1 Hinan Salomonqa nirqan: –Señor Diosníy, qanqa ati-phuyu ukhupi tiyaqmi kanki, 2 ñoqataqmi sumaq qhapaq wasita ruwapuyki, chaypi wiñayta tiyanaykipaq, nispa. 3 Chaymantataq rey Salomonqa huñuykusqa sayashaq llapan Israel runakunaman kutirispa paykunata samincharqan. 4 Nillarqantaq: Saminchasqa kachun Israelpa Diosnin Señorqa, pay kikinmi taytay Davidman prometesqanta hunt'arqan, paymi nisqa: 5 Egipto suyumanta llaqtayta horqomusqay p'unchaymantapacha manan Israel suyupi mayqen llaqtatapas akllakurqanichu, chaypi wasita sayarichipuwaspaykichis ñoqata yupaychawanaykichispaq, manallataq mayqen qharitapas akllakurqanichu Israel llaqtayta kamachinanpaq. 6 Aswanpas kunanmi Jerusalén llaqtata akllakuni chaypi ñoqa yupaychasqa kanaypaq, qantataq David akllakuyki Israel llaqtayta kamachinaykipaq, nispa. 7 Chaymi David taytayqa sonqonpi yuyaykukusqa Israelpa Diosnin Señorta yupaychanapaq wasita sayarichiyta. 8 Señor Diostaq ichaqa taytay Davidta nisqa: Allinmi huk wasita sayarichipuwanaykipaq yuyaykukusqaykiqa, 9 ichaqa manan qanqa sayarichiwaqchu, aswanpas churiykin ñoqapaq huk wasita sayarichipuwanqa, nispa. 10 Chay hinaqa, hunt'arqanmi Señor Diosqa prometesqanta, chaymi kunan nisqanman hina David taytaypa rantinpi Israel suyu kamachikuy tiyanapi tiyaykuni, hinaspa Israelpa Diosnin Señorpaq huk wasita sayarichipurqani. 11 Chaypin churaykuni Israel llaqtawan Señor Diospa rimanakusqan arcata, nispa. 12 Chaymantataq llapan Israel runakuna qayllapi Salomonqa Señor Diospa altarnin ñawpaqenpi sayaykuspa makinta altoman haywarirqan. 13 Salomonqa chawpi patiopin broncemanta sayana patata ruwachisqa, chaymi wask'anpas anchonpas iskay metro iskay chunka centímetro karqan, sayayninmantaq huk metro kinsa chunka phisqayoq centímetro karqan. Salomonqa chay pataman seqaspanmi qonqoriykukurqan llapan Israel runakunaq rikushasqan, altoman makinta haywarispataq mañakurqan: 14 Israelpa Diosnin Señor, manan kanchu hanaq pachapipas kay pachapipas qan hina Diosqa. Qanqa rimanakusqaykita hunt'aqmi kanki, munakushallankipunin tukuy sonqo serviqniykikunataqa. 15 Kamachiyki taytay Davidman prometesqaykitapas hunt'arqankin, simiykiwan rimarisqaykitapas kunanmi hunt'anki. 16 Chay hinaqa, Israelpa Diosnin Señor, hunt'allaytaq taytayman prometesqaykita, qanmi nisqanki: Churiykikunachus allinta kawsanqaku, imaynan qan ñawpaqeypi kawsarqanki hinata chayqa, mirayniykiqa Israel suyupi kamachishallanqapunin, nispa. 17 Chay hinaqa, Israelpa Diosnin Señor, kamachiyki taytay Davidman prometesqaykita hunt'allaypuni. 18 Ichaqa, ¿cheqaqtachu qan Diosqa kay pachapi runakunawan tiyawaq? Hanaq pachapas ancha hatun kashaspa manan chaskiyta atisunkichu, ¿chaychu qanqa kay huch'uy wasi sayarichisqaypi tiyawaq? 19 Chaywanpas, Diosníy Señor Dios, uyariykuway mañakusqayta khuyapayawanaykipaq valekusqaytapas. Uyariykuway, kunanmi kay kamachiyki mañakamuyki waqyakamuyki. 20 Tuta-p'unchay kay wasita qhawashallaypuni, qanqa nirqankin: Chaypin kashasaq, nispa. Maypiña kashaspaypas kay wasi qhawarisqa mañakuqtiyqa uyariykullawankipuni. 21 Hinallataq Israel llaqtaykitapas ñoqatapas kay wasi qhawarisqa mañakuqtiykuqa, uyariykullawankikupuni, hanaq pacha tiyanaykimanta uyariykamullawankiku, pampachaykuwankikutaq. 22 Pipas runamasinpa huchachasqan kaspa, kay wasipi altarniykipi jurachinkuman mana huchayoq kasqanta chayqa, 23 hanaq pachaykimanta uyariykamuy, hinaspa juzgay kamachiykikunata. Huchayoqtaqa wanachiy mana chanin ruwasqanmanta muchuchispayki, mana huchayoqtataq chaninchayman hina sut'inchay chanin kasqanta. 24 Qan contra huchallikusqan hawa Israel llaqtaykita awqanku atipanman, hinataq paykuna qanman kutirikuspa yupaychasunkiman, kay wasipi mañakuspataq pampachayta valekusunkiman chayqa, 25 uyariykamuy hanaq pachaykimanta, huchankutapas pampachaykuy hinaspa ñawpa taytankuman qosqayki hallp'aman kutichimpuy. 26 Llaqtaykiq qan contra huchallikusqan hawa ch'akirinman manataq paramunmanchu, ichaqa kay wasi kutirisqataq mañakunkuman, yupaychasunkikuman, muchuchiqtiykitaq huchankuta wikch'unkuman chayqa, 27 uyariykamuy hanaq pachaykimanta, pampachaykuy Israel llaqta kamachiykikunaq huchanta, hinaspa yachachiy allin chanin ñanta purinankupaq, hinallataq llaqtaykiman herenciapaq qosqayki hallp'amanpas parachiy. 28 Yarqaypas, millay onqoypas, ruphashaq wayrapas, polvillopas, langostapas, yura mikhuq kurupas, llaqtaykuta muyuykuspa phawaykuq awqaykupas, ima onqoypas, sasachakuypas kay suyupi kanman chayqa, 29 uyariykamuy mañakusqankuta. Llaqtaykimanta mayqen runapas, mana chayqa llapan llaqtapas sonqonpi llakikuspa makinta kay wasi ladoman haywarispa mañakusunkiman chayqa, 30 uyariykamuy hanaq pacha tiyanaykimanta, huchankutataq pampachaykuy, juzgaspaykitaq sapankaman ruwasqanman hina qopuy. Qan sapallaykin runakunaq sonqontapas yuyaykuynintapas reqsinki. 31 Ahinapin ñawpa taytaykuman qosqayki hallp'api tiyaspanku tukuy tiempo paykunaqa manchakuywan yupaychasunki, munayniykitataq ruwanqaku. 32 Mayqen wak llaqtayoqpas mentasqa kasqaykita uyarispa, musphana ruwasqaykita yachaspa karu llaqtamanta hamunman, hinaspa kay wasiykipi mañakusunkiman chayqa, 33 uyariykamuy hanaq pacha tiyanaykimanta, hinaspa tukuy mañakusqasuykita qoykuy, llapan kay pacha suyukuna reqsinasuykipaq, hinaspa Israel llaqtayki hina manchakuywan yupaychanasuykipaq. Ahinapin yachanqaku kay ruwapusqay wasipi sutiyki yupaychasqa kasqanta. 34 Llaqtaykita awqa-tinkuyman kachaqtiyki, maypi kasqankupitaq akllakusqayki llaqta lado kutirisqa, kay ruwapusqay wasiyki lado kutirisqa mañakunkuman chayqa, 35 mañakusqantapas valekusqantapas hanaq pachamanta uyariykamuy, hinaspa awqankuta atipachiy. 36 Manan pipas mana huchallikuqqa kanchu, chayrayku llaqtayki qan contra huchallikuqtin, k'arakta phiñakuspayki awqankuman hap'iykachiwaq suyunkuman presota apanankupaq, karumanpas qayllamanpas, 37 hinataq preso apasqa kasqanku suyupi qanman kutirikuspa valeykukusunkikuman: Huchallikurqaykun, mana chanintan ruwarqayku, huchachasqan kayku, nispanku, 38 chaypitaq tukuy sonqo tukuy alma qanman kutirikunkuman, hinaspataq ñawpa taytaykuman qosqayki suyu ladoman, akllakusqayki llaqta ladoman, ruwapusqay wasi ladoman kutirispa mañakusunkikuman chayqa, 39 mañakusqankutapas valekusqankutapas hanaq pacha tiyanaykimanta uyariykamuy, hinaspa qespichiy. Llaqtaykiq qan contra huchallikusqantapas pampachaykuy. 40 Kunanqa, Diosníy, qhawarimuwayku, uyariykullawaykupuni kay cheqasmanta llaqtayki qanman mañakamuqtin. 41 Diosníy Señor Dios, sayariy, kay samakunayki cheqasman hamuy, qanpas atiyniykita rikuchiq arcapas. Señor Diosníy, sacerdoteykikunata saminchashallaypuni, qan sonqo runaykikunapas munakuyniykipi kusikuchunku. 42 Señor Diosníy, amapuni wikch'uwaychu, akllakusqayki reymi kani, yuyarikuy kamachiyki Davidman khuyapayanaykipaq prometesqaykita, nispa.
