2 Reyes 9

1Profeta Eliseon profetakuna t'aqamanta hukninta waqyarispa nirqan: –Wakichikuy purinaykipaq. Kay p'uyñuchapi aceiteta aparikuy, hinaspa Galaadpi Ramot llaqtata riy. 2Chayman chayaspataq Nimsiq nieton Josafatpa churin Jehuta maskhanki. Maypichus kashanqa pay chayman haykunki, hinataq paywan kashaqkuna qayllamanta sapaq wasiman pusaspayki, 3p'uyñuchapi apasqayki aceitewan umanta hawinki hinaspa ninki, Señor Diosmi nin: Ñoqan hawiyki Israel rey kanaykipaq, nispa. Chaymantataq punkuta kicharqospayki, usqhaylla pasapunki ama sayaykuspa, nispa. 4Hinan wayna profetaqa Galaadpi Ramot llaqtata rirqan, 5chayman chayaspataq ejército umallikunata huñuykusqata tarirqan. Hinaspa nirqan: –Wiraqocháy, hukta willaykusqayki, nispa. Jehutaq kutichirqan: –¿Mayqenniykupaqmi? nispa. Profetataq nirqan: –Qanpaqmi, wiraqocháy, nispa. 6Chaymi Jehuqa sayarispa wasiman haykurqan. Hinan profetaqa aceitewan umanta hawispa nirqan: –Israelpa Diosnin Señormi nin: Ñoqan hawiyki Israel llaqtaypi rey kanaykipaq. 7Qanmi ch'usaqyachinki wiraqochayki Ahabpa mirayninkunata, ahinapin Jezabelman aynita kutichinki profetaykunatapas wakin kamachiykunatapas wañuchisqanmanta. 8Ahabpa llapa aylluntan ch'usaqyachisaq, hinallataq Israelpi paypa ayllun llapan qharikunatapas tukuchisaq manataq hukllapas qhepanqachu. 9Imaynatachus ruwarqani Nabatpa churin Jeroboampa miraynintapas, Ahiaspa churin Baasaq miraynintapas, ahinallatataqmi Ahabpa aylluntapas ruwasaq. 10Jezreel chakrapitaq alqokuna Jezabelta mikhunqa, manataq pipas p'ampaykunqachu, nispa. Chaykunata nispanmi profetaqa punkuta kicharqokuspa usqhaylla pasakapurqan. 11Jehutaq reypa oficialnin-masinkunawan huñukusqanman kutipurqan, hinan paykunaqa Jehuta tapurqanku: –¿Iman kasqa? ¿Imapaqtaq chay waq'ari waqyasqasunki? nispa. Jehutaq kutichirqan: –Qankunaqa reqsinkichismi chay runata, imatachus rimasqantapas yachankichismi, nispa. 12Paykunataq ichaqa kutichirqanku: –¡Manan imatapas yachaykuchu! ¡Willawayku! nispa. Hinan Jehuqa nirqan: –Ahinatan niwan, Señor Diosmi nin: Ñoqan hawiyki Israelpi rey kanaykipaq, nispa. 13Paykunataq kaq rato capankuta gradas pataman ch'utikuspanku chaki sarunanman mast'arqanku, chaymantataq putututa tocaspa qaparirqanku: ¡Jehuqa reymi! nispa. 14Josafatpa churin Nimsiq nieton Jehuqa Joram contran sayarirqan, Joramqa Galaadpi Ramot llaqtata Siria rey Hazaelpa phawaykunanmantan hark'asharqanku llapan Israel soldadokunapiwan. 15Joramtaqa maqanakuypin Siria soldadokuna k'irisqaku, hinan payqa k'irin hampikuq Jezreelman kutipusqa. Chaymi Jehuqa oficialmasinkunata nirqan: –Cheqaqtapuni munankichis ñoqa rey kanayta chayqa, ama kay llaqtamanta pitapas kachariychischu, mana chayqa Jezreelta rispan willarqamunqa, nispa. 16Hinaspataq payqa maqanakuypaq carretanman seqaspa Jezreelta rirqan, chaypin Joramqa onqosqa kasharqan. Hinallataq Judá rey Ocoziaspas chaypi kasharqan, Joram watukuq risqanrayku. 17Jezreel llaqta torremanta qhawaqtaq rikurqan Jehuta soldadokunantin qayllaykushaqta, chaymi qaparirqan: –¡Soldadokunan hamushan! nispa. Hinan Joramqa kamachirqan: –Huk caballo sillata kachaychis, maqanakuqchu icha sumaqpichu hamushasqanta tapuqta. 18Caballo sillaqa Jehuman tupaq rispataq nirqan: –Reymi kachamuwan maqanakuqchu icha sumaqpichu hamushasqaykita tapuqta, nispa. Jehutaq kutichirqan: –Manan chayqa qanman tupasunkichu. ¡Qhepayta hamuy! nispa. Hinan llaqta qhawaqqa willakurqan: –Tapuq kachasqa runaqa taripanmi chay hamuqkunaman, ichaqa manan kutimunchu, nispa. 19Chaymi reyqa kaq rato huk caballo sillata kachallarqantaq. Hinan paypas taripaspa nillarqantaq: –Reymi kachamuwan maqanakuqchu icha sumaqpichu hamushasqaykita tapuqta, nispa. Jehutaq kutichirqan: –Manan chayqa qanman tupasunkichu. ¡Qhepayta hamuy! nispa. 20Hinan llaqta qhawaqqa willallarqantaq: –Chay tapuq kachasqapas taripanmi chay hamuqkunaman, ichaqa manan kutimunchu. Carreta purichimuqqa Nimsiq nieton Jehú kasqallanmi hamushan, payqa waq'a hinan phawaylla purichin, nispa. 21Chaymi Joramqa kamachirqan: –¡Maqanakuypaq carretayta wakichiychis! nispa. Hinan carretanta wakichirqanku, Israel rey Joramtaq Judá rey Ocoziaspiwan sapanka carretankupikama llaqtamanta lloqsirqanku Jehuwan tupanankupaq. Jezreelmanta Nabotpa chakranpi tupaspankutaq, 22Jehuta rikurqorqan, hinaspa payqa nirqan: –¡Jehú! ¿Maqanakuqchu icha sumaqpichu hamushanki? nispa. Jehutaq kutichirqan: –¿Imaynan sumaqpi hamushayman mamayki Jezabel idolokunata yupaychachishaqtin, layqakuykunatapas ruwashallaqtin? nispa. 23Chaymi Joramqa carretanta kutirichispa ayqekapurqan, Ocoziastataq waqyarqan: –¡Ocozías, q'otukuymi! nispa. 24Jehutaq ichaqa wach'inanwan Joramta wach'irqan, chaymi wasanta haykuspa sonqonta t'urpurqan, hinan carretanpi qonqorpanmanta urmarqan. 25Jehutaq oficialnin Bidcarta kamachirqan: –Carretamanta ayata horqoy, hinaspa Nabotpa chakranman wikch'umuy. Yuyariy iskayninchis taytan Ahabpa qhepanta maqanakuypaq carretakunata purichishaqtinchis, Señor Diospa Ahab contra kay hina nisqanta: 26“Qayna p'unchaymi Nabot-tapas churinkunatapas wañuchisqaykita rikurqani, chaymi ñoqa Señor Diosqa niyki chay ruwasqaykimantaqa muchuchisqaykipunin”, nispa huchachasqanta. Chayrayku payta hap'iy, hinaspa Nabotpa chakranman wikch'umuy, Señor Diospa nisqanman hina, nispa. 27Judá rey Ocoziastaq chaykunata rikuspa Bet-hagán llaqtaman riq ñanninta ayqekapurqan. Jehutaq ichaqa qhepanta phawaspa kamachirqan: –¡Paytapas wañuchillaychistaq! nispa. Ibleam qaylla Gur qhatata carretanpi wichashaqtintaq, sinchitapuni Ocoziasta k'irirqanku, chaywanpas Meguidokamaraqmi ayqekurqan, chaypitaq ichaqa wañupurqan. 28Chay qhepatataq kamachinkuna Jerusalenman huk carretapi apapurqanku, hinaspa Davidpa Llaqtan nisqapi ayllunpa aya p'ampananpi p'ampapurqanku. 29Ocoziasqa Judapi kamachikuyta qallarisqa, Ahabpa churin Joram chunka hukniyoq wata kamachikushaqtinmi. 30Chaymantataq Jehuqa Jezreelta rirqan. Jezabeltaq chayta yachaspa, ñawinta pintakurqan, chukchantapas sumaqchakurqan, hinaspan wasi ventanamanta qhawarqan. 31Llaqta punkuman Jehú chayaqtintaq, Jezabelqa nirqan: –Yaw, wiraqochayki wañuchiq, ¿imaynataq kashanki? Qanpa sutiykiqa Zimrin kanan, nispa. 32Hinan Jehuqa wasi ventana cheqasta qhawarispa waqyakurqan: –¿Pitaq ñoqaq t'aqaypi kashan? nispa. Iskay kinsa oficialkunan wasi ventanamanta Jehuta qhawarirqanku, 33hinan paykunata kamachirqan: –¡Jezabelta wikch'uykamuychis! nispa. Jezabelta pampaman wikch'uykamuqtintaq, caballokuna saruqtin yawarnin perqaman ch'iwkarqan wakin caballokunaq chakinmanwan. 34Chaymantataq Jehuqa mikhuq ukyaq rirqan. Chay qhepatataq payqa kamachirqan: –Chay ñakasqa warmita qhawamuychis, hinaspa p'ampamuychis, imaynaña karqan chaypas payqa reypa ususinmi, nispa. 35P'ampaq riqkunataq ichaqa tarirqanku uma tullunta, chakinkunata, maki qochallantawan. 36Hinan paykunaqa kutimurqanku Jehuman willaq, chaymi Jehuqa nirqan: –Tisbe llaqtayoq Elías kamachinwanmi Señor Diosqa kaykunamanta willachirqanña. Jezabelpa aychantaqa alqokunan mikhunqa Jezreel chakra-chakrapi. 37Ayanpas wanu hina wisñisqan kanqa Jezreel chakra-chakrapi, manataqmi pipas ayantaqa ninqachu: Kayqa Jezabelmi, nispaqa.

will be added

X\