2 Reyes 15

1Iskay chunka qanchisniyoqkaq watapi Jeroboam Israel suyupi kamachikushaqtinmi, Amasiaspa churin Azariasqa Judá suyupi kamachikuyta qallarirqan, 2chunka soqtayoq watayoq kashaspa. Kamachikurqantaq Jerusalenmanta phisqa chunka iskayniyoq watata. Maman Jecoliasqa Jerusalén llaqtayoqmi karqan. 3Azariasqa Señor Diospa munayninman hinan chaninta ruwarqan, taytan Amasiaspa ruwasqanta hinan ruwarqan. 4Chaywanpas manan wak dios yupaychana cheqaskunataqa thunirqanchu, chaymi runakunaqa sacrificiota chaypi haywashallarqan, inciensotapas q'apachishallarqanku. 5Señor Diosmi rey Azariasta lepra onqoywan muchuchirqan wañukapunankama, chaymi payqa sapaqllapi wasinpi tiyakurqan, ruwanankunatataq churin Jotam rantinpi ruwarqan, reypa wasinpipas suyu kamachiypipas. 6Azariasmanta wakin willakuykunapas tukuy ruwasqankunamantapas, Judá Reykunaq Willakuynin Qelqapi qelqasqan kashan. 7Azarías wañupuqtinqa, Davidpa Llaqtan nisqapi ayllunpa aya p'ampananpin p'ampapurqanku. Chay qhepatataq churin Jotam rantinpi kamachikurqan. 8Kinsa chunka pusaqniyoqkaq watapi Azarías Judá suyupi kamachikushaqtinmi, Jeroboampa churin Zacariasqa Israel suyupi kamachikuyta qallarirqan. Samariamantan soqta killata kamachikurqan. 9Manapunin Señor Diospa munayninman hinachu ruwarqan, aswanpas ñawpa taytankuna hinan ruwarqan. Manan t'aqakurqanchu Israelta huchallichiq Nabatpa churin Jeroboampa huchankunamanta. 10Jabespa churin Salummi Zacarías contra sayarirqan, hinaspanmi Ibleampi phawaykuspa wañuchirqan, chaymantataq payqa rantinpi kamachikurqan. 11Zacariasmanta wakin willakuykunaqa Israel Reykunaq Willakuynin Qelqapi qelqasqan kashan. 12Chay hinapin hunt'akurqan Señor Diospa rimasqan, paymi Jehuta nisqa: Churiykikunan Israel suyuta kamachinqa nietoykiq nietonkama, nispa. 13Kinsa chunka isqonniyoqkaq watapi Uzías Judá suyupi kamachikushaqtinmi, Jabespa churin Salumqa Israel suyupi kamachikuyta qallarirqan, kamachikurqantaq Samariamanta huk killa hunt'allata. 14Chaymantataq Gadiq churin Manahemqa Tirsamanta Samariaman wicharqan, hinaspa Salumman phawaykuspa wañurqachirqan, paytaq Salumpa rantinpi kamachikurqan. 15Salummanta wakin willakuykunapas Zacarías contra sayarispa wañuchisqanpas Israel Reykunaq Willakuynin Qelqapi qelqasqan kashan. 16Chay tiempopin Manahemqa Tirsa llaqtamanta lloqsispa Tifsa llaqtata runankunantinta muyuriqninpi kashaqkunatawan phawaykurqan. Paykuna llaqta punkuta mana kichayta munaqtinkutaq, llaqtata llat'anarqan, onqoq warmikunatapas llapanta wiksanta khallarqan. 17Kinsa chunka isqonniyoqkaq watapi Azarías Judá suyupi kamachikushaqtinmi, Gadiq churin Manahemqa Israel suyupi kamachikuyta qallarirqan, kamachikurqantaq Samariamanta chunka watata. 18Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta. 19Asiria suyu rey Tiglat-pilesermi Israel suyu contra phawaykurqan, chaymi Manahemqa chay reyman qorqan kinsa chunka kinsayoq waranqa kilo qolqeta, payta yanapananpaq kamachikuyninpi qaqa sayananpaqwan. 20Chay llasaq qolqeta Asiria reyman pagananpaqqa Manahemqa kamachikurqanmi Israelpi llapan qhapaq runakuna yaqa huk kilo qolqeta contribucionta paganankupaq. Chaymi Asiria reyqa llaqtanman kutipurqan, manan Israel suyupi qheparqanñachu. 21Manahemmanta wakin willakuykunapas tukuy ruwasqankunamantapas Israel Reykunaq Willakuynin Qelqapi qelqasqan kashan. 22Wañupusqan qhepatataq churin Pekaía rantinpi kamachikurqan. 23Phisqa chunkakaq watapi Azarías Judá suyupi kamachikushaqtinmi, Manahempa churin Pekaiaqa Israel suyupi kamachikuyta qallarirqan, kamachikurqantaq Samariamanta iskay watata. 24Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta. 25Pekaiataqa kikin oficialnin Remaliaspa churin Pekan pay contra, Argobwan, Ariewan, rimanakuspa Galaad hap'iymanta phisqa chunka qharikunaq yanapasqan reypa wasin pukarapi Pekaiata wañuchirqan, chaymantataq Pekaqa rantinpi kamachikurqan. 26Pekaiamanta wakin willakuykunapas tukuy ruwasqanmantapas Israel Reykunaq Willakuynin Qelqapi qelqasqan kashan. 27Phisqa chunka iskayniyoqkaq watapi Azarías Judá suyupi kamachikushaqtinmi, Remaliaspa churin Pekaqa Israel suyupi kamachikuyta qallarirqan, kamachikurqantaq Samariamanta iskay chunka watata. 28Payqa manapunin Señor Diospa munayninman hinachu ruwarqan, manan t'aqakurqanchu Israelta huchallichiq Nabatpa churin Jeroboampa huchankunamanta. 29Israel suyupi Peka kamachikushaqtinmi Asiria suyu rey Tiglat-pileser Israelman chayarqan, hinaspan munaychakurqan Ijón llaqtata, Abel-bet-maaca llaqtata, Janoa llaqtata, Cedes llaqtata, Hazor llaqtata, Galaad hap'iyta, Galilea hap'iyta, llapan Neftalí hap'iytawan. Chay hap'iykunapi tiyaq runakunatataq kamachipaq Asiriaman aparqan. 30Chaymi Elaq churin Oseasqa Remaliaspa churin Peka contra sayarirqan, hinaspan phawaykuspa wañurqachirqan. Ahinapin Oseasqa Israel suyupi kamachikurqan Pekaq rantinpi, Uziaspa churin Jotam Judá suyupi iskay chunka wata kamachikushaqtin. 31Pekamanta wakin willakuykunapas, tukuy ruwasqankunamantapas Israel Reykunaq Willakuynin Qelqapi qelqasqan kashan. 32Remaliaspa churin Peka iskaykaq watapiña Israel suyupi kamachikushaqtinmi, Uziaspa churin Jotamqa Judá suyupi kamachikuyta qallarirqan, 33iskay chunka phisqayoq watayoq kashaspa. Kamachikurqantaq Jerusalenmanta chunka soqtayoq watata. Maman Jerusaqa Sadocpa ususinmi karqan. 34Jotamqa Señor Diospa munayninman hinan chaninta ruwarqan, taytan Uziaspa ruwasqanta hina. 35Paymi ruwachirqan Señor Dios yupaychana wasiq wichay lado punkunta. Chaywanpas wak'a dios yupaychana cheqaskunaqa manan thunisqachu karqan, chaymi runakunaqa chaypi sacrificiota haywashallarqan, inciensotapas q'apachishallarqanku. 36Jotammanta wakin willakuykunapas tukuy ruwasqankunamantapas Judá Reykunaq Willakuynin Qelqapi qelqasqan kashan. 37Haqay p'unchaykunapin Señor Diosqa Judá suyu contra phawaykunanpaq kacharqan Siria rey Rezinta, Israel rey Remaliaspa churin Pekatawan. 38Jotam wañupuqtinqa, Davidpa Llaqtan nisqapi ayllunpa aya p'ampananpin p'ampapurqanku. Chay qhepatataq churin Ahaz rantinpi kamachikurqan.

will be added

X\