2 Crónicas 18

1Rey Josafatqa ancha mentasqa askha qhapaq kayniyoqmi karqan, Ahabwantaq suegromasintin kapurqan. 2Chaymantataq pisi watakunamanta Samaria llaqtata uraykurqan rey Ahabta watukuq. Chaymi Ahabqa ovejakunata torokunata nak'achirqan Josafatpaqpas paywan riq llapan oficialkunapaqpas, hinaspa Josafat-ta Galaadpi Ramot contra maqanakuq riysinanta munaspa 3nirqan: –¿Galaadpi Ramot llaqtaman phawaykuqtiy riysiwankimanchu? nispa. Josafat-taq kutichirqan: –Ñoqapas soldadoykunapas huk-nisqan kashayku qanwanpas runaykikunawanpas, riysisqaykikun awqa-tinkuq riqtiykiqa. 4Ichaqa Señor Diospa munaynintaraq tapuchiy, nispa. 5Hinan Israel reyqa tawa pachak profetakunata huñurqan, hinaspa paykunata tapurqan: –¿Galaadpi Ramot llaqtaman phawaykuymanchu? Icha, ¿amachu? nispa. Profetakunataq kutichirqan: –Arí, phawaykuy, Diosmi qanman hap'ichisunki, nispa. 6Josafat-taq tapuykurqan: –¿Manachu kaypi kan Señor Diospa huk profetan? Paytapas tapurillasunmantaq, nispa. 7Ahabtaq Josafatman kutichirqan: –Arí, kashanmi huk profeta, paywan Señor Diosta tapuchinanchispaq. Payqa Imlaq churin Micaiasmi, ichaqa cheqnikunin paytaqa, manan hayk'aqpas allinkunata willawanchu, aswanpas mana allinkunallatapunin willawan, nispa. Josafat-taq nirqan: –Ama chay hinata rimaychu, nispa. 8Hinan Ahabqa huk oficialninta waqyarispa kamachirqan: –Imlaq churin Micaiasta pusarqamuway, nispa. 9Israel rey Ahabpas Judá rey Josafatpas rey p'achayoqmi kasharqanku, Samaria llaqtaman haykuna erapitaq tiyasharqanku kamachikuy tiyanankupikama, llapan profetakunataq ñawpaqenkupi profetizarqan. 10Quenaanaq churin Sedequiastaq fierro waqrakunata ruwakuspa qaparirqan: –Señor Diosmi nin: Kay waqrakunawanmi Siria runakunata waqranki llapanta wañuchinaykikama, nispa. 11Llapan profetakunapas kaqtakaman nirqanku: –Phawaykuy Galaadpi Ramot llaqtaman, atipankin, Señor Diosmi qanman hap'ichisunki, nispanku. 12Micaías waqyamuqta kachasqa runataq Micaiasta nirqan: –Llapan profetakunan huk-nisqalla reypa allinnintakama rimanku. Qanpas paykuna hina reypa allinninta rimallaytaq, nispa. 13Micaiastaq nirqan: –¡Señor Diospa sutinpin jurani, imatachus Diosniy rimanaypaq kamachiwanqa, chayllatan rimasaq! nispa. 14Chaymantataq reyman qayllaykurqan, hinan reyqa tapuykurqan: –Micaías, ¿Galaadpi Ramot llaqtaman phawaykuymanchu? Icha, ¿amachu? nispa. Micaiastaq nirqan: –Arí, phawaykuychis, atipankichismi, paykunataqa hap'ichisunkichismi, nispa. 15Reytaq ichaqa kutichirqan: –¿Hayk'a kutitan nisqayki: Señor Diospa sutinpi juraspan cheqaqkaqtaqa willawanki nispa? nispa. 16Hinan Micaiasqa nirqan: –Orqo-orqopi ch'eqesqatan llapan Israel runakunata rikurqani, mana michiqniyoq ovejakunata hina. Señor Diosmi nirqan: “Kay runakunaqa mana umalliyoqmi, sapanka wasinkuta ama llakisqalla kutipuchunku”, nispa. 17Israel reytaq Josafat-ta nirqan: –Nishaykin riki, manan hayk'aqpas kay runaqa allinkaqta willawanmanchu, aswanpas mana allinkaqllatapunin, nispa. 18Micaiasqa nillarqantaq: –Chhaynaqa, uyariy Señor Diospa rikuchiwasqanta: Señor Diostan rikurqani kamachikuy tiyananpi tiyashaqta, pañanpipas lloq'enpipas llapan hanaq pachapi kashaqkuna sayashaqta. 19Hinan Señor Diosqa tapuykurqan: –¿Pitaq rinman Israel rey Ahabta tanqariq, Galaadpi Ramot llaqtaman phawaykunanpaq, hinaspa chaypi wañunanpaq? nispa. Hinan nirqanku hukkuna hukta, wakinkunataq huk-hinata. 20Chayllamanmi huk espíritu Señor Diospa ñawpaqenman asuykuspa nirqan: –Ñoqan tanqarimusaq, nispa. Hinan Señor Diosqa tapuykurqan: –¿Imaynatataq ruwawaqri? nispa. 21Espiritutaq kutichirqan: –Reypa llapan profetankunatan llullakuyta rimachisaq, nispa. Chaymi Señor Diosqa nirqan: –Phaway q'otumuy, allinpunin kanqa, nispa. 22Chhaynaqa yachay, Señor Diosmi llullakuy espirituta llapan kay profetaykikunaq siminman churan, hinallataq Señor Diosqa wañunaykita unanchan, nispa. 23Hinan Quenaanaq churin Sedequiasqa qayllaykuspa Micaiasta uyapi ch'aqlaspa nirqan: –¿Maynintan Señor Diospa Espiritun ñoqamanta lloqsirqorqan qanman rimaykunasuykipaq? nispa. 24Micaiastaq kutichirqan: –Huk wasi ukhupi k'uchun-k'uchunta pakakuspa ayqekachakunki chay p'unchayñan yachanki, nispa. 25Chaymi Israel reyqa kamachirqan: –¡Hap'iychis Micaiasta, hinaspa llaqta kamachiq Amonman churiy Joasmanwan apaychis! nispa. 26Niychistaq paykunata: –Reymi kamachisunkichis carcelman wisq'anaykichispaq, hinaspa huch'uy t'antallata pisi unullatawan qonaykichispaq, allillan qhalilla ñoqa kutimunaykama, nispa. 27Micaiastaq nirqan: –Allinchus qhalitaqchus kutimunki chayqa, kay nisqayqa manan Señor Diospa siminchu, nispa. Yapaykuspataq nirqan: –Llapan runakuna, allinta kayta yuyaychis, nispa. 28Chaymantataq Israel rey Ahabqa Judá rey Josafatpiwan Galaadpi Ramot llaqtaman wicharqanku. 29Hinan Israel reyqa Josafat-ta nirqan: –Huk-hina p'achayoq maqanakuyman risaq, qantaq rey p'achaykiwan churakunki, nispa. Chhaynaqa, huk-hina p'achayoqmi Ahabqa maqanakuyman rirqan. 30Siria reyqa carretakunata purichiq umallikunatan kamachisqa: Aman piwanpas maqanakunkichischu, aswanpas Israel rey Ahabllawanmi, nispa. 31Carretakunata purichiq umallikunataq Josafat-ta rikurqospanku Israel rey Ahab kananpaq yuyarqanku, chaymi payman kutirirqanku phawaykunankupaq. Josafat qapariqtintaq Señor Diosqa yanaparqan, awqankunatapas paymanta karuncharqan. 32Chaymi carretakunata purichiq umallikunaqa mana Israel rey Ahabchu kasqanta rikuspa, manaña qatirqankuchu. 33Ichaqa huk soldadon wach'inawan ch'usaqllaman wach'irqan, chay wach'isqanmi Israel reypa coraza k'akllunta haykurqan. Chaymi Ahabqa carretan purichiqta nirqan: –¡Kutirichiy carretata! ¡Horqopuway maqanakuymanta! ¡K'irisqan kashani! nispa. 34Chay p'unchayqa sinchitapunin maqanakurqanku, chaymi reyqa Siria soldadokunaq chimpanpi ch'isinkama carretanman k'askaykukuspa sayasharqan. Inti chinkaykuytataq wañupurqan.

will be added

X\