2 Samuel 10

1Amón runakunaq reynin Nahas wañupuqtinmi, churin Hanunqa paypa rantinpi kamachikurqan. 2Hinan Davidqa nirqan: –Taytanpas khuyapayawaqmi, ñoqapas churin Hanunman oficialniykunata kachasaq taytanmanta llakikuyninpi sonqochaykuqta, nispa. Davidpa oficialninkuna Amón suyuman chayaqtintaq, 3chay suyupi umalli qharikuna wiraqochanku Hanunta nirqanku: –¿Taytaykita munakuspa Davidqa sonqochaqta kachamusqasuykitachu yuyanki? Aswanpas, ¿manachu llaqtanchista reqsinanpaq, qhamiyananpaq, chay qhepatataq atipawananchispaq kachamunman? nispa. 4Hinan Hanunqa Davidpa oficialninkunata hap'ispa kuskan sunkhanta k'isurqachirqan, p'achantapas kuskanta sikipatankama wit'urqachirqan, hinaspa kacharparipurqan. 5Paykunataq sinchi p'enqasqa karqanku, hinan Davidqa chayta yacharqospa willaqta kacharqan: Jericó llaqtapi qhepakuychis sunkhaykichis wiñanankama, chaymantaña kutimpunkichis, nispa nimunankupaq. 6Amón runakunataq Davidwan cheqnichikusqankuta reparakuspa mink'akurqan Bet-rehot llaqtamanta Soba llaqtamantawan iskay chunka waranqa Aram suyu soldadokunata, Maaca llaqta reytataq waranqa soldadontinta, Tob llaqtamantataq chunka iskayniyoq waranqa soldadokunata. 7Davidpas chayta yachaspa, ejército umalli Joabta kachallarqantaq llapan soldadonkunatawan. 8Amón runakunataq lloqsimuspa llaqta punku haykunapi maqanakuypaq wakichikurqanku. Sobamanta Bet-rehobmanta Aram soldadokuna Maacamanta Tobmantawan soldadokunataq llapanku sapaq campopi kasharqanku. 9Joabtaq ñawpaqpi qhepapi awqankuna kasqanta rikuspa, aswan qharinkunata soldadonkunamanta akllarqospa wakichirqan Aram soldadokunawan maqanakunanpaq. 10Wakin soldadokunatataq wawqen Abisaiman hap'iykachispa Amón runakunawan maqanakunanpaq wakichirqan. 11Nirqantaq: –Aram soldadokuna atipawaqtinqa qan yanapawanki, Amón runakuna atipasuqtiykitaq ñoqa yanapasqayki. 12¡Kallpachakusun! ¡Allin qhari kasun llaqtanchisrayku, Diosninchispa llaqtankunarayku! ¡Señor Diospuni munasqanman hina ruwachun! nispa. 13Joabmi soldadonkunapiwan maqanakuq lloqsirqan, hinan Aram soldadokunaqa qayllankumanta ayqekurqanku. 14Amón runakunapas Aram soldadokunaq ayqepusqanta rikuspa, Abisaipa ñawpaqenmanta kutiripullarqankutaq, llaqtaman haykuspataq chaypi pakakurqanku. Chaymantataq Joabqa Amón runakunawan maqanakusqanmanta Jerusalenman kutimpurqan. 15Aram soldadokunan ichaqa Israel soldadokunaq atipasqan kasqankuta reparaspa, wakmanta huñukurqanku. 16Hadad-ezermi willaqta kacharqan Aram soldadokuna Eufrates mayu chimpamanta hamunankupaq. Hinan Helam llaqtaman hamurqanku, Hadad-ezerpa ejerciton umalli Sobacpa kamachisqan. 17Davidtaq chayta yacharqospa, llapa Israel soldadokunata huñurqorqan, hinan Jordán mayuta chimparqospa Helam-man chayarqanku. Chaypitaq Aram soldadokunaqa wakichikurqanku Davidwan tinkunankupaq, maqanakuspankutaq ichaqa 18Israel soldadokunamanta ayqekurqanku. Hinan Davidqa wañuchirqan qanchis pachak carretapi qharikunata, tawa chunka waranqa caballopi qharikunatawan, ejército umalli Sobactapas chay kikinpi wañuchillarqantaq. 19Llapan Hadad-ezerpa kamachisqan reykunataq Israel soldadokunaq atipasqan kaspanku, paykunawan allipunayta munarqanku. Hinan Israel runakunaq kamachisqan kapurqanku. Aram runakunataq chaymantapacha manaña Amón runakunata yanapaqñachu.

will be added

X\