2 Crónicas 9

1Sabá suyu reinaqa Salomonpa mentasqa kasqanta uyarispanmi, Jerusalenta rirqan sasa tapukuykunawan Salomonta wateqananpaq. Hinan chayarqan askha runakunapiwan, apamurqantaq camellokunapi q'apaq hawinakunata, askha qorita, umiña rumikunata ima. Salomonman asuykuspataq sonqonpi tukuy yuyaykusqanta tapukurqan. 2Hinan Salomonqa tukuy tapukusqanta kutichirqan, sinchi sasaña kaqtinpas payqa mana sasachaspallan kutichirqan. 3Sabá suyu reinaqa Salomonpa yachaynintan uyarirqan, sayarichisqan wasitapas qhawarqan. 4Hinallataq rikurqan mesapi sumaq mikhunakunata, oficialninkunaq tiyasqan wasikunata, kamachinkunaq imayna llank'asqankutapas p'achankutapas, ukyana haywaqninkunata p'achankutapas, Señor Diospa wasinpi ruphachina sacrificiota haywasqantapas. Chaykunata rikuspanmi musphaspa chiriyarqan. 5Hinaspan rey Salomonta nirqan: –Llaqtaypi kashasparaq ruwasqaykimanta yachayniykimantawan uyarisqayqa cheqaqpunin kasqa. 6Runakunaq rimasqantaqa manan cheqaqpaqchu hap'irqani, kunanmi ichaqa ñawiykunawan rikuspa creeni. Chaywanpas qanmantaqa manan kuskantapas willawasqakuchu, yachayniykipas qhapaq kayniykipas willawasqankumantaqa ancha hatunraqmi kasqa. 7¡Kusisamiyoqchá runaykikunapas! ¡Ancha kusisqachá oficialniykikunapas! ¡Paykunaqa qayllaykipi kaspankun uyarishallankupuni yachaysapa simiykikunata! 8¡Diosniyki Señor Dios hatunchasqa kachun! Paymi sumaqta qhawarirqasunki, chaymi Israel suyuta paypaq kamachinaykipaq churarqasunki. Señor Diosqa Israel llaqtanta munakunpunin, waqaychayllatapunitaq munanpas, chaymi reyta churarqasunki chanin-kaywan kuskachaywan kamachinaykipaq, nispa. 9Hinaspanmi reinaqa Salomonman qorqan yaqa tawa waranqa kilo qorita, ancha askha q'apaq hawinata, umiña rumikunatawan. Manan hayk'aqpas Israelpiqa karqanchu Sabá suyu reinaq Salomonman qosqan sumaq q'apaq hawina hinaqa. 10Hirampa runankunan Salomonpa runankunapiwan Ofirmanta qorita aparqanku, sándalo kurkukunata, umiña rumikunatapas apallarqankutaq. 11Chay sándalo kurkuwanmi reyqa ruwachirqan seqana gradasta Señor Diospa wasinpaqpas paypa wasinpaqpas. Tocaqkunapaqpas ruwachillarqantaq arpakunata tawtinkukunatawan. Judá suyupiqa manan hayk'aqpas chay hinakunaqa rikukurqanchu. 12Rey Salomonqa Sabá suyu reinamanmi tukuy munasqanta mañakusqantawan qorqan paypa regalo apamusqanmantaqa aswan askhataraq. Chaymantataq reinaqa suyunman kutipurqan kamachinkunapiwan. 13Salomonqa sapa watan iskay chunka iskayniyoq waranqa kilo qorita chaskirqan, 14hinallataq qhatuqkunapas, rantiqkunapas contribucionta pagarqan, llapan Arabia reykunapas, suyupi kamachikuqkunapas qorita qolqeta aparqanku. 15Rey Salomonqa iskay pachak hatun escudokunatan ruwachirqan, sapanka escudotataq qanchis kilo qori llaphllawan qatachirqan. 16Ruwachillarqantaq kinsa pachak huch'uy escudokunata, sapankatataq kinsa kilo kuskannin qori llaphllawan qatachirqan. Hinaspan chaykunata churachirqan Líbano Sach'a-sach'a nisqa wasiman. 17Hinallataq marfilmanta huk hatun tiyanata ruwachikurqan, hinaspan ch'uya qoriwan qatachirqan. 18Chay tiyanaqa soqta pata seqanayoqmi karqan, kallarqantaq qorimanta ruwasqa chaki sarunanpas. Tiyanaq iskaynin ladonpitaq maki tawnakunan karqan, chaywan kuskataq sayashaq iskay leonkunaq rikch'aynin karqan. 19Chay soqta pata seqanaq iskaynin lado cantonpin sapanka patapi leonpa rikch'aynin karqan, llapanpiqa chunka iskayniyoq leonkunan karqan. Chay hina tiyanataqa manan hayk'aqpas mayqen suyupipas ruwachikurqankuchu. 20Reypa llapan vasonkunapas qorimantakaman karqan, hinallataq Líbano Sach'a-sach'a nisqa wasipi llapan serviciokunapas qorimantakaman karqan. Manan imatapas qolqemantaqa ruwarqankuchu, Salomonpa tiemponpi qolqe mana munasqa kasqanrayku. 21Salomonpaqa lamar-qochanta Tarsisman puriq barconkunan karqan, chaykunatan Hirampa runankuna purichirqan. Sapa kinsa watataq Tarsismanta barcokunapi apamurqanku qorita, qolqeta, marfilta, k'usillukunata, pavo realkunatawan. 22Rey Salomonqa tukuy kay pachapi reykunamanta allin qhapaqmi allin yachaysapataq karqan. 23Chaymi lliw kay pacha reykuna Salomonwan tupayta munarqanku, Diospa qosqan yachayninta uyarinankupaq. 24Watan-watanmi payman rirqanku, sapanka sumaq sonqota aparikuspa: qorita, qolqeta, alhajakunata, p'achakunata, armakunata, q'apaq hawinakunata, caballokunata, mulakunata ima. 25Salomonpaqa karqanmi tawa waranqa establonkuna, caballokunata carretakunatawan waqaychananpaq. Kallarqantaqmi chunka iskayniyoq waranqa caballopi sillakuqkunapas. Chaykunatan wakinta maqanakuypaq carretakuna waqaychana llaqtakunaman apachirqan, wakintataq Jerusalén llaqta qayllapi waqaycharqan. 26Payqa llapan reykunatan kamachirqan Eufrates mayumanta Filistea suyukama, Egipto qorpakama. 27Rey Salomonqa sinchi askhatan Jerusalenpi qolqeta rumita hinaraq hunt'aykachirqan, cedro kurkukunatapas Shefela moqo-moqopi k'ita higos sach'ata hinaraq. 28Caballokunatapas Salomonpaqqa rantirqanku Egiptomanta llapan suyukunamantawan. 29Salomonmanta wakin willakuykunaqa qallariymanta tukukuykaman Profeta Natanpa Qelqanpi, Silomanta Profeta Ahiaspa Qelqanpi, Profeta Iddoq Qelqanpiwan qelqasqa kashan. Profeta Iddoqa qelqallarqantaqmi Nabatpa churin Jeroboammanta rikhuriypi rikusqanta. 30Salomonqa llapa Israel suyupin kamachikurqan Jerusalenmanta tawa chunka watata. 31Wañukapuqtintaq taytan Davidpa Llaqtan nisqapi p'ampapurqanku, rantinpitaq churin Roboam kamachikurqan.

will be added

X\