1 Mañakuyta Salomón tukuqtintaq hanaq pachamanta nina rawray uraykamurqan, hinaspan ruphachina sacrificiota, huk sacrificiokunatapas rupharqan. Wasitataq Señor Diospa qhapaq-atiynin hunt'aykurqan. 2 Chaymi sacerdotekunaqa Señor Diospa wasinta mana haykuyta atirqankuchu, paypa qhapaq-atiynin wasiman hunt'aykusqanrayku. 3 Hinan llapan Israel runakunaqa Señor Diospa qhapaq-atiyninta wasi patapi rikuspa, hanaq pachamanta rawray uraykamuqtawan rikuspa, llusk'achasqa pampapi qonqoriykukuspa pampakama k'umuykukurqanku. Hinaspa Señor Diosta yupaycharqanku hatuncharqanku: –Señor Diosqa allinmi, khuyakuyninqa wiñaypaqmi, nispanku. 4 Chaymantataq rey Salomonpas llapan Israel runakunapas Señor Diosman sacrificiota haywarqanku. 5 Salomonmi sacrificiota haywarqan iskay chunka iskayniyoq waranqa torokunata, pachak iskay chunka waranqa ovejakunatawan. Ahinatan payqa llapan Israel runakunapiwan Dios yupaychana wasita sapaqcharqanku. 6 Llapan Israel runakunan sayasharqanku. Leví runakunataq Señor Dios yupaychana tocanakunayoq sayananku cheqaspi kasharqanku. Sacerdotekunataq Leví runakunaq chimpanpi cornetata tocasharqanku. Leví runakunaq tocanankunaqa rey Davidpa ruwasqanmi karqan. Rey David Señor Diosman graciasta qoshaqtinmi, chay tocanakunataqa tocasqaku. 7 Señor Dios yupaychana wasiq ñawpaqenpi kaq Salomonpa ruwasqan bronce altarqa huch'uymi karqan, manataq chaskirqanchu llapan ruphachina sacrificiokunata, ruru ofrendakunata, sumaq kawsay sacrificioq wirankunatapas. Chaymi Salomonqa wasiq ñawpaqen patio chawpita ch'uyancharqan, hinaspa chaypi ruphachina sacrificiokunatapas sumaq kawsay sacrificioq wirankunatapas haywarqan. 8 Hinan Salomonqa llapan Israel runakunapiwan Ch'uklla Ruwana Fiestata qanchis p'unchay ruwarqanku, Hamat Q'asamanta Egipto qorpakama tiyaq llapan Israel runakunan chay fiestaman askhallaña huñuykukurqanku. 9 Qhepantin p'unchaypitaq hatun huñukuy karqan. Paykunaqa qanchis p'unchaymi altarta sapaqcharqanku, huk qanchis p'unchaytaq Ch'uklla Ruwana Fiestata ruwarqanku. 10 Wataq qanchiskaq killan iskay chunka kinsayoq p'unchaypitaq Salomonqa llapan runakunata wasinkuman kachapurqan, chaymi paykunaqa sonqopas-sonqo ripurqanku, Davidpaqpas Salomonpaqpas llapan paykunapaqpas Señor Diospa allinta ruwasqanrayku. 11 Salomonqa Señor Dios yupaychana wasitapas kamachikunan wasitapas sayarichiyta tukuspanmi, chay wasikunapi tukuy imaymana munasqanta ruwarqan. 12 Chay qhepatataq huk tuta Señor Diosqa Salomonman rikhurispa nirqan: –Uyarinin mañakuyniykita, kay yupaychana wasitapas akllakunin sacrificiota chaypi haywawanankupaq. 13 Llaqtaymanpas suyumanpas ch'akiriyta, pasto q'araq langostakunata, millay onqoytapas chayachiqtiy, 14 yupaychawaqniy akllakusqay llaqtay huch'uyyaykukuspa tukuy sonqo mañakuwanqa, mana chanin ruwasqanmantapas ñoqaman kutirikamuwanqa chayqa, hanaq pachamantan ñoqa uyarimusaq, huchankutapas pampachasaqmi, hallp'ankutapas allinyachisaqmi. 15 Kunanmantaqa kay cheqasta qhawashallasaqpunin, chaypi mañakusqankutapas makillan uyarisaq. 16 Kay wasitan akllakurqani, ch'uyancharqanitaq wiñaypaq chaypi yupaychawanankupaq, kay wasitaqa qhawashallasaqmi manataq qonqasaqchu. 17 Chay hinaqa, ñawpaqeypi chaninta kawsanki David taytayki hina, qanta kamachirqayki chaykunata lliwta kasukuspa, chaninchayniykunatapas, unanchayniykunatapas hunt'anki chayqa, 18 suyupi kamachikuyniykitaqa wiñaypaqmi takyachisaq, imaynan David taytaykiwan rimanakurqani: Mirayniykiqa Israel suyupi kamachishallanqapunin, nispa chayman hina. 19 Ichaqa kamachikuyniyta unanchayniyta wikch'uspa ñoqamanta t'aqarikunkichis, hinaspa wak dioskunata yupaychaspa servinkichis chayqa, 20 tiyanaykichispaq qosqay hallp'aymantan wikch'usqaykichis, yupaychawanaykichispaq ch'uyanchasqay wasitapas wikch'usaq, chaymi llapa llaqtakunaq pisichasqan asipayasqan kanqa. 21 Ancha sumaqña kay wasi kashan chaypas, llapan chayninta puriq runakunan sinchita llaksakuspa ninqaku: ¡Achacháw! ¿Imanaqtintaq Señor Diosqa kay suyutapas kay yupaychana wasitapas kay hinata ruwarqan? nispanku. 22 Hinan kutichinqaku: Egipto suyumanta ñawpa taytankuta horqomuq Diosninku Señor Diostan wasanchasqaku, wak dioskunatataq yupaychaspa servisqaku, chaymi Señor Diosqa chay hatun llakiwan paykunata muchuchisqa, nispa.
