2 Crónicas 15

1Obedpa churin profeta Azariasmanmi Diospa Espiritun hunt'aykurqan, 2chaymi Asawan tupaq rispa, payta nirqan: –Uyariway rey Asa. Uyariwaychis Judá runakuna, Benjamín runakuna. Qankunachus Señor Diosta servishallankichis chayqa, paypas qankunawanpunin kashanqa. Maskhaspaykichispas tarinkichispunin, saqenkichistaqchus chayqa, paypas saqellasunkichistaqmi. 3Unay tiempokunan Israel runakunaqa karqan mana cheqaq Diosniyoq, mana ch'ulla sacerdoteqpas yachachisqan, mana kamachikuy simiyoq ima. 4Ichaqa llakikuyninkupin Israelpa Diosnin Señorman kutirikurqanku, payta maskhaspankutaq tarirqanku. 5Chay p'unchaykunapiqa lliw puriyninkupas sinchi manchakuymi karqan, llapan kay pachapi tiyaq runakunapas hatun ch'aqwaypin karqanku. 6Huk suyun suyumasinta saruncharqan, huk llaqtataq llaqtamasinta saruncharqan, Señor Diosmi paykunata tukuy t'aqa sasakunawan muchuchirqan. 7Qankuna ichaqa kallpachakuychis, servispaykichisqa ama sayk'uychischu, llank'asqaykichismantaqa kutichipusunkichismi, nispa. 8Hinan Asaqa Obedpa churin Azariaspa rimasqan simikunata uyarispa kallpachakurqan, hinaspa Judá ayllupi Benjamín ayllupi llapan millay wak'a idolokunata, Efraín orqo-orqopi munaychakusqan llaqtakunapi kashaq idolokunatapas wikch'urqan. Chaymantataq Señor Dios yupaychana wasiq ñawpaqenpi kashaq altarninta allicharqan. 9Hinaspa llapan Judá aylluta Benjamín ayllutawan huñurqan, hinallataq paykunawan tiyaq Efraín ayllu, Manasés ayllu, Simeón ayllu runakunatapas. Askha runakunan Israel suyumanta Judá suyuman hampurqanku, paykunawan Diosninku Señor Dios kasqanta yachaspa. 10Chaymi Asa chunka phisqayoqkaq watapi kamachikushaqtin kinsakaq killapi Jerusalén llaqtapi huñukurqanku. 11Chay p'unchaymi Señor Diosman sacrificiota haywarqanku llat'anaspa apasqankumanta qanchis pachak torokunata qanchis waranqa ovejakunatawan. 12Hinaspataq rimanakurqanku ñawpa taytankuq Diosnin Señorta tukuy sonqo tukuy alma servinankupaq, 13pipas Israelpa Diosninta mana serviqqa erqepas machupas, warmipas qharipas wañuchisqa kananpaqwan. 14Chaytan kunkayoqta Señor Diosman jurarqanku, hinaspa kusikuymanta qaparirqanku, cornetata waqratapas tocallarqankutaq. 15Chaymi llapan Judá runakunaqa tukuy sonqowan juraspa prometekusqankumanta anchata kusikurqanku. Sonqopas-sonqon Señor Diosta maskharqanku, chaymi Señor Diosqa paykunawan tarichikurqan, sumaqtataq suyuntinpi kawsachirqan. 16Rey Asaqa hatun maman Maacatapas reina mama-kayninmanta wikch'urqanmi, Asera diosaq millay rikch'ayninta ruwachikusqanrayku. Chay rikch'aytataq ñut'uta p'akirqan, hinaspa Cedrón mayu wayq'opi ruphachirqan. 17Manaña Israel suyupi orqo patapi yupaychana cheqaskunata thunirqanchu chaypas, Asaqa Señor Diospaq hunt'aqllapunin karqan tukuy kawsasqan p'unchaykunapi. 18Hinallataq Señor Diospa wasinman churarqan paypas taytanpas Señor Diospaq t'aqasqanku qorita, qolqeta, serviciokunatawan. 19Awqa-tinkuyqa manan karqanchu kinsa chunka phisqayoq wata Asaq kamachikunankama.

will be added

X\