2 Crónicas 27

1Jotamqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka soqtayoq watata. Maman Jerusaqa Sadocpa ususinmi karqan. 2Jotamqa Señor Diospa munayninman hinan chaninta ruwarqan, taytan Uziaspa ruwasqankunata hina, Señor Dios yupaychana wasimanmi ichaqa incienso q'apachiq mana haykurqanchu. Chaywanpas suyupi runakunaqa huchallikushallarqanpunin. 3Paymi ruwachirqan Señor Dios yupaychana wasi wichay lado punkuta, Ofel cheqaspi kaq perqatataq allinta perqaparqan. 4Hinallataq Judá suyu orqo-orqokunapi llaqtakunata sayarichirqan, sach'a-sach'akunapitaq pukarakunata torrekunata ima sayarichirqan. 5Chaymantataq Jotamqa Amón suyu reywan maqanakurqan, hinaspa Amón runakunata atiparqan. Chaymi Amón suyu runakunaqa chay wata Jotamman pagarqanku kinsa waranqa kinsa pachak kilo qolqeta, chunka waranqa fanega trigota, chunka waranqa fanega cebadatawan. Chhaynatakaman iskaykaq watapas kinsakaq watapas pagarqanku. 6Jotamqa allin atiyniyoqmi kapurqan, Diosnin Señor Diospa munayninta ruwaspallapuni kawsasqanrayku. 7Jotammanta wakin willakuykunaqa, maqanakusqanmanta, tukuy ruwasqankunamantapas Judá Reykunaq Israel Reykunaq Willakuynin Qelqapi qelqasqan kashan. 8Jotamqa iskay chunka phisqayoq watayoqmi karqan kamachikuyta qallarishaspa, kamachikurqantaq Jerusalenmanta chunka soqtayoq watata. 9Wañukapuqtintaq Davidpa Llaqtan nisqapi p'ampapurqanku. Chay qhepatataq churin Ahaz rantinpi kamachikurqan.

will be added

X\