2 Reyes 14

1Israel rey Joacazpa churin Jehoás iskaykaq watapiña Israelpi kamachikushaqtinmi, Joaspa churin Amasiasqa Judapi kamachikuyta qallarirqan. 2Amasiasqa kamachikuyta qallarishaspa iskay chunka phisqayoq watayoqmi karqan, iskay chunka isqonniyoq watataq Jerusalenmanta kamachikurqan. Maman Joadanqa Jerusalenmantan karqan. 3Amasiasqa Señor Diospa munayninman hinan chaninta ruwarqan, ichaqa manan David ñawpa taytan hinapunichu ruwarqan, aswanpas taytan Joaspa ruwasqanta hinan ruwarqan. 4Wak'a dios yupaychana cheqaskunapas manan thunisqachu karqan, chaymi runakunaqa chaypi haywashallarqan sacrificiota, inciensotapas q'apachishallarqankutaq. 5Amasiasqa suyu kamachiyninpi atiyniyoqña kashaspanmi, taytan wañuchiq llapan oficialkunata wañuchirqan, 6ichaqa manan wañuchirqanchu chay wañuchiqkunaq churinkunata. Moisespa qelqasqan kamachikuy simipin Señor Diosqa kamachisqa: Taytakunaqa manan churinkuq huchanmanta wañuchisqachu kanqa, churikunapas manan taytankuq huchanmanta wañuchisqachu kanqa, aswanpas sapankan kikinkuq huchankumanta wañunqaku, nispa. 7Amasiasmi Kachi Wayq'opi chunka waranqa Edom runakunata wañuchirqan, Sela pukaratapas munaychakurqan, chaytan suticharqan Jocteelta, chaytaqmi sutin kapun kunan p'unchaykama. 8Chay qhepatataq Amasiasqa willaqta kacharqan Israel rey Jehupa nieton Joacazpa churin Jehoasman: Qhari kaspaykiqa, hamuy maqanakusun nispa, nimunanpaq. 9Jehoastaq ichaqa kutichirqan: –Huk kutinsi Libanopi huk kisa cedro sach'aman kachasqa: Ususiykita churiypa warminpaq qopuway, nispa. Ichaqa huk phiña animalsi chayninta purispa chay kisata sarurqapusqa. 10Arí, Edom runakunata atiparqankin, chaywanmi hatunchakunki. Allinmi, hatunchakullay, chaywanpas wasillaykipi qhepakuy. ¿Imapaqtaq maskhawaq qan kikiykipaq llakikuyta, hinallataq Judapa llakikuynintapas? nispa. 11Amasiastaq ichaqa mana chay nisqanta kasurparirqanchu. Chaymi Jehoasqa puririrqan, hinan Judapi kashaq Bet-semespi Amasiaswan maqanakurqanku. 12Judá suyutaqa Israel suyun atiparqan, chaymi Judá runakunaqa sapanka wasinkuman ayqekapurqanku. 13Israel rey Jehoastaq Judá rey Amasiasta Bet-semespi presota hap'irqan, chaymantataq Jerusalenta rirqan, chaypin llaqta muyuriq perqata thunirqan Efraín Punkukama Esquina Punkukama, pachak pusaq chunka metrota. 14Hinaspan hap'ikapurqan qorita qolqetapas, hinallataq Señor Dios yupaychana wasipi llapan serviciokunata, reypa wasinpi qhapaq kaykunatapas. Chaymantataq wakin runakunata presota hap'ispa Samariaman kutipurqan. 15Jehoasmanta wakin willakuykunapas ruwasqankunamantapas, atiyninmantapas, Judá rey Amasiaswan maqanakusqanmantapas, Israel Reykunaq Willakuynin Qelqapi qelqasqan kashan. 16Wañupuqtintaq Samariapi p'ampapurqanku, Israel reykuna p'ampasqa qayllaman. Chay qhepatataq rantinpi churin Jeroboam kamachikurqan. 17Judá rey Joaspa churin Amasiasqa chunka phisqayoq watataraqmi kawsarqan Israel rey Joacazpa churin Jehoaspa wañupusqan qhepata. 18Amasiasmanta wakin willakuykunaqa Judá Reykunaq Willakuynin Qelqapi qelqasqan kashan. 19Jerusalenpin Amasías contra runakuna sayarirqanku, chaymi payqa Laquisman pakakuq ayqekurqan, ichaqa chay llaqtakaman qatipaspanku chaypi wañuchirqanku. 20Chaymantataq caballopi ayata aparqanku, hinaspa Jerusalenpi p'ampapurqanku, Davidpa Llaqtan nisqapi ayllunpa aya p'ampananpi. 21Chaymantataq llapan Judá runakunaqa Azariasta taytan Amasiaspa rantinpi reyta churarqanku, Azariasqa chunka soqtayoq watallayoqmi karqan. 22Hinan Azariasqa taytanpa wañukapusqan qhepata Elat llaqtata wakmanta sayarichispa Judá suyuman kutichipurqan. 23Joaspa churin Amasías chunka phisqayoqkaq watapi Judá suyupi kamachikushaqtinmi, Jehoaspa churin Jeroboamqa Israelpi kamachikuyta qallarirqan, kamachikurqantaq Samariamanta tawa chunka hukniyoq watata. 24Manapunin Señor Diospa munayninman hinachu ruwarqan, manan t'aqakurqanchu chhikantapas Israelta huchallichiq Nabatpa churin Jeroboampa huchankunamanta. 25Jeroboamqa Israel suyuq qorpankunatan kutichikapurqan Hamat Q'asamanta Kachi Qochakama, chaytan Israelpa Diosnin Señorqa Gat-hefer llaqtayoq Amitaipa churin profeta Jonaswan willachisqa. 26Señor Diosmi rikurqan Israel runakunaq llapallanku sinchita muchushasqankuta, manataq pillapas yanapaykuq kasqanta. 27Payqa manan yuyaykusqachu Israelpa sutin kay pachapi ch'usaqyachisqa kananta, chaymi Jehoaspa churin Jeroboamwan Israelta qespichirqan. 28Jeroboammanta wakin willakuykunapas tukuy ruwasqanmantapas, atiyninmantapas, awqankunawan maqanakusqanmantapas, Judá suyuq qechuchikusqan Damascota, Hamat-tapas, imaynatachus Israel suyuman kutichipusqanmantapas, Israel Reykunaq Willakuynin Qelqapi qelqasqan kashan. 29Jeroboam wañupuqtinqa, Israel reykunaq aya p'ampananpin p'ampapurqanku. Chay qhepatataq churin Zacarías rantinpi kamachikurqan.

will be added

X\