2 Crónicas 11

1Jerusalenman chayaspataq Roboamqa huñurqan llapan Judá ayllumanta Benjamín ayllumantawan pachak pusaq chunka waranqa akllasqa soldadokunata. Payqa Israel runakunawan maqanakuytan yuyaykurqan, ahinapi suyunta kutichikapunanpaq. 2Señor Diosmi ichaqa profeta Semaiasta nirqan: 3–Salomonpa churin Judá rey Roboamta, llapan Judá aylluta, Benjamín ayllutapas nimuy, 4Señor Diosmi nin: Ama wawqeykichis Israel runakunawan maqanakuq riychischu, wasiykichista llapaykichis kutipuychis. Suyuq t'aqanakunantaqa ñoqan unancharqani, nispa. Chaymi paykunaqa Señor Diospa nisqanta kasukuspa kutipurqanku, manataq Jeroboam contra maqanakuq ripurqankuchu. 5Roboamqa Jerusalenpin tiyarqan, hinaspa Judapi wakin llaqtakunata pukara llaqtakunaman tukuchirqan. 6Chaykunan karqan Belén, Etam, Tecoa, 7Bet-sur, Soco, Adulam, 8Gat, Maresa, Zif, 9Adoraim, Laquis, Azeca, 10Zora, Aijalón, Hebronpiwan. Llapan chaykunan Judá aylluq Benjamín aylluq pukarayoq llaqtankuna kapurqan. 11Muyuriq perqankunatapas allinta ruwarqan, hinaspa kamachikuqkunata churarqan, hinallataq mikhuytapas aceitetapas vinotapas chay llaqtakunapi waqaycharqan. 12Llapan chay llaqtakunapin escudokunata espadakunata ima churarqan, chaymi ancha allin pukara hina karqan. Judá ayllupas Benjamín ayllupas Roboamtan servirqanku. 13Israel suyuntinpi tiyaq llapan sacerdotekuna Leví runakuna iman tiyasqanku cheqaskunamanta ripuspanku Roboamman huñukapurqanku. 14Paykunaqa uywa michina hallp'ankutapas wasinkutapas wikch'uspan hampurqanku Judá suyuman Jerusalén llaqtamanwan. Paykunataqa Jeroboammi churinkunapiwan Señor Diospaq sacerdote-kayninkumanta wikch'urqanku. 15Chaymi Jeroboamqa sacerdotekunata akllakurqan wak'a dios yupaychana cheqaskunapi llank'anankupaq, orqo cabra rikch'aykunata paypa ruwachisqan torillo rikch'aykunatawan yupaychanankupaq. 16Leví runakunaq qhepantaqa hamullarqankutaqmi Jerusalenta Israelpa ayllunkunapi kaq Dios sonqo llapan runakunapas, ñawpa taytankuq Diosnin Señorman sacrificiota haywanankupaq. 17Paykunan Judá suyuta allinta kallpacharqanku, Salomonpa churin Roboamtataq kinsa wata yanaparqanku, Davidpa kawsasqanta Salomonpa kawsasqanta hina kawsaspanku. 18Roboamqa Mahalatwanmi casarakurqan, Mahalatpa taytanmi karqan Davidpa churin Jerimot, mamantaq Isaipa churin Eliabpa ususin Abihail. 19Mahalatmi wachakurqan Jeusta, Semariasta, Zahamtawan. 20Chaymantataq Roboamqa Absalonpa ususin Maacawan casarakurqan, chaymi paypas wachakullarqantaq Abiasta, Ataita, Zizata, Selomit-tawan. 21Payqa Absalonpa ususin Maaca warmintan anchata munakurqan llapan warminkunamantapas tiyaqmasin warmikunamantapas. Roboamqa chunka pusaqniyoq warmikunawanmi casarakurqan, tiyaqmasin warmikunataq soqta chunka karqan. Churinkunan karqan iskay chunka pusaqniyoq, ususinkunataq soqta chunka. 22Roboamqa Maaca warminpi churin Abiastan reyta churayta munarqan, chaymi wawqenkunaq umallinta churarqan. 23Allin yuyaywan ruwaspanmi Roboamqa llapan churinkunata ch'eqechirqan Judapi Benjaminpi llapan pukara llaqtakunaman, paykunamanqa askha mikhuykunatan qorqan, askha warmikunatataq taripurqanpas.

will be added

X\