2 Samuel 1

1Saulpa wañupusqan qhepatan, Davidqa Amalec runakunata maqanakuypi atipasqanmantaña Siclag llaqtaman kutimpurqan, hinaspan chaypi iskay p'unchay kasharqan. 2Kinsakaq p'unchaytaq Saulpa karpa-karpanmanta huk wayna hamurqan, p'achanpas llik'i-llik'i, umanpas hallp'akama. Davidpa ñawpaqenman qayllaykuspataq, manchakuywan pampakama k'umuykukurqan. 3Chaymi Davidqa tapuykurqan: –¿Maymantan hamushanki? nispa. Paytaq kutichirqan: –Israelpa karpa-karpanmantan ayqerqamuni, nispa. 4Davidtaq nirqan: –¿Imataq karqonri? ¡Willaykuway! nispa. Paytaq kutichirqan: –Soldadokunan awqa-tinkuypi atipasqa ayqepunku, askhataqmi wañusqakunapas, hinallataq Saulpas churin Jonatanpiwan wañupunku, nispa. 5Hinan Davidqa willaqnin waynata nirqan: –¿Imaynapitaq yachanki Saulqa churin Jonatanpiwan wañusqantari? nispa. 6Waynataq kutichirqan: –Gilboa orqopi qonqaylla kashaspaymi rikurqani Saulta lanzanman k'iraykusqata, runakunapas caballopi carretakunapiwan payta muyuykushaqta. 7Hinan Saulqa qhepanta qhawarikuspa rikurqowarqan, waqyariwarqantaq. Chaymi nirqani: ¿Ima ninkin? nispa. 8Paytaq tapuykuwarqan: ¿Mayqenmi kashanki? nispa. Ñoqataq nirqani: Amelec runan kani, nispa. Hinan niwarqan: 9Kawsashaniraqmi, chaymi llakikuyta nanayta muchushani, ama hinachu kay, wañurqachiway, nispa. 10Chaymi qayllaykuspa, urmasqanpi manaña kawsaq hina kasqanta yachaspa, wañurqachirqani. Umanpi kaq coronata makinpi kaq brazaletetawan horqorqani, chaymi kaykunata apamuyki, wiraqocháy, nispa. 11Hinan Davidqa llakikuymanta p'achanta llik'ikurqan, paywan kashaq qharikunapas kaqllatataq ruwarqanku. 12Qhasqonkuta takakuspanku waqarqanku, tutakamataq ayunarqanku Saulmanta, churin Jonatanmanta, Israel llaqtamanta, Señor Diospa soldadonkunamantawan, paykuna maqanakuypi wañuchisqa kasqankurayku. 13Davidqa willaqnin waynata tapuykullarqantaqmi: –¿Maymantan kanki? nispa. Waynataq kutichirqan: –Karu llaqtayoq Amalec runan kani, nispa. 14Davidtaq nirqan: –¿Imaynan qanqa wañurqachirqanki Señor Diospa akllakusqan reyta? ¿Manachu makiyki haywariyta manchakurqanki? 15Qan kikiykin simiykiwan rimarinki Señor Diospa akllakusqan reyta wañuchisqaykita, qan kikiykin wañunaykipaq huchachakunki, nispa. Soldadonkunamanta huknin waynata waqyarispataq kamachirqan: –¡Phaway wañuchimuy! nispa. Hinan payqa chay Amalec runata hukpaqkama wañurqachirqan. 17Davidmi kay harawita kamarirqan, Saulwan churin Jonatanpiwan wañupusqankumanta takinapaq. 18Hinallataq Judá runakuna kay P'eqta harawita yachanankupaq kamachikurqan. Kay harawiqa Jaser nisqa qelqapin qelqasqa kashan: 19¡Israelpa atiyninmi orqokunapi tukukun! ¡Ikiraqmi! ¡Imaraqmi! ¡Kallpasapakunaqa urmanku! 20Aman Gat llaqtapiqa chayta willakunkichischu, aman Ascalón llaqta callekunapiqa rimarinkichischu, Filistea runakunaq warminkunachá kusikunman, mana iñiqkunaq ususinkunachá kusisqa saltanman. 21Gilboa orqo-orqoqa ama ruruchiq hallp'añachu kachun, amaña parapas sullapas chaymanqa chayachunñachu, chaypin allin qharikunaq escudon pisichasqa karqan, manañan Saulpa aceitewan hawisqa escudonpas lliphllikinñachu. 22Jonatanqa wach'inanwan wach'ispa hap'ichillaqpunin, Saulqa espadanwan maqanakuspa wañuchillaqpunin, qharikunatan wañuchiqku, kallpasapakunatan sipiqku. 23¡Ancha munasqan Saulwan Jonatanwanqa karqanku! Wañuspankupas kawsaspankupas manapunin t'aqanakurqankuchu. Ankamantapas aswan phawaqmi karqanku, leonmantapas aswan kallpayoqmi karqanku. 24Israel warmikuna, Saulmanta waqaychis, payqa sumaq sani-puka p'achawanmi p'achachirqasunkichis, qori umiñawan sumaqchasqa p'achawanmi churarqasunkichis. 25¡Ikiraqmi! ¡Imaraqmi! ¡Kallpasapakunaqa maqanakuypi urmanku! ¡Jonatanqa orqoykichispin wañusqa kashan! 26Wawqéy Jonatán, anchatan qanmanta llakikushani, ñoqapaqqa ancha sumaqpunin karqanki, munakuyniykipas warmikunaq munakuyninmantaqa aswan sumaqpunin karqan. 27¡Ikiraqmi! ¡Imaraqmi! ¡Kallpasapakunaqa maqanakuypi urmanku! ¡Maqanakuna armakunaqa tukukapunmi! nispa.

will be added

X\