2 Crónicas 8

1Salomonqa iskay chunka watapin Señor Diospa wasinta kamachikunan wasitawan sayarichirqan, 2Chay qhepatataq payqa Tiro rey Hirampa qosqan llaqtakunata wakmanta sayarichirqan, hinaspa Israel runakunata chaypi tiyachirqan. 3Chaymantataq Salomonqa Hamat Soba contra phawaykurqan, hinaspa munaychakurqan. 4Ch'inneqpi Tadmor llaqtata yaparqan, hinallataq Hamat suyupi sayarichisqan mikhuy taqena llaqtakunatapas yaparqan. 5Wichay Bet-horonta Uray Bet-horontawan wakmanta sayarichirqan, chay llaqtakunan pukara llaqtakuna kapurqan, muyuriq perqayoq, punkukunayoq, wisq'anakunayoq ima. 6Sayarichillarqantaqmi Baalat-ta, mikhuy taqena llapan llaqtakunata, maqanakuypaq carreta waqaychana llaqtakunata, caballo uywana llaqtakunatawan, hinallataq ruwarqan hayk'an munasqanta Jerusalén llaqtapi, Líbano orqo-orqokunapi, kamachisqan suyuntinpipas. 7Chay qhepaq runakunan karqanku: Amor runakuna, Het runakuna, Ferez runakuna, Hev runakuna, Jebus runakunapiwan. Paykunaqa manan Israel runakunachu karqanku, 8paykunaq mirayninmi qhepakusqaku Israel runakunaq mana ch'usaqyachisqan. Salomonmi paykunata mit'anipi llank'achirqan, ahinapin Israel runakunaq kamachin kapurqanku kunan p'unchaykama. 9Israel runakunataqa manan ch'ullatapas Salomonqa kamachipi llank'achirqanchu, aswanpas paykunaqa karqanku soldadokuna, ejército umallikuna, carretakunata purichiqpa umallinkuna, caballopi sillakuq soldadokunata kamachiqkuna ima. 10Salomonpa llank'aqninkunata kamachiqkunan karqan iskay pachak phisqa chunka. 11Chaymantataq Salomonqa Davidpa Llaqtan nisqamanta Egipto rey Faraonpa ususin warminta paypaq ruwapusqan wasiman pusarqan. Salomonqa nirqanmi: Manan warmiyqa Israel rey Davidpa wasinpi tiyanmanchu, Señor Diospa rimanakuynin arcan chaypi karqan, chayraykun chay cheqasqa ch'uya, nispa. 12Hinaspanmi Salomonqa punku qhawaypi ruwasqan altar patapi Señor Diosman ruphachina sacrificiokunata haywarqan. 13Moisespa kamachikuyninman hinan Señor Diospaq t'aqasqa p'unchaykunapi Salomonqa sacrificiota haywarqan: samana p'unchaykunapi, Mosoq Killa Fiestakunapi, Mana Qonchuyoq T'anta Fiestapi, Semanakuna nisqa Cosecha Fiestapi, Ch'uklla Ruwana Fiestapiwan. 14David taytanpa kamachikuyninman hinan sacerdotekunata churarqan tupaqninman hina llank'anankupaq, Leví runakunatapas churarqan sapa p'unchay yupaychaypi umallinankupaq, sacerdotekunata yanapanankupaqwan, hinallataq punku qhawaqkunatapas tupaqninman hina sapanka punkuman churarqan. Chay hinatan Dios sonqo runa Davidpa kamachikusqanta lliwta ruwarqanku. 15Manataq chhikantapas p'akirqankuchu sacerdotekunapaq Leví runakunapaq kamachikuyninta, manallataq qolqe waqaychanamanta kamachikuynintapas. 16Chay hinatan Salomonqa tukuy llank'ayta tukurqan, Señor Diospa wasin teqsi churasqa p'unchaymantapacha lliw tukukunankama. 17Chaymantataq Salomonqa Edom suyupi lamar-qocha qaylla Ezión-geber llaqtata Elat llaqtatawan rirqan. 18Rey Hirammi oficialninkunaq kamachisqan barcokunata Salomonman apachirqan, lamar-qocha allin reqsiq barco purichiqkunatapas. Paykunan Salomonpa runankunapiwan Ofirta rispa chaymanta chunka tawayoq waranqa kilo qorita cargamurqanku, hinaspa rey Salomonman aparqanku.

will be added

X\