1 Rey Asa kinsa chunka soqtayoqkaq watapiña Judapi kamachikushaqtinmi, Israel rey Baasaqa Judá contra rirqan, hinaspa Ramá llaqtata allinta perqachirqan rey Asaq suyunman haykuqtapas lloqsiqtapas hark'ananpaq. 2 Hinan Asaqa Señor Dios yupaychana wasimanta paypa wasinmantawan qorita qolqeta horqospa Damascopi tiyaq Siria rey Ben-Hadadman apachirqan, willachirqantaq: 3 Qanwan ñoqawan rimanakusun, imaynan taytanchis rimanakurqanku hinata. Kayqa sumaq sonqota apachimushayki qorita qolqetawan, Israel suyu rey Baasawan rimanakusqaykita saqepuy, ahinapi ñoqaq suyuymanta paykuna ripunqaku, nispa. 4 Hinan Ben-Hadadqa Asaq valekusqanta uyakurqan, chaymi soldado umallikunata Israel llaqtakunaman phawaykunankupaq kacharqan. Hinan munaychakurqanku Ijón, Dan, Abel-maim llaqtakunata, hinallataq Neftalí aylluq hallp'anpi mikhuy taqena llaqtakunatapas. 5 Chayta yacharqospanmi Baasaqa manaña Ramá llaqtata perqachirqanñachu, wikch'upurqantaq llank'asqanta. 6 Rey Asataq llapan Judá runakunapiwan Ramata rirqanku, hinaspan Ramá llaqtata perqananpaq Baasaq apasqan rumikunata kurkukunatapas aparqanku, chaykunawantaq Gebata Mizpatawan sayarichirqanku. 7 Chay tiempokunapin profeta Hananiqa Judá rey Asaman rispa nirqan: –Qanqa manan Diosniyki Señor Diosmanchu hap'ipakunki, aswanpas Siria reymanmi, ahinapin Siria soldadokunata kacharparinki atipanayki kashaqtin. 8 ¿Manachu Etiopía runakunaq Libia runakunaqpas aswan askha soldadonkuna, carretankuna, caballopi sillakuq soldadonkunapas karqan? Chaywanpas Señor Diosmi qanman hap'ichirqasunki, payman hap'ipakusqaykirayku. 9 Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq. ¡Mana allinta yuyaykuspaykin chayta ruwarqanki! Chayraykun kunanmantaqa astawan qan contra awqa-tinkuy kanqa, nispa. 10 Hinan Asaqa k'arakta phiñakurqan profeta Hananipaq chaykunata willasqan hawa, chaymi carcelman wisq'aykurqan. Chay tiempopin Asaqa suyupi wakin runakunata sinchita muchuchirqan. 11 Asaq lliw ruwasqankunaqa Judá Reykunaq Israel Reykunaq Qelqanpin qelqasqa kashan. 12 Kinsa chunka isqonniyoqkaq watapi kamachikushaspanmi Asaqa iskaynin chakinmanta sinchita onqoykurqan, ichaqa manan onqoshaspa Señor Diospa yanapaynintachu maskharqan, aswanpas hampiqkunallatan. 13 Payqa tawa chunka hukniyoqkaq watapi kamachikushaspanmi wañukapurqan. 14 Hinan tukuy rikch'aq sumaq q'apaq hawinakunawan hich'aykuspa tarimaman ayata chutaykurqanku, chay q'apaq hawinakunataqa allin yachaqmi wakichirqan. Chaymantataq Davidpa Llaqtan nisqapi p'ampapurqanku paypa ruwachikusqan p'ampanapi. Hinamantataq wañuqpa sutinpi askha q'apaq hawinakunata kanaykurqanku.
