1 Salomonqa yuyaykukurqanmi Señor Diosta yupaychanapaq wasita sayarichiyta paypa kamachikunan wasi sayarichikuytapas. 2 Chaymi payqa chay llank'aypaq churarqan qanchis chunka waranqa qharikunata rumi q'epiqpaq, pusaq chunka waranqa qharikunata orqopi rumita ch'eqtaqpaq, chay llank'aqkunata llank'achiqpaqtaq kinsa waranqa soqta pachak qharikunata churarqan. 3 Chaymantataq Salomonqa Tiro rey Hiramman willaqta kacharqan: Imaynan David taytayman cedro kurkukunata apachirqanki tiyanan wasita ruwakunanpaq, chay hinallataq ñoqamanpas apachimuway. 4 Ñoqan Diosniy Señor Dios yupaychanapaq wasita sayarichipusaq, hinaspa paypaq t'aqasaq. Chaypin sumaq q'apaq incienso Señor Diospa ñawpaqenpi q'apachikunqa, paypa ñawpaqenpi churana t'anta tukuy tiempo churakunqa, sapa p'unchaytaq ch'isin paqar ruphachina sacrificio haywakunqa, hinallataq samana p'unchaypi, Mosoq Killa Fiestapi, Diosniyku Señor Diospa fiestankunapi ima. Diosmi kamachirqan Israel runakunata chay ruwaykunata ruwashanallankupaq. 5 Sayarichisaq chay wasiqa sinchi hatunmi kanqa, Diosniyku Señor Dios llapan dioskunamanta hatun atiyniyoq kasqanrayku. 6 Chaywanpas, ¿pitaq Señor Diospaq wasita sayarichipuyta atinman, hanaq pachapas ancha hatun kashaspa mana chaskiyta atishaqtin? Ñoqaqa manan imapaschu kani paypaq wasita sayarichipunaypaqqa, inciensota q'apachinallapaqchá sayarichipuymanpas. 7 Chay hinaqa, huk qharita kachamuway qoripi, qolqepi, broncepi, fierropipas llank'ay yachaqta, sani-puka q'aytumanta, rawraq-puka q'aytumanta, llawlli-puka q'aytumanta away yachaqta, metalpipas k'iñay yachaqta. Paymi Judapi Jerusalenpi taytaypa churasqan artesanoykunapiwan llank'anqa. 8 Apachimullawaytaq Libanomanta cedro kurkukunata, pino kurkukunata, sándalo kurkukunatawan. Allintan yachani kamachiykikuna sach'ata kumpaq kasqankuta. Ñoqaq kamachiykunan qanpa kamachiykikunawan kuska llank'anqaku 9 askha kurkuta wakichipuwaspanku, sayarichinay wasiqa ancha hatun musphana kanqa chayrayku. 10 Sach'a kumpaq kamachiykikunamanqa qosaqmi mikhunankupaq iskay chunka waranqa fanega trigota, iskay chunka waranqa fanega cebadata, iskay chunka waranqa litro aceiteta, iskay chunka waranqa litro vinotawan, nispa. 11 Hinan Tiro rey Hiramqa Salomonman kay hinata qelqarqan: Llaqtanta munakuspanmi Señor Diosqa paykunaq reyninta churarqasunki. 12 Yupaychasqa kachun Israelpa Diosnin Señorqa. Paymi hanaq pachatapas kay pachatapas kamarqan. Rey Davidmanpas churita qorqan allin yachaysapata, allin yuyayniyoqta, allin chaninchaqta, Señor Diospaq wasita ruwapunanpaq, suyu kamachina wasitapas ruwakunanpaq. 13 Chay hinaqa, kachamushaykin tukuy llank'ay atiq yachaysapa qharita, paymi Hiram-abi sutiyoq, 14 Tiro llaqta qhariq churin, Dan ayllu warmiq churin. Payqa kusatan llank'ayta yachan qoripi, qolqepi, broncepi, fierropi, rumipi, kurkupi, yachallantaqmi awayta sani-puka q'aytumanta, llawlli-puka q'aytumanta, rawraq-puka q'aytumanta, lino q'aytumantapas. Hinallataq payqa yachan tukuy t'aqa k'iñayta, imayna rikch'aq seq'eta chaskispapas payqa atinmi metalpi k'iñayta. Paymi llank'anqa artesanoykikunawan, wiraqochay David taytaykiq artesanonkunapiwan. 15 Chay hinaqa, wiraqocháy, rimarisqaykiman hina apachimuwayku trigota, cebadata, aceiteta, vinotawan. 16 Ñoqaykuqa hayk'an munasqaykitan Libanomanta kurkuta wit'umusaqku, hinaspataq lamar-qochanta chaqllasqa tuytushaqta Jopekama apamusaqku, chaymantan ichaqa qanña Jerusalenman apachikunki, nispa. 17 Salomonqa Israel suyupi tiyaq llapan wak llaqtayoq runakunatan yupachirqan, taytan Davidpa yupachisqanta hina, yupasqakunataq pachak phisqa chunka kinsayoq waranqa soqta pachak qharikuna karqan. 18 Hinan chay qharikunata rakirqan, qanchis chunka waranqata rumi q'epiqpaq, pusaq chunka waranqata orqopi rumi ch'eqtaqpaq, kinsa waranqa soqta pachaktataq chay llank'aqkunata llank'achiqpaq.
