2 Crónicas 5

1Señor Diospa wasinpaq tukuy serviciokunata ruwachiyta tukuspataq, Salomonqa taytan Davidpa t'aqasqan qorita, qolqeta, llapan serviciokunatawan Diospa wasinpi qhapaq kay churana wasiman churachirqan. 2Chaymantataq rey Salomonqa Jerusalén llaqtapi huñuykurqan Israelpi llapan kurak runakunata, llapan ayllu umallikunata, familia umallikunatawan, Señor Diospa rimanakuynin arcata Davidpa Llaqtan nisqa Sionmanta apanankupaq. 3Hinan llapan Israel qharikuna rey Salomonwan huñukurqanku qanchiskaq killapi Ch'uklla Ruwana Fiestapi. 4Israelpi kaq llapan kurak runakuna huñukuqtintaq, Leví runa sacerdotekunaqa rimanakuy arcata hoqarirqanku, 5hinaspa Dioswan Tupana Karpata, karpapi kaq llapan ch'uya serviciokunatawan aparqanku Dios yupaychana wasiman. 6Hinan rey Salomonqa paywan huñukuq llapan qharikunapiwan rimanakuy arcaq ñawpaqenpi askha ovejakunata torokunatawan sacrificiota haywarqanku, chaykunan mana yupay atiy karqan. 7Chaymantataq sacerdotekunaqa Señor Diospa rimanakuynin arcata yupaychana wasi ukhuman apaykurqanku Ch'uyay-ch'uya Cheqaskama, hinaspa churaykurqanku querubinkunaq raphran uraman. 8Chay querubinkunaqa mast'arisqa raphrayoqmi karqan, raphrankunan rimanakuy arcata wantuna k'aspitapas pakarqan. 9Wantuna k'aspikunaqa sinchi hatunmi karqan, chaymi k'aspikunaq puntan Ch'uya Cheqasmanta rikukurqan, yupaychana wasi punkumantan ichaqa mana rikukurqanchu, ahinapin chay k'aspikunaqa qhepakapurqan. 10Rimanakuy arcapiqa iskay p'alta rumillan karqan. Israel runakuna Egipto suyumanta lloqsimuqtinmi, Señor Diosqa paykunawan rimanakusqa, chay p'alta rumikunatan Moisesqa arcaman Horebpi churaykusqa. 11Chaypi kashaq sacerdotekunaqa ch'uya cheqasmantan lloqsimurqanku paykunaqa llapallanmi ch'uyanchakurqankuña, t'aqa-t'aqa llank'ayninkuta saqerispa. 12Leví ayllumanta llapan takiqkunan chaypi karqan: Asaf, Hemán, Jedutún, churinkuna, wawqenkunapiwan. Sumaq lino p'achawan p'achasqa, paykunan altarpa inti lloqsimuy ladonpi sayasharqanku, platillota, arpata, tawtinkutawan tocaspanku. Paykunawanmi kashallarqantaq pachak iskay chunka sacerdotekuna cornetata tocaspanku. 13Cornetata, platillota, wak tocanakunatapas tocaqtinkutaq, tocaqkunapas, takiqkunapas huk kunkalla takiykurqanku, Señor Diosta yupaychaspanku, payman graciasta qospanku ima: –¡Señor Diosqa allinmi! ¡Khuyapayakuyninqa wiñaypaqmi! nispa. Chay raton Dios yupaychana wasita phuyu hunt'aykurqan. 14Chaymi wasiqa Señor Diospa qhapaq-atiyninwan hunt'a karqan, chay hawataq sacerdotekunaqa mana wasipi serviyta atirqankuchu.

will be added

X\