2 Crónicas 17

1Asaq rantinpiqa churin Josafatmi Judapi kamachikurqan, paymi Israel suyu contra allinta wakichikurqan. 2Judá suyuq llapan pukara llaqtankunapin soldadokunata churarqan, churallarqantaq t'aqa-t'aqa soldadokunata Judá campokunapi, taytan Asaq hap'ikapusqan Efraín llaqtakunapi ima. 3Josafatqa David ñawpa taytanpa qallariypi kawsasqanta hinan kawsarqan, chaymi Señor Diosqa paywan kasharqan. Payqa manan Baal dioskunatachu servirqan, 4aswanpas ñawpa taytanpa Diosnintan yupaycharqan, paypa kamachikuyninkunatataq kasukurqanpas, manan Israel suyu runakunaq ruwasqanta hinachu ruwarqan. 5Chaymi Señor Diosqa suyu kamachisqanpi atiyniyoqta takyachirqan, llapan Judá runakunataq payman sumaq sonqota aparqanku, chaymi ancha mentasqa askha qhapaq kayniyoq karqan. 6Hinan Josafatqa sonqopas-sonqo Señor Diosta servirqan, hinaspa Judá suyumanta orqokunapi yupaychana cheqaskunata ch'usaqyachirqan, Asera diosaq rikch'ayninkunatapas wikch'urqan. 7Kinsakaq watapi kamachikushaspataq Josafatqa oficialninkunata kacharqan Judá llaqtakunapi runakunaman kamachikuy simita yachachimunankupaq, chaykunan karqan: Ben-hail, Abdías, Zacarías, Natanael, Micaiaspiwan. 8Paykunawanmi rirqanku Leví runakunamanta: Semaías, Netanías, Zebadías, Asael, Semiramot, Jonatán, Adonías, Tobías, Tobadoniaspiwan, hinallataq sacerdote Elisamawan Jorampiwan rirqanku. 9Paykunan Judá suyupi llapan llaqtakunata puririrqanku chaypi tiyaq runakunaman Señor Diospa kamachikuy siminta yachachispa. 10Señor Diosmi Judá suyu muyuriq qorpa llapan suyukunataqa manchachirqan, chaymi mana Josafatwan maqanakuyta munarqankuchu. 11Filistea suyu runakunan Josafatman sumaq sonqota aparqanku, qolqetataq contribucionta hina qorqanku. Arabe runakunapas aparqanku qanchis waranqa qanchis pachak anejokunata, qanchis waranqa qanchis pachak orqo cabrakunata. 12Ahinapin Josafatqa aswan-aswan atiyniyoq kasharqan, hinaspan Judá suyupi pukarakunata mikhuy taqena llaqtakunata ima sayarichirqan. 13Judá suyu llaqtakunapipas askhan llank'anankuna karqan. Jerusalenpipas kallarqantaqmi allin awqa-tinkuq akllasqa soldadokuna. 14Paykunan mirayninkuman hina qelqasqa karqanku. Judá ayllumanta waranqa soldadoq umallinkunaq qollananmi Adnasqa karqan. Paymi umallirqan kinsa pachak waranqa allin qhari soldadokunata. 15Qatiqnintataq Johanán umallirqan, iskay pachak pusaq chunka waranqa soldadokunata. 16Chayman qatiqtataq Amasiaspa churin Zicri umallirqan iskay pachak waranqa soldadokunata, paymi pay kikillanmanta Señor Diospaq llank'ayta yuyaykukurqan. 17Benjamín ayllumanta qollanan allin qhari Eliada karqan. Paymi umallirqan p'eqtayoq escudoyoq iskay pachak waranqa soldadokunata. 18Qatiqnintataq Jozabad umallirqan pachak pusaq chunka waranqa awqa-tinkuypaq allin wakichisqa soldadokunata. 19Chaykunan rey Josafat-ta serviq soldadokuna karqan, Judá suyuntin pukarakunapi churasqan soldadokunaqa sapaqmi karqan.

will be added

X\