2 Reyes 6

1Huk p'unchaymi profeta t'aqa qharikuna Eliseota nirqanku: –Kaypi qanwan huñukunanchis cheqasqa huch'uymi ñoqanchispaqqa. 2Simiykimanta risaqku Jordán mayuta, chaypi sapankayku huk kurkuta hap'ispa, wasita ruwakusaqku tiyanaykupaq, nispa. Eliseotaq kutichirqan: –Riychis, nispa. 3Hukninkutaq ichaqa Eliseota nirqan: –Ama hinachu kay, riysiwayku, nispa. Paytaq: –Allinmi, riysisqaykichisyá, nirqan. 4Hinan Eliseoqa paykunawan Jordán mayukama rirqan, chaypitaq sach'akunata kumpayta qallarirqanku. 5Hukkaqnin profeta sach'ata kumpashaqtinmi, hachanqa unuman atipaykurqan, hinan qaparirqan: –¡Ay! ¡Imanaykusaqtaq, wiraqocháy! ¡Mañakusqallan karqan chay hachaqa! nispa. 6Diospa profetantaq tapuykurqan: –¿May cheqasmanmi urmaykurqan? nispa. Chaymi atipachikuq runaqa urmaykusqan cheqasta rikuchirqan. Hinan Eliseoqa huk k'aspita wit'uspa chay cheqasman wikch'uykurqan, chaymi hachaqa tuytumurqan. 7Eliseotaq payta kamachirqan: –Horqoy, nispa. Chay runataq makinwan hachata horqomurqan. 8Siria reymi Israel runakunawan awqa-tinkuypi maqanakunanpaq yuyaykurqanña. Oficialninkunawan rimanakuspataq nirqan: –Chay cheqaspin ejercitoyta churasaq, nispa. 9Eliseotaq ichaqa Israel reyman willachirqan: Aman chay cheqasman rinkichu, Siria runakunan chayman uraykunqaku, nispa. 10Chaymi Israel reyqa profetaq willasqan cheqaskunata tapupakuqta kacharqan. Askha kutitan Eliseoqa reyman willachirqan makilla kananpaq, chay hinapin reyqa chay cheqaskunapi cuidakurqan. 11Siria reytaq chay hawa phiñasqa kasharqan, chaymi oficialninkunata waqyachispa nirqan: –¿Mayqenniykichismi Israel reyman sayakunkichis? nispa. 12Hinan hukninku nirqan: –Reyníy, manan pipas sayakunchu, aswanpas Israelpi kashaq profeta Eliseon Israel reymanqa willan puñunayki wasipi rimasqaykitawanpas, nispa. 13Siria reytaq kamachirqan: –Maypichus kasqanta tapupakamuychis, wakin soldadoykunata kachaspa hap'ichimunaypaq, nispa. Hinan: –Dotán llaqtapin kashan, nispa willaqtinku, 14reyqa kacharqan askha soldadokunata caballokunantinta, carretakunantinta ima. Paykunan Dotanman tuta chayarqanku, hinaspa llaqtata muyuykurqanku. 15Qhepantin paqartaq Eliseoq kamachinqa hatarispa lloqsirqan, hinan rikurqan carretakunantin caballokunantin soldadokuna llaqtata muyuykushaqta. Chaymi Eliseota tapurqan: –¡Achacháw! ¿Imanaykusuntaq kunanqa, wiraqocháy? nispa. 16Eliseotaq kutichirqan: –Ama manchakuychu, paykunamantaqa aswan askhan ñoqanchiswan kashaqkunaqa, nispa. 17Señor Diosmantataq mañakurqan: Señor Diosníy, qhawarichiy rikunanpaq, nispa. Hinan Señor Diosqa Eliseoq kamachinta qhawarichirqan, paytaq qhawarispa rikurqan Eliseoq muyuriqnin orqopi nina caballokuna, nina carretakuna hunt'a kashaqta. 18Siria soldadokuna paykunaman phawaykushaqtinñan Eliseoqa Señor Diosta valekurqan: Señor Diosníy, kay runakunata ñawsayachiy, nispa. Señor Diostaq Eliseoq mañakusqanman hina paykunata ñawsayachirqan. 19Hinaqtinmi Eliseoqa nirqan: –Manan kaychu ñanqa, manallataq maskhasqaykichis llaqtapas kaychu. Haku ñoqa pusasqaykichis pitachus maskhashankichis chay runaman, nispa. Hinaspan payqa chay soldadokunata Samaria llaqtaman pusarqan. 20Llaqtaman chayaspataq Eliseoqa mañakurqan: Señor Diosníy, kunanqa ñawinkuta kichariy, nispa. Hinan paykunaqa qhawarispa rikurqanku Samaria llaqta ukhupi kashasqankuta. 21Israel reytaq paykunata rikurqospa Eliseota tapuykurqan: –Taytáy, ¿wañuchisaqkuchu? Taytáy, ¿wañuchisaqkuchu? ¿Ima ninkin? nispa. 22Eliseotaq kutichirqan: –Ama, ama wañuchiychu. Manamá pitapas espadaykiwan wach'inaykiwan presota hap'ispaykiqa wañuchinkichu. Qoychis mikhunata ukyanata, hinaspa wiraqochanku reyman kachapuy, nispa. 23Hinan hatun mikhuyta wakichirqanku, chaymi mikhuykurqanku ukyaykurqanku. Chay qhepatataq reyqa kacharparipurqan, paykunataq wiraqochanku reyman kutipurqanku. Chaymantapachan Siria runakunaqa manaña Israel suyuta llat'anaq phawaykurqankuchu. 24Chaykuna qhepatataq Siria rey Ben-Hadadqa llapan soldadonkunata huñuykuspa Samariata rirqan, hinaspan muyuykurqan phawaykunanpaq. 25Muyuykusqa kasqanraykun chay llaqtapi sinchipuni yarqay karqan, chaymi huk asnoq uman valerqan pusaq chunka qolqe, libraq kuskannin Urpi Wanu nisqa saphipas phisqa qolqe. 26Huk p'unchaymi Israel reyqa llaqta muyuriq perqa patanta purisharqan, hinan huk warmi waqyakurqan: –¡Reyníy, yanapaykuway! nispa. 27Reytaq kutichirqan: –Manataq Señor Diospas yanapasunkichu chayqa, ¿imaynatataq ñoqari yanapaykiman? Manan trigoypas vinoypas kanchu qanman qonaypaq, nispa. 28Tapuykurqantaq: –¿Imataq sasachakuyniykiri? nispa. Hinan warmiqa kutichirqan: –Kay warmin niwarqan: Wawaykita apamuy kunan p'unchay mikhunanchispaq, ñoqaq wawaytataq paqarin mikhusun, nispa. 29Hinaqtinmi wawayta wayk'uspa mikhurqayku, qhepantin p'unchaytaq kay warmita nirqani: Wawaykita apamuy mikhunanchispaq, nispa, paytaq ichaqa wawanta pakarqapun, nispa. 30Warmiq nisqanta uyarispataq reyqa p'achanta llik'ikurqan. Perqa patapi purishaqtintaq runakunaqa rikurqanku qhasqa p'achawan ukhunman churaykusqata. 31Hinan reyqa nirqan: –Sinchitapuni Diosqa ñak'arichiwachun, Safatpa churin Eliseota manachus kunanpacha umanta qhorusaq chayqa, nispa. 32Eliseoqa wasinpin tiyasharqan kurak runakunapiwan. Chaykamataq reyqa huk runata Eliseoman kacharqan. Eliseotaq ichaqa manaraq reypa kachasqan chayashaqtin, kurak runakunata nirqan: –Qhawariychis chay runa wañuchiq reyta, huk runatan umayta qhoruwananpaq kachamushan. Chay hinaqa, kachamusqan runa chayamuqtinqa punkuta wisq'ankichispacha, amataq haykuchimunkichischu. Wiraqochan reyqa qhepantapachan hamushan, nispa. 33Chayta paykunawan rimashallaqtinraqmi reyqa Eliseoq qayllanman chayaspa nirqan: –Kay mana allinqa Señor Diosmantan hamun. ¿Imapaqñataq paypi suyakuyman? nispa.

will be added

X\