2 Samuel 11

1Qhepantin wata mikhuy poqoy tiempopi reykunaq maqanakuyman lloqsinan tiempopin Davidqa Joabta, oficialkunata, llapan Israel soldadokunatawan kacharparirqan Amón runakunawan maqanakuqta. Hinan paykunaqa Amón runakunata atipaspanku Rabá llaqtata muyuykurqanku. Davidtaq ichaqa Jerusalenpi qhepakurqan. 2Huk tarden Davidqa puñunapi samarisqanmantaña, kamachikunan wasi patapi puriykachashaspa, rikurqorqan huk sumaq rikch'ayniyoq warmi bañakushaqta. 3Hinaspa pichus chay warmi kasqanta tapuchimurqan, chaymi nirqanku: –Het runa Uriaspa warmin Betsabé Eliampa ususinmi kasqa, nispa. 4Hinan Davidqa pusamuqta kacharqan. Wasinman pusaqtinkutaq, payqa chay warmiwan puñuykurqan, chaymantataq warmiqa wasinta kutipurqan. Payqa chayllaraqmi killan purisqanmanta ch'uyanchakurqan. 5Chaymi warmiqa wiksallikurqan, hinaspa Davidman willachimurqan: Qanpaqmi onqoq kashani, nispa. 6Hinan Davidqa Joabman willachirqan: Het runa Uriasta kachamuway, nispa. Joabtaq Uriasta payman kachamurqan. 7Chayamuqtintaq Davidqa tapuykurqan imaynachus Joabpas, soldadokunapas, maqanakuypas kashasqanta. 8Chaymantataq Davidqa nirqan: –Phaway wasiykita samakuq rirqoy, nispa. Reypa wasinmanta Urías lloqsisqan qhepatataq, payqa huk regalota Uriaspaq apachirqan. 9Uriastaq ichaqa wasinta mana ripurqanchu, aswanpas reypa kamachikunan wasi punkupin Davidpa llapa guardiankunapiwan puñurqan. 10Davidtaq chayta yachaspa Uriasta nirqan: –¿Manachu purisqaykimanta chayamushanki? ¿Imanaqtintaq wasiykita mana rirqankichu? nispa. 11Paytaq kutichirqan: –Diospa arcanpas, Judapas, Israelpas karpapi kashaqtin, wiraqochay Joabpas oficialniykikunantin campopi tiyashaqtinqa, ¿imaynan ñoqa wasiyta rispay mikhuyman, ukyayman, warmiywanpas puñuyman? ¡Manan kaytaqa ruwaymanchu, ima kaqtinpas nitaq kawsayniykiraykupas! nispa. 12Davidtaq nirqan: –Chhaynaqa kunan qhepakuy, paqarinña kachasqayki, nispa. Hinan Uriasqa Jerusalenpi chay p'unchay qhepakurqan. 13Qhepantin p'unchaytaq Davidpa invitasqan Uriasqa paywan mikhurqan ukyarqan, hinan Davidqa payta machachirqan. Uriastaq ch'isi lloqsipuspa, reypa guardiankunawan puñunanpi puñukapurqan, manataq wasintaqa rirqanpunichu. 14Qhepantin paqartaq Davidqa Joabman cartata qelqarqan, chaytan Uriasman apachirqan. 15Cartapitaq nirqan: –Uriasta sinchi maqanakushaq cheqasman churanki, hinaspa sapallanta saqerpariy wañuchinankupaq, nispa. 16Joabtaq llaqtata muyuykusharqan, hinaspa Uriasta allin qharikuna cheqasman churarqan. 17Muyuykusqa llaqta Joab contra maqanakuq lloqsimuqtintaq, Davidpa wakin oficialninkuna wañurqanku, paykunawanmi Het runa Uriaspas wañullarqantaq. 18Hinan Joabqa imaynachus maqanakuy kasqanta Davidman lliwta willananpaq kacharqan. 19Willaqtataq nirqan, lliw kaykunata willayta tukuqtiyki, reyqa phiñakuspa nisunki: 20¿Imanaqtinmi sinchita llaqtaman qayllarqankichis? ¿Manachu yachankichis llaqta muyuriq perqa patamanta wach'imunankuta? 21¿Manachu huk warmi molino rumita perqamanta kachaykamuspa Jerobaalpa churin Abimelectapas Tebes llaqtapi wañuchirqan? ¿Imapaqmi sinchita qayllarqankichis llaqta muyuriq perqaman? nispa chayqa, ninki: Oficialniyki Het runa Uriaspas wañupunmi, nispa. 22Hinan willaqqa chayaspa llapanta Joabpa nisqanta Davidman willarqan. 23Nirqantaq: –Awqayku lloqsimuspan sinchita ñoqaykuwan maqanakurqanku, chaywanpas ñoqaykuqa atipaykun, llaqta punkukaman qatiykuyku. 24Llaqta muyuriq perqa patamanta wach'imuqkunataq ichaqa wakin oficialniykikunata wañuchinku, hinallataq Het runa Uriastapas, nispa. 25Hinan Davidqa willaqninta nirqan: –Kay simikunawan Joabta kallpachanki: Ama chaykunamanta llakikuychu, awqa-tinkuypiqa manan yachakunchu mayqen wañunanpas. Kallpachakuy llaqtata thuninaykichiskama, nispayki. Ahinatan payta kallpachanki, nispa. 26Betsabetaq qosan Urías wañukapusqanta yachaspa qosanmanta llakikuspa waqarqan. 27Chay llakikuynin qhepatataq Davidqa Betsabeta wasinman waqyachimurqan. Hinaspa casarakapurqan, paytaq wawata wachakurqan. Davidpa chay ruwasqanmi ichaqa Señor Diospa ñawpaqenpi mana chaninchu karqan.

will be added

X\