2 Reyes 24

1Joacimpa kamachikusqan tiempopin Babilonia rey Nabucodonosorqa Judá suyuta munaychakuq phawaykurqan, chaymi Joacimqa kinsa wata payta servirqan. Chaymantataq huk-hinata yuyaykuspa Nabucodonosor contra sayarirqan. 2Ichaqa Señor Diosmi Joacim contra kachamurqan t'aqa-t'aqa llat'anaqkunata, paykunan karqan Babiloniamanta, Siriamanta, Moabmanta, Amonmantawan. Chaykunatan Señor Diosqa kachamurqan Judata ch'usaqyachinanpaq, kamachin profetakunawan willachisqanman hina. 3Señor Diosqa yuyaykurqanmi ñawpaqenmanta Judá runakunata wikch'upuyta Manasespa tukuy huchankuna hawa, mana allin ruwasqankuna hawa, chayraykun llat'anaqkunata kacharqan. 4Manasesmi Jerusalenpi mana huchayoq runakunata wañuchispa hinantinpi yawarta hich'asqa, chayraykun Señor Diosqa mana payta pampachayta munarqanchu. 5Joacimmanta wakin willakuykunapas tukuy ruwasqanmantapas Judá Reykunaq Willakuynin Qelqapi qelqasqan kashan. 6Wañupuqtinqa churin Joaquinmi rantinpi kamachikurqan. 7Chaymantapachan Egipto suyu reyqa manaña hayk'aqpas suyunmanta lloqsirqanchu, Babilonia suyu reymi tukuy hallp'ankunata hap'ikapurqan Egipto wichay qorpa mayumanta Eufrates mayukama. 8Joaquinqa chunka pusaqniyoq watayoqmi karqan kamachikuyta qallarishaspa, kamachikurqantaq Jerusalenmanta kinsa killata. Maman Nehustaqa Jerusalenmanta Elnatanpa ususinmi karqan. 9Joaquinqa manapunin Señor Diospa munayninman hinachu ruwarqan, aswanpas taytan hinan mana allinta ruwarqan. 10Haqay p'unchaykunapin Babilonia rey Nabucodonosorpa soldadonkuna Jerusalén llaqta contra rirqanku hinaspa muyuykurqanku. 11Llaqtata soldadokuna muyuykushaqtintaq, rey Nabucodonosorqa chayarqan. 12Hinan Judá rey Joaquinpas, mamanpas, oficialninkunapas, umalli runakunapas, yuyaychaqninkunapas Babilonia reypa qayllanpi huch'uyyaykakapurqanku. Chaymi Nabucodonosorqa pusaqkaq watapi kamachikushaspa Joaquinta presota hap'irqan. 13Chaymantataq Señor Dios yupaychana wasimanta reypa kamachikunan wasimantawan llapan chaypi kaq qhapaq kaykunata aparqan, hinallataq Señor Dios yupaychana wasipaq Israel rey Salomonpa ruwachisqan qorimanta llapan serviciokunata p'akirqan, Señor Diospa willasqanman hina. 14Chay qhepatataq Jerusalenpi tiyaq chunka waranqa runakunata kamachipaq aparqan, chaykunan karqan llapan umalli runakuna, allinnin soldadokuna, llapan herrerokuna, artesanokuna ima. Chaymi Judá suyupiqa sinchi wakcha runakunallaña qheparqan. 15Hinallataq Nabucodonosorqa Babiloniaman aparqan rey Joaquinta, mamanta, warminkunata, oficialninkunata, suyupi llapan allichachaq runakunata ima. 16Apallarqantaq kamachipaq qanchis waranqa soldadokunata, waranqa artesanokunata, herrerokunatawan, paykunan karqanku allin kallpasapa, maqanakuyman rinankupaqpas kusallaña. 17Chaymantataq payqa Joaquinpa tion Mataniasta paypa rantinpi reyta churarqan, suticharqantaq Sedequiasta. 18Sedequiasqa iskay chunka hukniyoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata. Maman Hamutalqa Libnamanta Jeremiaspa ususinmi karqan. 19Sedequiasqa manapunin Señor Diospa munayninman hinachu ruwarqan, aswanpas Joacim hinan mana allinta ruwallarqantaq. 20Jerusalén runakunapas Judá runakunapas sinchitapunin Señor Diosta phiñachirqanku, chaymi payqa ñawpaqenmanta wikch'urqan. Chaymantataq Sedequiasqa Babilonia rey contra sayarirqan.

will be added

X\