2 Reyes 20

1Chay p'unchaykunapin Ezequiastaqa wañuy onqoy hap'irqan, hinan Amozpa churin profeta Isaiasqa watukuq rispa nirqan, Señor Diosmi nin: Testamentota ruwakuy, wañukapunkin, manan qhaliyankichu, nispa. 2Hinan Ezequiasqa perqa ladoman uyanta kutirispa mañakurqan: 3Señor Diosníy, valekuykin imaynatachus servisqayta yuyarinaykipaq. Ñoqaqa tukuy sonqon servirqayki, mana waqllispa munayniykiman hina chaninta ruwaspa, nispa. Hinaspa sonqo nanayta waqaykurqan. 4Reypa wasin chawpi patiomanta manaraq lloqsishaqtintaq Señor Diosqa Isaiasta nirqan: 5–Kutiy, hinaspa llaqtaypa umallin Ezequiasta nimuy, ñawpa taytaykiq Davidpa Diosnin Señormi nin: Uyarinin mañakuwasqaykita, rikunin waqasqaykitapas. Qhaliyachisqaykin, hinan kinsa p'unchaymanta ñoqa yupaychana wasita rinki, nispa. 6Chunka phisqayoq watatawanraqmi kawsachisqayki. Qantapas Jerusalén llaqtatapas Asiria reymanta qespichisqaykichismi. Kay llaqtataqa waqaychasaqmi David kamachiyrayku ñoqaq sutiyrayku, nispa. 7Chaymantataq Isaiasqa nirqan: –Higosta kutaychis, nispa. Hinan chayta ruwaspa rey Ezequiaspa nanaqnin cheqasman laq'arqanku, chaymi reyqa qhaliyapurqan. 8Ezequiasmi Isaiasta tapuykurqan: –¿Imaynapitaq yachasaq Señor Dios qhaliyachiwananta, kinsa p'unchaymanta yupaychana wasita rinaytapas? nispa. 9Isaiastaq kutichirqan: –Kay señaltan Señor Dios qosunki prometesqasuyki hunt'akunanta yachanaykipaq. ¿Chunka gradasta inti llanthu ñawpanantachu munanki? Icha, ¿qhepaman kutinantachu munanki? nispa. 10Hinan Ezequiasqa kutichirqan: –Manan sasachu llanthuq ñawpaqman wikch'unanqa, qhepaman kutinanmi ichaqa sasa, nispa. 11Chaymi profeta Isaiasqa Señor Diosmanta mañakurqan, hinan Señor Diosqa Ahazpa ruwasqan inti tupunan llanthuta qhepaman kutichirqan, chunka gradasta. 12Chay p'unchaykunapin Babilonia suyu rey Baladanpa churin Merodac-Baladanqa Ezequiaspa onqosqanta yacharqan, hinaspan willaqkunata kacharqan, apachirqantaq cartakunata huk sumaq sonqotawan. 13Ezequiastaq sumaqta chaskirqan chay willaqkunata, hinaspa qhawachirqan kawsaynin waqaychana wasikunapi kashaq qorita, qolqeta, q'apaq hawinakunata, sumaq aceitekunatawan, armakuna waqaychana wasitapas. Wasinpi kaqkunatapas suyuntinpi kaqkunatapas llapallantan qhawachirqan. 14Hinan profeta Isaiasqa Ezequiasman watukuq rispa tapuykurqan: –¿Maymantan chay qharikuna hamusqaku? ¿Ima nisunkitaq? nispa. Ezequiastaq kutichirqan: –Karu llaqtamantan hamusqaku, Babiloniamantapacha, nispa. 15Isaiasqa tapuykullarqantaq: –¿Imakunatataq wasiykipi qhawarqanku? nispa. Hinan Ezequiasqa kutichirqan: –Tukuy chaypi kaqkunatan rikurqanku. Mana pakaykuspan llapallanta kaqniykunata qhawachirqani, nispa. 16Chaymi Isaiasqa payta nirqan: –Uyariy Diospa siminta: 17Hamuq p'unchaykunapin Babiloniaman apanqaku wasiykipi hayk'an kaq llapan kaqniykikunata, ñawpa taytaykikunaq kunankama huñusqan llapan kaqniykikunatapas. Manan imallapas kaypi qhepanqachu, nispa. 18Qan kikiykiq wakin mirayniykitapas Babiloniamanmi apallanqakutaq, hinan kapaspanku reypa wasinpi kamachipaq churanqaku, nispa. 19Ezequiastaq kutichirqan: –Allinmi willawasqayki Señor Diospa siminqa, nispa. Payqa yuyaykurqanmi: Kawsanaykamaqa manan ima llakipas sasachaypas kanqachu, nispa. 20Ezequiasmanta wakin willakuykunapas atiyninmantapas, imaynatachus estanqueta llaqtaman pampa ukhunta riq yarqhatawan ruwasqanmantapas Judá Reykunaq Willakuynin Qelqapi qelqasqan kashan. 21Ezequías wañukapuqtinqa, churin Manasesmi rantinpi kamachikurqan.

will be added

X\