2 Reyes 11

1Ocoziaspa maman Atalian churin Ocoziaspa wañusqanta yachaspa, llapanta rey t'aqa aylluta wañuchirqan. 2Rey Jorampa ususin, Ocoziaspa panan Josaban ichaqa Ocoziaspa churin Joasta t'aqarqan Ocoziaspa wakin wawankunata wañuchishasqanmanta, hinaspan Ataliamanta pakarqan puñunan wasipi wawa amanitawan kuskata. Chay hinapin Joastaqa mana wañuchirqanchu. 3Payqa pananpapi tiyaspanmi Señor Dios yupaychana wasipi soqta wata pakasqa karqan. Chaykamataq Ataliaqa suyuta kamachisharqan. 4Qanchiskaq watapitaq Joiadaqa waqyachimurqan Caremanta pachak soldadoq umallinkunata, pachak guardiaq umallinkunatawan, hinaspa Señor Dios yupaychana wasiman pusaykurqan. Chaypin paykunata jurachirqan hinaspa rimanakurqanku, chaymantataq reypa churin Joasta rikuchirqan. 5Hinaspan paykunata kamachirqan: –Kay hinatan ruwankichis, mayqenkunamanchus samana p'unchaypi llank'anaykichispaq tupasunkichis chayqa, qankunan kinsaman t'aqakunkichis, hinaspa huk t'aqa reypa wasinta waqaychaychis, 6huk t'aqataq Shur punkupi kashaychis, hukkaq t'aqataq yupaychana wasi guardiakunaq tiyanan wasiq qhepan punkupi kashaychis. 7Samana p'unchaypi llank'anamanta lloqsiqkunan, qankuna iskay t'aqa kankichis, Dios yupaychana wasita makilla qhawankichis reyta waqaychanaykichispaq. 8Hinaspa reyta muyuykunkichis, sapanka makiykichispi armayoqkama, pipas qankunaman asuykuqtaqa wañuchinkichismi. Qankunan reyta maytaña puriqtinpas riysinkichis, nispa. 9Hinan pachak soldado kamachiqkunaqa sacerdote Joiadaq kamachisqanman hina lliwta ruwarqanku. Chaymi pachak soldadoq umallinkunaqa samana p'unchaypi llank'ananpaq riq soldadonkunatapas llank'ananmanta samapunanpaq ripuq soldadonkunatapas huñurqanku, hinaspataq sacerdote Joiadaman asuykurqanku. 10Hinan sacerdote Joiadaqa pachak soldadoq umallinkunaman qorqan lanzakunata, escudokunatawan. Chay armakunaqa rey Davidpan kasqa, Señor Diosta yupaychana wasipitaq kasharqan. 11Soldadokunataq makinkupi armantinkama reypa muyuriqninpi sayarqanku, paykunaqa altar qayllapin kasharqanku yupaychana wasiq wichay ladonmanta uray ladonkama. 12Hinan Joiadaqa reypa churinta horqomurqan, hinaspa payman coronata churarqan, reypa imachus ruwanan qelqatawan qorqan. Chaymantataq rey kasqanta rimarirqanku, hinaspa aceitewan hawirqanku. Chaymi llapanku t'aqllakuspa qaparirqanku: ¡Kawsachun rey! nispanku. 13Ataliataq guardiakunaqpas runakunaqpas qaparisqanta uyarispa, Señor Dios yupaychana wasipi kashaq runakunaman rirqan. 14Hinaspan payqa chaypi reyta rikurqan tusa qayllapi sayashaqta, imaynachus ruwana karqan chayman hina. Paywan kuskataq umallikuna corneta tocaqkuna kasharqanku, runakunapas ancha kusisqa trompetata tocasharqanku. Chaymi Ataliaqa p'achanta llik'ikuspa, qaparirqan: –¡Q'otukuymi kayqa! ¡Q'otukuymi kayqa! nispa. 15Joiadaqa manan yupaychana wasipi Ataliata wañuchinata munarqanchu, chaymi ejército umallikunata kamachirqan: –¡Guardiakunaq chawpinta hawaman horqoychis, pipas hark'akuqtataq wañuchiychis! nispa. 16Hinan Ataliata hap'ispa, reypa wasinman caballokunaq haykunan punkunta apaykuspa chaypi wañuchirqanku. 17Chay qhepatataq Joiadaqa reyta runakunatawan nirqan: –Señor Dioswan rimanakuychis paypa llaqtan kanaykichispaq, nispa. Hinan paykunaqa ahinata ruwarqanku. Chaymantataq reytawan runakunatawan rimanachirqan. 18Chaymi llapanku Baal dios yupaychana wasita rirqanku, hinaspa thunirqanku, idolonkunatapas altarninkunatapas hukpaqkama ñut'urqanku. Baalpa sacerdoten Matantataq altarpa qayllanpi wañuchirqanku. Hinamantataq sacerdote Joiadaqa Señor Dios yupaychana wasiman guardiakunata churarqan, 19hinaspataq payqa pachak soldadoq umallinkunapiwan, Caremanta soldadokunapiwan, guardiakunapiwan, llapan runakunapiwan reyta riysirqanku Señor Dios yupaychana wasimanta reypa palacionkama. Guardiakunaq haykunan punkutataq haykurqanku. Rey Joastaq kamachikuy tiyanapi tiyaykurqan, 20hinan llapa runakuna kusikurqanku. Ataliataqa reypa kamachikunan wasipi wañuchirqankuña, chaymi llaqtaqa thak-nisqa kapurqan. 21Joasqa qanchis watayoqmi karqan kamachikuyta qallarishaspa.

will be added

X\