1 Josiasqa pusaq watayoqmi karqan kamachikuyta qallarishaspa, kamachikurqantaq Jerusalenmanta kinsa chunka hukniyoq watata. Mamanqa Boscatmanta Adaiaq ususin Jedidan karqan. 2 Josiasqa Señor Diospa munayninman hinapunin chaninta ruwarqan, payqa ñawpa taytan Davidpa ruwasqanta hinan ruwarqan, mana pañamanpas lloq'emanpas t'aqakuspa. 3 Rey Josiasqa chunka pusaqniyoqkaq watapi kamachikushaspanmi, Mesulampa nieton Azaliaq churin, qelqaqnin Safanta Señor Dios yupaychana wasita kacharqan: 4 –Phaway uma sacerdote Hilquiasman, hinaspa ninki: Señor Dios yupaychana wasiman runakunaq qolqe apasqankutan punku qhawaqkuna chaskirqanku chay qolqeta huñuy, 5 hinaspa Dios yupaychana wasita allichachiqpaq churasqa umallikunaman qoy. Paykuna Dios yupaychana wasi allichaypi llank'aqkunaman pagapuchunku, 6 k'ullu llaqllaqkunaman, wasi perqaqkunaman, rumi thupaqkunamanwan. Hinallataq kurkuta, thupasqa rumitawan rantichunku Dios yupaychana wasita allichanapaq. 7 Paykunaqa hunt'aq runakunan kanku, chayrayku chay qolqemantaqa ama cuentata mañachunkuchu, nispa. 8 Uma sacerdote Hilquiastaq qelqaq Safanman willarqan: –Señor Dios yupaychana wasipin kamachikuy qelqa k'uyuta tarirqoni, nispa. Safanmantaq qorqan, paytaq leerqan. 9 Chaymantataq Safanqa rey Josiasman willaq rispa nirqan: –Reyníy, kamachiykikunaqa Dios yupaychana wasipi kaq qolqeta huñuspankun, wasita allichachiqpaq churasqa umallikunaman qonkuña, nispa. 10 Nillarqantaqmi: Sacerdote Hilquiasmi kay qelqa k'uyuta qomuwan, nispa. Hinaspan Safanqa reypa ñawpaqenpi leerqan. 11 Hinan reyqa kamachikuy qelqa k'uyu leesqanta uyarispa, p'achanta llakikuymanta llik'ikurqan, 12 hinaspataq kamachirqan Safanpa churin Ahicamta, Micaiaspa churin Acborta, qelqaq Safanta, paypa yanapaqnin Asaiastawan: 13 –Riychis Señor Diosta tapumuychis ñoqapas llapan Judá runakunapas tarisqanku qelqaman hinaqa imaynachus kanaykuta. Señor Diosqa k'arak phiñasqan ñoqanchispaq kashan, ñawpa taytanchiskunapas kay qelqapi ruwanapaq kamachiwasqanchista manataq kasukusqakuchu chayqa, nispa. 14 Chaymi Hilquías, Ahicam, Acbor, Safán, Asaiaspiwan rirqanku profetisa Huldaman. Payqa Salumpa warminmi karqan, Salumtaq Harhaspa churin Ticvaq churin karqan, Dios yupaychana wasipi p'achakuna waqaychaq. Huldaqa Jerusalenpi yapachisqa llaqtapin tiyarqan. 15 Paymi willaqtinku nirqan, Israelpa Diosnin Señormi nin: Ñoqata tapuwanaykichispaq kachamuwaqniykichis runaman willamuychis: 16 Ñoqa Señor Diosmi nini: Ancha hatun llakitan kay llaqtamanpas chaypi tiyaq runakunamanpas chayachisaq, Judá reypa leesqan qelqa k'uyupi tukuy willakusqanman hina. 17 Paykunaqa wikch'uwarqankun, hinaspa wak dioskunaman inciensota q'apachirqanku, tukuy ruwasqankuwanmi phiñachiwarqanku, chayraykun phiñakuyniy kay llaqta contra rawrarin, manataqmi thaninqachu, nispaykichis. 18 Nillarqantaq: –Señor Diosta tapunaypaq kachamuqniykichis Judá reytataq ichaqa niychis: Israelpa Diosnin Señormi uyarisqayki qelqamanta nin: 19 Kay llaqtatan runakunatawan ch'usaqyachisaq, ñakasaq, nisqayta uyarispaykin, qanqa kasukuq sonqoyoq karqanki, hinaspa huch'uyyaykukurqanki, hinallataq llakikuymanta p'achaykitapas llik'ikuspa ñawpaqeypi waqarqanki, chaymi ñoqapas uyarirqayki. 20 Chay hinaqa, mana ima llakillayoqmi wañukapunki, ñawpa taytaykikunawan kuskataq p'ampasqa kanki, manataqmi kay llaqta muchuchisqaytaqa rikunkiñachu, nispa. Hinan kachasqakunaqa kutirqanku tukuy chaykunata reyman willanankupaq.
