2 Reyes 21

1Manasesqa chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta phisqa chunka phisqayoq watata. Mamanpa sutinmi Hepsiba karqan. 2Manasesqa manapunin Señor Diospa munayninman hinachu ruwarqan, aswanpas Israelpa qayllanmanta Señor Diospa wikch'usqan wak suyukunaq mana chanin millay ruwasqankunatan ruwarqan. 3Taytan Ezequiaspa thunisqan wak'a dios yupaychana cheqaskunatan wakmanta sayarichirqan, Israel rey Ahab hinan Baal diospa altarnintapas Asera diosaq rikch'aynintapas ruwarqan. Hinataq hanaq pachapi kaq llapan ch'askakunatapas yupaycharqan. 4Manasesqa Señor Dios yupaychana wasipipas altarkunata sayarichillarqantaqmi, chay wasimantaqa Señor Diosmi nisqa: Jerusalén llaqtapin yupaychasqa kasaq, nispa. 5Iskaynin pationpipas hanaq pacha ch'askakunata yupaychananpaq altarkunata sayarichirqan. 6Churintan sacrificiopi ruphachirqan, watuymanpas layqakuymanpas haykullarqantaqmi, wañusqakunaq almanta rimachiqkunawanpas mana allin espiritukunata rimachiqkunawanpas tapuchillarqantaqmi. Ruwasqankunaqa sinchi mana chaninmi karqan, manan Señor Diospa munayninman hinachu karqan, ahinapin Señor Diosta phiñachirqan. 7Señor Dios yupaychana wasipin Asera diosaq rikch'aynin ruwasqanta churarqan, chay wasimantaqa Señor Diosmi Davidta churin Salomontawan nisqa: Israel llapan ayllukuna ukhupin akllakuni Jerusalenta kay wasitawan chaypi ñoqa yupaychasqallapuni kanaypaq. 8Kamachiy Moisespa Israel runakunaman qosqan kamachikuy simiykunata unanchayniykunatapas paykuna makilla hunt'anqaku chayqa, ñawpa taytaykichisman qosqay suyumantaqa manan maytapas tumaqayaqta purichisqaykichischu, nispa. 9Paykunan ichaqa mana kasukurqankuchu, aswanmi Manasesqa waqllichirqan, paykunataq sinchi mana chaninta ruwaspa paykunaq qayllanmanta Señor Diospa wikch'usqan runakunamantapas astawanraq huchallikurqanku. 10Chaymi Señor Diosqa profeta kamachinkunawan willachispa nirqan: 11Judá rey Manasesmi sinchi millayta huchallikurqan, paymanta ñawpaq Amor runakunaq huchankunamantapas aswantaraqmi huchallikurqan, Judá suyutapas idolonkunawan huchallichirqan. 12Chayraykun ñoqa Israelpa Diosnin Señorqa nini: Judá suyumanpas Jerusalenmanpas ancha hatun llakitan chayachisaq, chaymi chayta uyariqkunaqa musphaspa utirayanqaku. 13Samariata tupusqay cordelwanmi Jerusalenta tupusaq, Ahabpa ayllunta qhawasqay plomadawanmi Jerusalenta qhawasaq. Imaynan huk p'ukuta qhellinta k'isuspa p'uktisqata churanku chay hinatan Jerusalenta ruwasaq. 14Llaqtaymanta puchuq runakunatapas wikch'upusaqmi, hinaspan awqankunaman hap'iykachisaq llat'ananankupaq qechunankupaq, 15manapuni ñoqaq munayniyman hina ruwasqankurayku, ñawpa taytankuq Egiptomanta lloqsimusqankumantapacha kunankama sinchita phiñachiwasqankurayku, nispa. 16Manasesmi Judá runakunata huchallichirqan Señor Diospa mana munayninta ruwachispa. Manan chayllatachu ruwarqan, aswanpas askhatan mana huchayoq runakunata Jerusalenpi wañuchispa hinantinpi yawarta hich'arqan. 17Manasesmanta wakin willakuykunapas tukuy ruwasqankunapas huchallikusqankunapas Judá Reykunaq Willakuynin Qelqapi qelqasqan kashan. 18Wañupuqtinqa p'ampapurqanku wasin huertapi, chaymi karqan Uza sutiyoq runaq huertan. Chay qhepatataq churin Amón rantinpi kamachikurqan. 19Amonqa iskay chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta iskay watata. Mamanqa Jotbamanta Haruzpa ususin Mesulemetmi karqan. 20Amonqa manapunin Señor Diospa munayninman hinachu ruwarqan, aswanpas taytan Manasés hinan ruwarqan. 21Payqa taytanpa kikin mana chanin ruwasqankunatan ruwarqan, chayraykun taytanpa yupaychasqan kikin idolokunaman k'umuykuspa yupaycharqan. 22Ahinapin ñawpa taytankunaq Diosnin Señorta saqepurqan, manataq munayninman hinachu ruwarqan. 23Amonpa kikin oficialninkunan pay contra rimanakurqanku, hinaspan payta wasinpi wañurqochirqanku. 24Judá suyu runakunataq ichaqa rey Amón contra llapan rimanakuqkunata wañuchirqanku, hinaspa Amonpa churin Josiasta taytanpa rantinpi reyta churarqanku. 25Amonmanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan. 26P'ampapurqankutaq Uza sutiyoq runaq huertanpi, aya p'ampanapi. Chay qhepatataq churin Josías rantinpi kamachikurqan.

will be added

X\