas ñoqan payman ripusaq, nispa. 24Chay qhepatataq Davidqa warmin Betsabeta sonqocharqan, hinaspan paywan puñurqan. Betsabetaq wiksallikuspa qhari wawata wachakurqan, Salomontataq suticharqanku. Señor Diosqa chay wawata munakurqanmi, 25chayraykun payqa profeta Natanwan Davidman willachirqan Jedidiasta sutichanankupaq. 26Joabmi Rabá llaqtapi Amón runakunawan maqanakurqan, hinaspan reypa tiyanan pukarata munaychakurqan. 27Chaymi payqa Davidman willachimurqan: Rabá llaqtata muyuykuspan llaqtaq ukyanan pukyuta hap'ishani. 28Chhaynaqa, chaypi kashaq qharikunata huñuy, hinaspa hamuy kay llaqtata hap'ikapunaykipaq, mana chayqa, ñoqan haykusaq, hinan sutiywan llaqtata sutichanqaku, nispa. 29Chaymi Davidqa llapa qharikunata huñurqospa Rabá llaqta contra maqanakuq rirqan, atipaspataq llaqtata hap'ikapurqan. 30Hinaspa Amón runakunaq diosnin Milcommanta sumaq umiña rumiyoq qori coronata qechurqan, chay coronan pesarqan kinsa chunka kinsayoq kilo hina, Davidpa umanmantaq churarqanku. Hinallataq askha llat'anasqakunata llaqtamanta aparqan. 31Chay llaqta runakunatataq campoman horqospa, llank'achirqan sierrawan, rastrawan, fierro hachawan, wakintataq ladrillo kanana hornopi llank'achirqan. Amón runakunaq llapan llaqtankunapi kaqkunatapas kaqllatataq ruwarqan. Chaymantataq Davidqa llapa ejercitontin Jerusalenman kutipurqan.

will be added

X\