2 Crónicas 29

1Ezequiasqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta iskay chunka isqonniyoq watata. Maman Abiaqa Zacariaspa ususinmi karqan. 2Ezequiasqa Señor Diospa munayninman hinan chaninta ruwarqan, ñawpa taytan Davidpa ruwasqanta hina. 3Payqa kamachikuyta qallarisqan watapi ñawpaqkaq killapin Señor Dios yupaychana wasi punkukunata kicharispa allichachirqan. 4Chaymantataq sacerdotekunata Leví runakunatawan huñurqan yupaychana wasi inti lloqsimuy lado plazapi, 5hinaspa nirqan: –¡Leví runakuna, uyariwaychis! Kunan ch'uyanchakuychis, hinaspa ñawpa taytaykichispa Diosnin Señor yupaychana wasitapas ch'uyanchaychis, chaypi tukuy qhelli kaqkunatataq horqomuychis. 6Ñawpa taytanchiskunaqa huchallikuspankun manapuni Diosninchis Señor Diospa munayninman hinachu ruwasqaku, qheparparispan wikch'upusqaku, Señor Dios yupaychana wasitaqa manan qhawaykusqakupaschu. 7Punkunkunatapas wisq'aykapusqaku, lamparakunatapas sipipusqaku, yupaychana wasipipas manan Israelpa Diosnin Señorman inciensota q'apachisqakuchu, manallataq ruphachina sacrificiotapas haywasqakuchu. 8Chaymi Señor Diosqa Jerusalén contra Judá suyu contra sinchita phiñakuspa muchuchirqan, chayta rikuspan wakin suyukuna llaksakurqanku, khatatatarqanku, pisichaspataq asikurqanku. Chaytaqa allintan qankunaqa yachankichis. 9Chay hawan ñawpa taytaykichiskunapas wañuchisqa karqanku, churinchiskunapas ususinchiskunapas warminchiskunapas preso apasqa karqanku. 10Chaymi ñoqa sonqoypi yuyaykuni Israelpa Diosnin Señorwan rimanakuyta, amaña ñoqanchispaq sinchita phiñakunanpaq. 11Chhaynaqa, churillaykuna, k'uchi kaychis, qankunatan Señor Diosqa akllarqasunkichis payta servinaykichispaq, yupaychana wasipi llank'anaykichispaq, inciensota payman q'apachinaykichispaqwan, nispa. 12Hinan Leví ayllu runakunamanta kaykuna llank'aq rirqanku: Cohatpa mirayninmantan rirqanku, Amasiaspa churin Mahat, Azariaspa churin Joelpiwan. Merariq mirayninmantan rirqanku, Abdiq churin Cis, Jehalelelpa churin Azariaspiwan. Gersonpa mirayninmantan rirqanku, Zimaq churin Joa, Joaq churin Edenpiwan. 13Elizafanpa mirayninmantan rirqanku, Simripiwan Jeielpiwan. Asafpa mirayninmantan rirqanku, Zacariaspiwan Mataniaspiwan. 14Hemanpa mirayninmantan rirqanku, Jehielpiwan Simeipiwan. Jedutunpa mirayninmantataq rirqanku, Semaiaspiwan Uzielpiwan. 15Paykunan wawqenkuta huñuykurqanku, hinaspan reypa kamachisqanman hina ch'uyanchakuspanku haykurqanku yupaychana wasita pichanankupaq Señor Diospa kamachikuy siminman hina. 16Sacerdotekunan Señor Dios yupaychana wasita haykurqanku ch'uyanchanankupaq, hinaspan tukuy tarisqanku qhelli kaqkunata horqomurqanku yupaychana wasi patioman. Chay patiomantataq apaspanku Leví runakunaqa Cedrón mayuman wikch'umurqanku. 17Ch'uyanchaytan qallarirqanku ñawpaqkaq killa qallariy p'unchaypi, pusaqkaq p'unchaypitaq Señor Diospa yupaychana wasin punkukama ch'uyanchaspa chayarqanku. Chaymantataq pusaq p'unchay Señor Dios yupaychana wasita ch'uyancharqanku, hinaspa tukurqanku chay killaq chunka soqtayoq p'unchayninpi. 18Rey Ezequiasman rispankutaq nirqanku: –Lliwtan ch'uyanchamuyku Señor Dios yupaychana wasita, sacrificio ruphachina altarta tukuy serviciokunantinta, Diospa ñawpaqenpi churana t'antapaq mesatapas tukuy serviciokunantinta. 19Hinallataq rey Ahazpa Señor Diosmanta t'aqarikuspa wikch'usqan llapan serviciokunatapas allichaspa ch'uyanchayku, kunanqa Señor Diospa altarnin qayllamanmi churamuyku, nispanku. 20Hinan rey Ezequiasqa qhepantin p'unchay tutallamanta hatarispa llaqta umallikunata huñurqan, hinaspa Señor Dios yupaychana wasita rirqan. 21Qatimurqankutaq qanchis torillota, qanchis anejota, qanchis borregota, qanchis orqo cabratawan, reypa ayllunmanta yupaychana wasipi llank'aqkunamanta Judá suyu runakunamantawan hucha pampachay sacrificiota haywanankupaq. Chaymi reyqa Aaronpa miraynin sacerdotekunata kamachirqan Señor Diospa altarninpi sacrificiota haywanankupaq. 22Hinan nak'arqanku torillokunata, anejokunata, borregokunatawan, sacerdotekunataq sapanka t'aqaq yawarninta chaskispanku altarta ch'aqchurqanku. 23Chaymantataq hucha pampachay sacrificiopaq orqo cabrakunata qatimurqanku reypa ñawpaqenman llapa huñuykusqa runakunaq ñawpaqenmanwan, hinan paykunaqa orqo cabrakuna pataman makinkuta churaykurqanku. 24Hinallataq sacerdotekunapas nak'aspanku yawarninta hucha pampachay sacrificiota hina altar patapi haywarqanku llapa Israel runakunaq huchanta qechunanpaq, reymi kamachirqan ruphachina sacrificiotapas hucha pampachay sacrificiotapas llapan Israel runakunamanta haywanankupaq. 25Hinallataq reyqa Señor Dios yupaychana wasiman Leví runakunata churarqan platillokunayoqta, arpakunayoqta rey Davidpa kamachikusqanman hina. Chay ruwaykunatan Señor Diosqa Davidman willachirqan profeta Gadwan profeta Natanwan ima. 26Leví runakunapas Davidpa tocasqan tocanakunayoq kashaqtinmi, sacerdotekunapas cornetakunayoq kashaqtinmi, 27rey Ezequiasqa ruphachina sacrificiota altarpi haywanankupaq kamachirqan. Hinan ruphachina sacrificiota haywayta qallariqtin Señor Diosta yupaychayta qallarirqanku cornetata, Davidpa tocanankunata tocaspa. 28Chaymi llapan huñuykusqa runakuna pampakama k'umuykukurqanku, takiqkunan takirqanku, tocaqkunapas tocarqanku, ruphachina sacrificio haywayta tukunankukama. 29Ruphachina sacrificiota haywayta tukuqtinkutaq, reypas llapan paywan kashaqkunapas qonqoriykukuspanku Señor Diosta yupaycharqanku. 30Hinallataq rey Ezequiasqa llapan umallikunapiwan Leví runakunata kamachirqanku: Señor Diosta yupaychaychis Davidpa qelqasqan takikunawan, profeta Asafpa qelqasqan takikunawan, nispa. Chaymi paykunaqa ancha kusisqa takirqanku hinaspa qonqoriykukuspa yupaycharqanku. 31Chaymantataq Ezequiasqa llapa huñuykusqa runakunata nirqan: –Kunanmi qankuna Señor Diospaq t'aqasqa kankichis. Qayllaykamuychis, hinaspa Señor Dios yupaychana wasiman apamuychis gracias qoy sacrificiokunata, nispa. Hinan llapa runakuna gracias qoy sacrificiota aparqanku, hayk'an tukuy sonqo qoykuy munaqkunataq ruphachina sacrificiota aparqanku. 32Huñuykusqa runakunaq ruphachina sacrificiopaq apasqanku uywakunan karqan qanchis chunka toro, pachak anejo, iskay pachak borregopiwan. 33Wakin sacrificiokunataq karqan soqta pachak toro, kinsa waranqa oveja. 34Sacerdotekunan pisilla kaspanku ruphachina sacrificiopaq uywakuna nak'ayta mana usachirqankuchu, chaymi wawqenku Leví runakuna yanaparqanku chay llank'ay tukukunankama, wakin sacerdotekunataq chaykama ch'uyanchakurqanku. Sacerdotekunamantaqa Leví runakunan usqhaylla ch'uyanchakuy munaq karqanku. 35Sacerdotekunaq haywanan ruphachina sacrificiokunaqa askhan karqan, hinallataq chay sacrificiokunaman hich'aykuna vino ofrendakunapas, sumaq kawsay sacrificio wirakunapas. Chay hinatan Señor Dios yupaychana wasipi yupaychayta wakmanta qallarichirqanku. 36Chaymi Ezequiasqa llapan runakunapiwan anchatapuni kusikurqanku Señor Diospa usqhaylla chayta ruwachisqanmanta.

will be added

X\