2 Crónicas 33

1Manasesqa chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta phisqa chunka phisqayoq watata. 2Payqa manapunin Señor Diospa munayninman hinachu ruwarqan, aswanpas Israelpa qayllanmanta Señor Diospa wikch'usqan suyukunaq mana chanin millay ruwasqankunatan ruwarqan. 3Taytan Ezequiaspa thunisqan wak'a dios yupaychana cheqaskunatan wakmanta sayarichirqan, Baal diospa altarninkunatapas, Asera diosaq rikch'ayninkunatapas ruwarqan, hinallataq hanaq pachapi kaq llapan ch'askakunatapas yupaycharqan. 4Manasesqa Señor Dios yupaychana wasipin altarkunata sayarichirqan, chay wasimantaqa khaynatan Señor Diosqa nisqa: Jerusalén llaqtapin wiñaypaq yupaychasqa kasaq, nispa. 5Iskaynin pationpipas hanaq pacha ch'askakunata yupaychananpaqmi altarkunata sayarichirqan. 6Churinkunatan Ben-hinom wayq'opi sacrificiopi ruphachirqan, watuytapas layqakuytapas yacharqanmi, wañusqakunaq almanta rimachiqkunawanpas, mana allin espiritukunata rimachiqkunawanpas tapuchillarqantaqmi. Ruwasqankunaqa sinchi mana chaninmi karqan, manan Señor Diospa munayninman hinachu, ahinapin Señor Diosta phiñachirqan. 7Señor Dios yupaychana wasipipas ruwasqan idolotan churarqan, chay wasimantaqa Señor Diosmi Davidta churin Salomontawan nisqa: Israel llapan ayllukuna ukhupin akllakuni Jerusalén llaqtata, kay wasitawan chaypi ñoqa yupaychasqallapuni kanaypaq. 8Kamachiy Moisespa Israel runakunaman qosqan kamachikuy simiykunata, yachachikuyniykunata, unanchayniykunatapas paykuna makilla hunt'anqaku chayqa, ñawpa taytaykichisman qosqay suyumantaqa manapunin wikch'usaqchu, nispa. 9Manasestaq ichaqa Judá runakunata Jerusalenpi tiyaq runakunatapas waqllichirqan, Israel runakunataq qayllankumanta Señor Diospa wikch'usqan runakunamantapas aswantaraq huchallikurqanku. 10Hinan Señor Diosqa rimaykurqan Manasesta llaqtan runakunatapas, paykunataq ichaqa mana kasukurqankuchu. 11Chaymi Señor Diosqa paykuna contra Asiria reypa ejerciton umallikunata kachamurqan, hinan chay umallikunaqa Manasesta presota hap'ispanku cadenawan watasqata senqanpi ganchoyoqta Babiloniaman aparqanku. 12Chaymantataq Manasesqa sinchi ñak'arichisqa kaspa, ñawpa taytankunaq Diosnin Señorpa ñawpaqenpi huch'uyyaykukuspa rogaykukurqan. 13Chaymi Señor Diosqa mañakusqanta uyarirqan, hinaspan Jerusalenman kutichipurqan, Judá suyutapas qopurqan. Hinan Manasesqa yacharqan Señor Diosllapuni Diosqa kasqanta. 14Chay qhepatataq Manasesqa Davidpa Llaqtan nisqa inti lloqsimuy lado perqata sayarichirqan Gihón pukyu inti haykuy wayq'o cheqasmanta Challwa Punkukama. Chay perqasqanmi Ofel moqota muyuykurqan, ancha altotaq karqanpas. Hinataq Judá suyuq llapan pukara llaqtankunaman ejército umallikunata churarqan. 15Hinallataq Señor Dios yupaychana wasimanta wikch'urqan wak dioskunata paypa churasqan idolota ima. Señor Dios yupaychana wasiq kasqan orqopi Jerusalén llaqtapi ruwasqan altarkunatapas lliwtan thunirqan, hinaspan llaqtamanta horqospa wikch'urqan. 16Chaymantataq Manasesqa Señor Diospa altarninta allicharqan, hinaspa chaypi sumaq kawsay sacrificiokunata, gracias qoy sacrificiokunatawan haywarqan. Judá runakunatataq kamachirqan Israelpa Diosnin Señorta servinankupaq. 17Chaymi runakunaqa wak'a dios yupaychana cheqaskunapi sacrificiota haywasharqanku, ichaqa Diosninku Señor Diosllamanñan. 18Manasesmanta wakin willakuykunaqa, Diosninmanta mañakusqan, Israelpa Diosnin Señorpa sutinpi profetakunaq rimaykusqan simikunapas llapanmi Israel Reykunaq Willakuynin Qelqapi qelqasqa kashan. 19Hinallataq mañakusqanmanta, mañakuynin uyarisqa kasqanmanta, tukuy huchankunamanta, Diospaq mana hunt'aq kasqanmanta, manaraq huch'uyyaykukushaspa wak'a dios yupaychana cheqaskuna sayarichisqanmanta, Asera diosaq rikch'aynin ruwasqanmanta, wak rikch'aykuna ruwasqanmantapas Profetakunaq Willakuynin Qelqapi qelqasqan kashan. 20Manasés wañupuqtinqa hallp'anpin p'ampapurqanku. Chay qhepatataq churin Amón rantinpi kamachikurqan. 21Amonqa iskay chunka watayoqmi karqan kamachikuyta qallarishaspa, kamachikurqantaq Jerusalenmanta iskay watata. 22Payqa manapunin Señor Diospa munayninman hinachu ruwarqan, aswanpas taytan Manasés hinan ruwarqan. Chaymi taytanpa ruwasqan llapan idolokunata servispa sacrificiota haywarqan. 23Amonqa manan hayk'aqpas Señor Diospa ñawpaqenpi huch'uyyaykukurqanchu imaynan taytan Manasés huch'uyyaykukurqan hinataqa, payqa astawanraqmi huchallikusharqan. 24Amonpa kikin oficialninkunan pay contra rimanakurqanku, hinaspa wasinpi payta wañurqachirqanku. 25Judá suyu runakunataq ichaqa rey Amón contra llapan rimanakuqkunata wañuchirqanku, hinaspa churin Josiasta taytanpa rantinpi reyta churarqanku.

will be added

X\