2 Crónicas 4

1Ruwachillarqantaqmi Salomonqa huk bronce altarta, wask'anmanpas anchonmanpas isqon metrotakama, sayayninmantaq tawa metro kuskanninta. 2Unuyachisqa broncemanta hatun muyu qochata ruwachirqan. Huk wirp'amanta huk wirp'akamataq tawa metro kuskannin karqan, sayaynintaq iskay metro iskay chunka phisqayoq centímetro karqan, muyuntaq chunka kinsayoq metro kuskannin karqan. 3Unu qochaq muyuriq wirp'an urapi toroq rikch'aynin iskay wachu ruwasqa karqan, iskay chunka toro rikch'aykuna sapanka metropi. Chay rikch'aykunaqa qochawan k'aska hich'asqan karqan. 4Qochaqa chunka iskayniyoq sayashaq bronce toro patapin tiyarqan, chay torokunan qhawarqan kinsa wichayta, kinsa urayta, kinsa inti lloqsimuyta, kinsataq inti haykuyta, qhepa chakinkunaqa qochaq tiyananpin karqan. 5Qochaq rakthanqa huk t'aqllan karqan, wirp'antaq hawaman q'empisqa karqan, hamanq'ay t'ika hina. Chay qochaqa soqta chunka soqtayoq waranqa litro unutan chaskirqan. 6Chunka huch'uy qochakunatan ruwachirqan, chaykunatan churarqan yupaychana wasiq uray ladonpi phisqata, wichay ladonpitaq phisqata. Chaykunaqa ruphachina sacrificiota maqchinapaqmi karqan. Hatun qochaqa sacerdotekunaq mayllikunanpaqmi karqan. 7Kamachikuyman hina chunka candelerota qorimanta ruwachirqan, chaykunatan yupaychana wasiman churarqan, phisqata uray ladoman, phisqatataq wichay ladoman. 8Ruwachillarqantaq chunka mesata, hinaspa yupaychana wasiman churarqan, phisqata uray ladoman, phisqatataq wichay ladoman. Ruwachillarqantaq pachak qori puruñakunatapas. 9Sacerdotekunapaq patiota ruwachirqan, hinallataq hatun patiotapas punkunkunatawan, chay punkukunatataq broncewan qatachirqan. 10Hatun qochataqa churarqan yupaychana wasi uray ladowan inti lloqsimuy ladowan tupay cheqasmanmi. 11Hiram-abiqa ruwallarqantaqmi mankakunata, palakunata, puruñakunatawan. Ahinatan Hiram-abiqa Diospa wasinpaq Salomonpa tukuy ruwachisqanta tukurqan. 12Chaykunan karqan: iskay tusakuna, tusaq umanpi kaq iskay muyu pillukuna, sapanka pilluta qatanapaq cadena awasqakuna, 13chaykunaman warkunapaq iskay wachu granadakuna (sapanka wachu iskay pachak granadakunayoq, chay awasqakunapin granada warkusqa pilluq q'ompunta qatarqan), 14chunka carretakuna, carretakunapaq chunka huch'uy qochakuna, 15chunka iskayniyoq toro patapi hatun qocha, 16mankakuna, palakuna, trinchekunapiwan. Señor Diospa wasinpaq Salomonpa tukuy chay ruwasqankunata Hiram-abiqa llusk'achasqa broncemantan ruwarqan. 17Tukuy chaykunatan rey Salomonqa unuyachispa t'uru moldekunapi hich'aykurqan Jordán pampapi kaq Saretán llaqta Sucot llaqta chawpipi. 18Sinchi askhan karqan rey Salomonpa broncemanta serviciokuna ruwachisqanqa, chaymi hayk'achus bronce pesasqantapas mana pesayta atirqankuchu. 19Hinallataq Salomonqa Diospa wasinpi kaykunata ruwachirqan: qori altarta, Diospa ñawpaqenpi churana t'antapaq mesakunata, 20ch'uya qorimanta candelerokunata kamachikuyman hina Ch'uyay-ch'uya Cheqaspa ñawpaqenpi k'anchachinapaq, 21qorimanta t'ikakunata, lamparachakunata, pábilo sipinakunata, 22pábilo allichanakunata, puruñakunata, pocillokunata, sansa apanakunatawan. Hinallataq Ch'uyay-ch'uya Cheqasman haykuna punkupas yupaychana wasiman haykuna hatun punkupas ch'uya qorimanta ruwasqa karqan.

will be added

X\