2 Crónicas 21

1Josafat wañupuqtintaq Davidpa Llaqtan nisqapi p'ampapurqanku. Paypa rantinpitaq churin Joram kamachikurqan. 2Jorampa wawqenkunan kaykuna karqan: Azarías, Jehiel, Zacarías, Azaryau, Micael, Sefatiaspiwan. Llapan chaykunan karqan rey Josafatpa churinkuna. 3Paykunamanmi Josafatqa askha qorita, qolqeta, illakunatapas qorqan, hinallataq Judá suyupi pukara llaqtakunatapas. Joramtataq ichaqa kamachikuq kananpaq churarqan, pay phiwi churin kasqanrayku. 4Hinan Joramqa taytan Josafatpa rantinpi Judá suyupi kamachikurqan. Allinta kamachikuyninpi takyaykuspañataq llapan wawqenkunata wañurqachirqan, suyupi wakin umallikunatapas wañuchillarqantaq. 5Kamachikuyta qallarishaspaqa kinsa chunka iskayniyoq watayoqmi karqan, kamachikurqantaq Jerusalenmanta pusaq watata. 6Joramqa Israel reykuna hinan ruwarqan, Ahabpa ayllunpa ruwasqanta hina. Warminmi karqan Ahabpa ayllunmanta, Joramqa manapunin Señor Diospa munayninman hinachu ruwarqan. 7Chaywanpas Señor Diosqa manan Davidpa ayllunta ch'usaqyachiyta munarqanchu Davidwan rimanakusqan hawa, paymanmi Señor Diosqa prometesqa: Mirayniykiqa kamachikushallanqapunin, nispa. 8Joram kamachikushaqtinmi Edom runakunaqa Judá suyuq munaychakuynin contra sayarirqanku, hinaspa paykuna ukhumanta reyninkuta churakurqanku. 9Hinan Joramqa Edom suyuta pasarqan oficialninkunapiwan llapan carretakunantin. Edom runakunan paykunata muyuykurqanku, rey Joramtaq ichaqa carretakuna purichiqkunapiwan tuta lloqsispanku muyuykuq Edom soldadokunata qhochurparirqanku. 10Chay hinapin Edom runakunaqa Judamanta kacharichikapurqanku. Chay tiempollapitaqmi Libna llaqtapas Judá suyuq munaychakuynin contra sayarirqanku, ñawpa taytanpa Diosnin Señorta Joramqa mana servisqanrayku. 11Joramqa Judá suyu orqokunapin wak'a dios yupaychana altarkunata sayarichirqan, ahinapin Jerusalenpi tiyaq runakunata wak'a diosta yupaychaspa waqlliyman tanqaykurqan, hinallataq llapan Judá runakunatapas pantachirqan. 12Chaymantataq Joramqa profeta Eliaspa qelqanta chaskirqan, chay qelqapin nisqa: David ñawpa taytaykiq Diosnin Señormi nin: Qanqa manan taytayki Josafat hinachu ruwarqanki, manataq Judá rey Asa hinapaschu, 13aswanpas Israel reykuna hinan ruwarqanki, hinaspa Jerusalenpi tiyaq runakunatapas Judá suyuntinpi tiyaq runakunatapas waqllichirqanki, imaynan Ahabpa ayllun huchallichirqan hinata. Hinallataq wañuchirqanki taytaykiq churin wawqeykikunata, paykunaqa qanmanta aswan allinkunan karqanku. 14Chayraykun suyuykipi llapan runakunata, wawaykikunata, warmiykikunata sinchitapuni muchuchisaq, tukuy kaqniykikunatapas chinkachisaq. 15Qantataq askha onqoykunawan muchuchisqayki, ch'unchulniykipin sinchi millay onqoy hap'isunki, aswan-aswanta chay onqoyniyki sinchiqtintaq ch'unchulniykiraq lloqsinqa, nispa. 16Hinan Señor Diosqa Filistea runakunata Etiopía suyuq qorpan Arabe runakunatawan tanqarirqan Jorampa awqan sayarinankupaq. 17Chaymi paykunaqa Judá suyuman phawaykuspa ch'eqeykurqanku, hinaspa reypa wasinmanta aparqanku hayk'an tarisqanku tukuy kaqninkunata, wawankunata, warminkunata ima. Llapan churinkunamantaqa sullk'akaq Ocoziasllañan qhepaykurqan. 18Tukuy chaykuna qhepatataq Señor Diosqa mana qhaliyaq onqoyta churaykurqan Jorampa ch'unchulninman. 19Chaymantataq iskay wataña onqoshaqtin aswan-aswanta onqoynin sinchisqan hawa ch'unchulnin lloqsirqan, hinan sinchi musphay nanayta muchuspa wañupurqan. Llaqtanqa manan ima q'apaqllatapas wañuqpa sutinpi kanarqanchu, imaynan ñawpa taytankunapaq ruwarqanku hinata. 20Joramqa kamachikuyta qallarishaspa kinsa chunka iskayniyoq watayoqmi karqan, kamachikurqantaq Jerusalenmanta pusaq watata. Wañuqtinqa manan pipas waqarqanchu. P'ampapurqankutaq Davidpa Llaqtan nisqapi, ichaqa manan reykunata p'ampanapichu.

will be added

X\